ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި، "ކުށް ކޮށްގެން ހޯދާ މުދަލާގުޅޭ ބިލް" ގެ ބަހުސާއެކު ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ޖަލްސާތައް އަންނަ ހޯމަ ދުވަހު ފަށަން ނިންމައިފިއެވެ.

އަންނަ ހޯމަ ދުވަހު ބާއްވާ ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ފުރަތަމަ ޖަލްސާއަށް ތިން ކަމެއް ވަނީ އެޖެންޑާ ކޮށްފައެވެ.

ފުރަތަމަ ކަމަކަށް އޮތީ، ޓެކްސް ނެގުމާބެހޭ އިދާރީ ގާނޫނުގެ ދަށުން، ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ބޭފުލަކު އައްޔަން ކުރުމަށްޓަކައި ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ މައްސަލަ، ދިރާސާކޮށް ގޮތެއް ނިންމުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުވުމެވެ.

އެއަށްފަހު ދެން އޮތީ، ގަނޫނުއަސާސީގައިވާގޮތުގެ މަތިން "މައްކަތުލް މުކައްރަމާ ކޮންވެންޝަން އޮފް ދަ މެމްބާ ސްޓޭޓްސް އޮފް ދަ އޯގަނައިޒޭޝަން އޮފް އިސްލާމިކް ކޯޕަރޭޝަން އޮން އެންޓި ކޮރަޕްޝަން ލޯ އެންފޯސްމަންޓް ކޯޕަރޭޝަން" އިސްލާމީ ފާގަތިކަމާއި ނަޒާހަތްތެރިކަން ކުރިއެރުވުމަށްޓަކައި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ މެންބަރު ގައުމުތަކުގެ މެދުގައި ކޮރަޕްޝަނާ ދެކޮޅަށް ގާނޫނު ތަންފީޒުކުރުމުގެ ދާއިރާއިން އެއްބާރުލުން އިތުރުކުރުމަށް އެކުލަވައިލާފައިވާ ބައިނަލްއަގުވާމީ މުއާހަދާގައި ރާއްޖޭން ބައިވެރިވެ އެ މުއާހަދާއަށް އަމަލު ކުރުމަށް ރައްޔިތުންގެ މަޖިލީހުގެ ރުހުން ހޯއްދެވުމަށްޓަކައި ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ މައްސަލަ ދިރާސާކޮށް ގޮތެއް ނިންމުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުވުމެވެ.

ޖަލްސާގެ އެންމެ ފަހު ކަމަކަށް އޮތީ، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި، "ކުށް ކޮށްގެން ހޯދާ މުދަލާގުޅޭ ބިލް" ގެ އިބްތިދާއީ ބަހުސް ކުރިއަށް ގެންދިއުމެވެ.

އެ ބިލް މަޖިލީހަށް ހުށަހެޅުއްވީ، ފުވައްމުލަކު މެދު ދާއިރާގެ ޕީއެންސީ މެންބަރު އަލީ ފަޒާދެވެ.

ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ މަސައްކަތް ނިންމައި މިދިޔަ އޮގަސްޓް 26 ވަނަ ދުވަހު މަޖިލިސް ޗުއްޓީއަށް ދިޔައިރު، މިއަހަރުގެ ދެ ދައުރުގެ ތެރޭގައި 24 ބިލެއްގެ މަސައްކަތް ނިމިއެވެ.

މަޖިލީހުގައި މުހިއްމު މަސައްކަތްތަކެއް ހުރުމުން، މަޖިލީހުގެ މި އަހަރުގެ ފުރަމަ ދައުރާއި ދެވަނަ ދައުރު ވެސް ކުރިއަށްގެންދިޔައީ މުއްދަތު އިތުރުކޮށްގެންނެވެ.

އެގޮތުން މަޖިލީހުގެ ފުރަތަމަ ދައުރު ނިންމައި މެއި 16 އިން ފެށިގެން މަޖިލިސް ޗުއްޓީއަށް ދާން ޖެހޭނެ ކަމަށް މަޖިލިސް ގަވާއިދުގައި ބުނެފައިވީ ނަމަވެސް، ފުރަތަމަ ދައުރުގެ މުއްދަތު ހަމަވިއިރު، ގިނަ މަސައްކަތްތަކެއް ނުނިމި ހުރުމުން މެއި މަހުގެ 31 ވަނަ ދުވަހާ ހަމައަށް ދައުރު ދަންމާލައިގެން، އެ ދައުރުގައި 10 ބިލެއްގެ މަސައްކަތް ނިންމިއެވެ.

އެކަމުގެ ސަބަބުން މިއަހަރުގެ ދެވަނަ ދައުރުގެ ޖަލްސާތައް ފަށައި، ފުރަތަމަ ދައުރުގެ ޗުއްޓީއަށް ނުގޮސް ޖޫން މަހުގެ އެއްވަނަ ދުވަހުން ފެށިގެން ދެވަނަ ދައުރު ފަށައި، ދެވަނަ ދައުރުވެސް ދަންމާލައި ދެވަނަ ދައުރުގެ ޗުއްޓީއަށް ދިޔައީ މިދިޔަ އޮގަސްޓް މަހުގެ 26 އިން ފެށިގެންނެވެ.