ބުދަ ދުވަހު ދުބާއީން ފުރައިގެން އިސްރާއީލުގެ ޓެލް އަވީވަށް ދަތުރުކުރި ފްލައިދުބާއީގެ މަތިންދާބޯޓެއްގެ ކޯ-ޕައިލެޓު، ކެޕްޓަނަށް ވަޅިން ހަމަލާދީ ބޯޓު ވައްޓާލަން މަސައްކަތްކުރުމުން، ފަސިންޖަރުންނާއި ފަޅުވެރިން އޭނާ ހުއްޓުވައި ސައުދީ އަރަބިއްޔާއަށް ބޯޓު އިމަޖެންސީގައި ޖައްސައިފިއެވެ.

މި ހާދިސާއާ ގުޅިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުރާސްފަތި ދުވަހު ފޮކްސް ނިއުސްއަށް ދެއްވި އިންޓަވިއުއެއްގައި ވިދާޅުވި ގޮތުގައި، ހަމަލާދިން ކޯ-ޕައިލެޓަކީ “އިސްލާމީ ހަރުކަށި ފިކުރުގެ” ތަމްރީނު ލިބިފައިވާ މީހެކެވެ. ނަތަންޔާހޫ ވިދާޅުވީ މިކަން އެނގިފައިވަނީ ތަހުގީގުގެ ތެރެއިން އެއްކުރެވުނު އޭނާގެ ޒާތީ މައުލޫމާތުން ކަމަށެވެ. އޭނާ މަސައްކަތްކުރީ އަމިއްލައަށް މަރުވާން ކަމަށާއި، ފަސިންޖަރުން އޭނާ ހިފެހެއްޓުމުން އޭނާ މަރާލުމަށް އެދި ގޮވި ކަމަށްވެސް ނަތަންޔާހޫ ވިދާޅުވިއެވެ.

އެސޯޝިއޭޓެޑް ޕްރެސް (އޭޕީ) އިން ރިޕޯޓުކޮށްފައިވާ ގޮތުގައި، 174 މީހުންނާއެކު ދަތުރުކުރި ފްލައިޓް 1073 ގެ ކޯ-ޕައިލެޓަކީ އޮމާންގެ ރައްޔިތެކެވެ. އޭނާ ހަމަލާދިނީ އިންޑިއާއަށް ނިސްބަތްވާ ކެޕްޓަން ސްމިތު މަޗްޗަރ އަށެވެ. މި ހަމަލާއާއެކު ބޯޓު 33،000 ފޫޓުމަތިން 17،000 ފޫޓަށް ތިރިކުރި ނަމަވެސް، ޒަހަމްވެފައިވާ ކެޕްޓަން ކޮކްޕިޓްގެ ދޮރު ހުޅުވުމުން ފަސިންޖަރުން ވަދެ ކޯ-ޕައިލެޓު ވަނީ ކޮންޓްރޯލްކޮށްފައެވެ. އެއަށްފަހު ބޯޓުގައި ތިބި އޮފް-ޑިއުޓީ ދެ ޕައިލެޓުންގެ އެހީގައި ބޯޓު ވަނީ ސައުދީ އަރަބިއްޔާގެ ތަބޫކް އެއާޕޯޓަށް ޖައްސާފައެވެ. މި ހާދިސާގައި އެއްވެސް ފަސިންޖަރަކަށް ސީރިއަސް އަނިޔާއެއް ލިބިފައިނުވާއިރު، ފަހުން އެ މީހުން ވަނީ އެހެން ފްލައިޓެއްގައި އިސްރާއީލަށް ގެންގޮސްފައެވެ.

ނަތަންޔާހޫ މި ހަމަލާއަކީ ހަރުކަށި ފިކުރުގެ އަމަލެއް ކަމަށް ސިފަކުރެއްވި ނަމަވެސް، ހަމަލާދިން އަސްލު ސަބަބު އަދި ރަސްމީކޮށް ކަށަވަރުވެފައެއް ނުވެއެވެ.

ސައުދީ އަރަބިއްޔާގެ ކަމާބެހޭ ފަރާތްތަކުން މިހާރު އޭނާގެ މި މައްސަލަ ތަހުގީގުކުރަމުން އަންނައިރު، އެކުވެރި އަރަބި އިމާރާތް (ޔުނައިޓެޑް އަރަބް އެމިރޭޓްސް - ޔޫއޭއީ) އާއި އެމެރިކާ އަދި އިސްރާއީލުން އަންނަނީ މި ތަހުގީގުގައި ބައިވެރިވަމުންނެވެ.