އެމެރިކާއިން ޑީސަލް އެކްސްޕޯޓު ކުރުން މަނާކޮށްފާނެ ކަމުގެ އިންޒާރާއެކު، ތެލުގެ ރިޒާވްތައް ބޭނުންކުރަން ފެށުމަށް އެމެރިކާގެ އޮފިޝަލުން ޔޫރަޕުގެ ގައުމުތަކަށް އަންގައިފިއެވެ.

ރޮއިޓާސްއިން ރިޕޯޓުކޮށްފައިވާ ގޮތުގައި، އެމެރިކާއިން ވަނީ ކުރިއަށް އޮތް ހަ މަސް ދުވަހުގެ ތެރޭގައި 120 މިލިއަން ފީފާގެ ޑީސަލް ރިޒާވުން ނެރުމަށް ޔޫރަޕުގެ އިއްތިހާދު (އީޔޫ) ގައި އެދިފައެވެ.

މިކަމާ ގުޅޭގޮތުން އެމެރިކާގެ އޮފިޝަލަކާ ހަވާލާދީ ރޮއިޓާސްއިން ބުނި ގޮތުގައި، އާންމުންނަށް ތެޔޮ ލިބޭނެ އަގުތައް ހެޔޮކުރުމަށް އެމެރިކާއިން ކުރާ މަސައްކަތުގައި ބައިވެރިވުމަކީ ޔޫރަޕަށް އެންމެ ފައިދާ ހުރި ގޮތެވެ. އަދި ފަރަންސޭސިވިލާތާއި ޖަރުމަނުވިލާތުން އެ ގައުމުތަކުގެ އިމަޖެންސީ ތެލުގެ ރިޒާވްތައް ބޭނުން ކުރުމަށް ވެފައިވާ އެއްބަސްވުންތަކާ އެއްގޮތަށް އަމަލުނުކުރާތީ އެމެރިކާގެ އޮފިޝަލުން ވަނީ ކަންބޮޑުވުން ފާޅުކޮށްފައެވެ.

އެމެރިކާގެ އެނާޖީ ސެކްރެޓަރީ ކްރިސް ރައިޓް ވިދާޅުވި ގޮތުގައި، މެދުއިރުމައްޗާއި ޗައިނާއިން ޑީސަލް އެކްސްޕޯޓު ކުރުމަށް ބޮޑެތި ހުރަސްތަކެއް ކުރިމަތިވެފައިވާތީ، ޔޫރަޕުން އާ ޑީސަލް ސަޕްލައިތަކެއް ނެރޭނެ ކަމަށް އެމެރިކާއިން އުންމީދު ކުރެއެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، ނޮވެންބަރު މަހު އޮންނަ އިންތިހާބުގެ ކުރިން އެމެރިކާގައި ތެލުގެ އަގު ދަށްކުރުމަށްޓަކައި ޑީސަލް އެކްސްޕޯޓު ކުރުން މަނާކުރުމާ މެދު އަންނަނީ ވިސްނަވަމުންނެވެ. ނަމަވެސް، މިކަމުގެ ސަބަބުން ޕެޓްރޯލްގެ އަގު އުފުލިދާނެ ކަމަށް އޭނާ ފާހަގަ ކުރެއްވިއެވެ.

މި މައްސަލައިގައި އީޔޫގެ އެނާޖީ ކޮމިޝަނަރު ޑޭން ޖޯގެންސަން ވަނީ، ޔޫރަޕުގެ ގައުމުތަކުން ގޭހާއި ކަރަންޓު ބޭނުންކުރާ މިންވަރު މަދުކުރުމަށް އިލްތިމާސް ކުރައްވައިފައެވެ. އީޔޫގެ އޮފިޝަލަކާ ހަވާލާދީ ރޮއިޓާސްއިން ރިޕޯޓުކޮށްފައިވާ ގޮތުގައި، ޑީސަލް ރިޒާވްތައް ބޭނުން ކުރުމާ މެދު ގޮތެއް ނިންމުމަށް ޔޫރަޕިއަން ކޮމިޝަނާއި ޖަރުމަނުވިލާތާއި ފަރަންސޭސިވިލާތާއި އިޓަލީ އާއި އަޔަލޭންޑް އަދި އިނގިރޭސިވިލާތުން ވަނީ މަޝްވަރާ ބައްދަލުވުމެއް ބާއްވައިފައެވެ.