އީރާނާ ދެމެދު މިހާރު ކުރިއަށްދާ ހަނގުރާމަ ނޮވެންބަރު މަހު އޮންނަ އެމެރިކާގެ މިޑްޓާމް އިންތިހާބަށް ފަހު ވަގުތުން ނިމުމަކަށް އަންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ޓެކްސަސްގައި ނޫސްވެރިންނާ ވާހަކަފުޅުދައްކަވަމުން ޓްރަމްޕް ވިދާޅުވީ، އީރާނުގެ ސަރުކާރު މިހާރު އޮތީ ބަލިގަބޫލުކުރާ ހިސާބުގައި ކަމަށާއި، އިންތިހާބަށް ފަހު ނުވަތަ އޭގެ ކުރިން ވެސް އެމެރިކާއިން ހަނގުރާމަ ކާމިޔާބުކުރާނެ ކަމަށެވެ.

ހަތް މަސްދުވަހަށް ދިގުލައިގެން ގޮސްފައިވާ މި ހަނގުރާމައާ ގުޅޭގޮތުން ޓްރަމްޕް ވިދާޅުވީ، އީރާނުން ހަނގުރާމަ ދިގުދަންމަން މަސައްކަތްކުރަނީ ތެލުގެ އަގު ބޮޑުކޮށް ބާއްވައިގެން އެމެރިކާގެ އިންތިހާބަށް ނުފޫޒު ފޯރުވުމުގެ ބޭނުމުގައި ކަމަށެވެ. “އިންތިހާބަށް ފަހު ވަގުތުން ހަނގުރާމަ ނިމޭނެ ކަމަށް އަހަރެން ގަބޫލުކުރަން. ސަބަބަކީ އެ މީހުންނަށް ދެން އިތުރަށް ކެތްނުކުރެވޭނެތީ،” ޓްރަމްޕް ވިދާޅުވިއެވެ. މީގެ އިތުރުން، އިންތިހާބަށް ފަހު ތެލުގެ އަގު ވެސް ވަރަށް ބޮޑަށް ދަށަށް ދާނެ ކަމަށް ފާހަގަކުރެއްވިއެވެ.

މި ހަނގުރާމައިގެ ސަބަބުން ހޮރުމުޒް ކަނޑުއޮޅިން ދަތުރުކުރާ ތެޔޯ ޓޭންކަރުތަކަށް ދަނީ ހަމަލާތައް އަމާޒުވަމުންނެވެ.

ސީބީއެސް ނިއުސްއިން ރިޕޯޓުކޮށްފައިވާ ގޮތުގައި، ދާދި ފަހުން ވެސް އެމެރިކާއިން ވަނީ އީރާނުގެ ފަސް ތެޔޮ ޓޭންކަރެއް ފައްތާލައިފައެވެ. އޭގެ ރައްދުގައި އީރާނުން ވެސް ވަނީ އުރުދުންގައި ހުންނަ އެމެރިކާގެ އަސްކަރީ މަރުކަޒަކަށް ހަމަލާދީފައެވެ. ތެލުގެ އަގު ކޮންޓްރޯލް ކުރުމަށްޓަކައި ޖީ7 ގައުމުތަކުން ރިޒާވްގައި ހުރި ތެޔޮ ބާޒާރަށް ނެރުމަށް އެއްބަސްވެފައިވާ ކަމަށް ވެސް ޓްރަމްޕް ވަނީ އިއުލާންކުރައްވާފައެވެ.

ޓްރަމްޕް ވިދާޅުވި ގޮތުގައި، އީރާނާއެކު މަޝްވަރާތަކެއް ކުރިއަށްދިއުމަކީ އެކަށީގެންވާ ކަމެއް ނަމަވެސް، އެމެރިކާއިން މިވަގުތު އެފަދަ ކަމަކަށް މަސައްކަތެއް ނުކުރެއެވެ. ޓްރަމްޕް ވިދާޅުވީ އީރާނުގެ ބާރު މިހާރު ވަރަށް ބޮޑަށް ކުޑަވެފައިވާ ކަމަށެވެ.

މި މައްސަލައިގައި އެމެރިކާގެ އަސްކަރިއްޔާއިން ދަނީ މެދުއިރުމައްޗަށް އިތުރު 9،000 ސިފައިންނާއި މަނަވަރުތައް ފޮނުވަމުންނެވެ. ސީބީއެސް ނިއުސްއިން ރިޕޯޓުކޮށްފައިވާ ގޮތުގައި، މީގެ ތެރޭގައި ޔޫއެސްއެސް ތިއޮޑޯ ރޫޒަވެލްޓް ކެރިއަރ ސްޓްރައިކް ގްރޫޕް ހިމެނެއެވެ.