އެމެރިކާގެ ޓެނެސީ ސްޓޭޓްގައި މަރުގެ އަދަބު ދިނުމަށް ދެ ފަހަރެއްގެ މަތިން އިންޖެކްޝަން ޖެހުމަށްފަހު ވެސް ސަލާމަތްވި ކްރިސްޓާ ޕައިކްގެ ހާލު ސީރިއަސް ކަމަށާއި އޭނާއަށް ފަރުވާދެމުންދާ ކަމަށް އޭނާގެ ވަކީލުން ބުނެފިއެވެ.

މިދިޔަ ބުދަ ދުވަހުގެ ރޭ ޓެނެސީގެ ރިވަރބެންޑް މެކްސިމަމް ސެކިއުރިޓީ އިންސްޓިޓިއުޝަންގައި ކުރިއަށްގެންދިޔަ މި ހުކުމް ތަންފީޒު ކުރުމުގެ ތެރޭގައި، ޕައިކްގެ ގަޔަށް ޕެންޓޯބާބިޓޯލްގެ ދެ ޑޯޒް ޖަހާފައިވާ ކަމަށް ވަކީލުން ބުނެއެވެ. ޕައިކްގެ ވަކީލު ރޭންޑީ ސްޕައިވީ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ބުނި ގޮތުގައި، ޕައިކް މިހާރު އޮތީ ހޮސްޕިޓަލެއްގައި ކްރިޓިކަލް ހާލަތެއްގައެވެ. އަދި އޭނާގެ ފުރާނަ ސަލާމަތް ކުރުމަށް ފަރުވާދެމުންދާ ކަމަށާއި ނަމަވެސް އޭނާގެ ސިއްހީ ހާލަތާ ގުޅޭ އިތުރު ތަފުސީލެއް އަދި ލިބިފައިނުވާ ކަމަށް ސްޕައިވީ ފާހަގަ ކުރިއެވެ.

ވަކީލުން ބުނާ ގޮތުގައި، އިންޖެކްޝަން ޖެހުމަށްޓަކައި ޕައިކްގެ ވާތަށް އެކަނިވެސް ހަތް ކަށި ޖަހާފައިވެއެވެ. އަދި މިކަމަށް ގަޑިއިރެއްހާ އިރު ހޭދަވި ކަމަށާއި މިއީ "ރަހުމުކުޑަ" އަދި "އަނިޔާވެރި" އަމަލެއް ކަމަށް ސްޕައިވީ ސިފަ ކުރިއެވެ.

މީގެ އިތުރުން، ދެވަނަ ޑޯޒް ދިނުމަށްފަހުވެސް ޕައިކް ނޭވާލަމުންދިޔަ ކަމަށާއި އޭނާ ގުގުރިދަމާ އަޑު އިވުނު ކަމަށް ވަކީލުންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.

ވަކީލު ސްޓީވް ފެރެލް ބުނި ގޮތުގައި، ޕައިކްގެ ލޭގެ މައްސަލައެއް ހުންނާތީ އޭނާގެ ނާރުތަކަށް ކަށި ޖެހުމުގައި ދަތިތަކެއް ކުރިމަތިވާނެކަން ކުރިން ވެސް އޮތީ އަންގައިފައި ކަމަށެވެ. އަދި އިންޖެކްޝަން ޖެހި ތަނުގައި ފޮޅު ނަގައި، އަތް ނޫކުލައަށް ބަދަލުވެފައިވާ ކަމަށް މަންޒަރު ދުށް ފަރާތްތަކާ ހަވާލާދީ ވަކީލުން ބުނެފައިވެއެވެ.

ޕައިކަކީ 1995 ވަނަ އަހަރު އޭނާއާއެކު ކިޔަވަން އުޅުނު ކުއްޖަކު މަރާލި މައްސަލައިގައި މަރުގެ ހުކުމް އިއްވާފައިވާ އުމުރުން 50 އަހަރުގެ އަންހެނެކެވެ.

މި ހާދިސާއާ ގުޅިގެން ޓެނެސީގެ ގަވަރުނަރު ބިލް ލީ ވަނީ، މިއީ ވަރަށް ކަންބޮޑުވާ ކަމެއް ކަމަށް ވިދާޅުވެފައެވެ. އަދި މި އަހަރަށް އެ ސްޓޭޓްގައި ތާވަލުކޮށްފައިވާ މަރުގެ ހުކުމް ތަންފީޒުކުރުންތައް މަޑުޖައްސާލައި، މި ހާދިސާ މިނިވަން ފަރާތަކުން ތަހުގީގު ކުރުމަށް އޭނާ ވަނީ އަންގަވައިފައެވެ.

ނަމަވެސް، ޓެނެސީ ޑިޕާޓްމަންޓް އޮފް ކަރެކްޝަނުން ނެރުނު ބަޔާނެއްގައި ބުނެފައިވަނީ، ހުކުމް ތަންފީޒުކުރުމުގައި އަމަލުކޮށްފައި ވަނީ ކަނޑައެޅިފައިވާ އުސޫލުތަކާ އެއްގޮތަށް ކަމަށެވެ.