އީރާނާ އެކު އެއްބަސްވުމަކަށް އަންނާނީތޯ ނުވަތަ އެ ގައުމަށް ހަމަލާދީ "ގޮއްވާލާނީތޯ" އެމެރިކާއިން ވަރަށް އަވަހަށް ނިންމަން ޖެހޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް މިހެން ވިދާޅުވީ ބުދަ ދުވަހު ވައިޓް ހައުސްގެ އޯވަލް އޮފީހުގައި ނޫސްވެރިންނާ ވާހަކަދައްކަވަމުންނެވެ.

"މޮޔައިން"ގެ ގޮތުގައި ޓްރަމްޕް ސިފަކުރައްވާފައިވާ އީރާނުގެ އޮފިޝަލުންނާ އެކު މުއާމަލާތްކުރައްވާނީ ކިހިނެއްތޯ ނޫސްވެރިޔަކު ސުވާލުކުރުމުން ޓްރަމްޕް ވިދާޅުވީ "ފަހަރެއްގައި އެމީހުން ގޮއްވާލެވިދާނެ" ކަމަށެވެ.

"އަހަރެމެން ޖެހޭނީ އެ ނިންމުން ނިންމަން. އެމީހުން ގޮއްވާލާނީތޯ ނުވަތަ އެއްބަސްވުމަކަށް އަންނާނީތޯ،" ޓްރަމްޕް ވިދާޅުވިއެވެ.

މީގެ އިތުރުން، އީރާނާއި އެމެރިކާއާ ދެމެދު އުފެދިފައިވާ މައްސަލަތަކަށް އިޝާރާތްކުރައްވައި ޓްރަމްޕް ވިދާޅުވީ އެކަމަށް ގޮތެއް ނިންމަން ޖެހޭ ވަގުތު ކުޑަތަންވަމުން އަންނަ ކަމަށެވެ. ކޮންމެވެސް އެއް ގޮތަކަށް ވަރަށް އަވަހަށް އެކަން ނިމުމަކަށް އަންނާނެ ކަމަށް ވެސް ވިދާޅުވިއެވެ.

ޓްރަމްޕް މި މޭރުމުން ވާހަކަފުޅުދައްކަވާފައި މިވަނީ، އިނގިރޭސިވިލާތުގައި ހުންނަ އެމެރިކާގެ އަސްކަރީ މަރުކަޒެއް ކަމަށްވާ އާރްއޭއެފް ފެއާފޯޑަށް ދޭން އުޅުނު ކަމަށް ތުހުމަތުކުރެވޭ ޓެރަރިސްޓު ހަމަލާއެއްގައި އީރާނުގެ ބައިވެރިވުމެއް އޮތްތޯ އެމެރިކާއިން ތަހުގީގުކުރަމުންދާ ދަނޑިވަޅެއްގައެވެ. އެ މައްސަލަ ވަރަށް ގާތުން ބައްލަވަމުން ގެންދަވާ ކަމަށް ޓްރަމްޕް ވަނީ ނޫސްވެރިންނަށް މައުލޫމާތު ދެއްވައިފައެވެ.

ނަމަވެސް، އީރާނުގެ ހާރިޖީ ވަޒީރު އައްބާސް އަރަގްޗީ ވަނީ އެ ހަމަލާ ރޭވުމުގައި އީރާނުގެ ބައިވެރިވުމެއް އޮތް ކަމަށް ކުރެވޭ ތުހުމަތުތައް ދޮގުކުރައްވައިފައެވެ.

އީރާނާއި އެމެރިކާއާ ދެމެދު ހިނގަމުންދާ ހަތް މަސް ދުވަހުގެ ހަނގުރާމަ ހުއްޓާލުމާ ގުޅޭގޮތުން ދެ ގައުމުން އަންނަނީ ނުސީދާކޮށް މަޝްވަރާކުރަމުންނެވެ. އީރާނުން ހަތް ދުވަހަށް ހަމަލާތައް މެދުކަނޑާލަން ހުށަހަޅާފައިވާއިރު، ޓްރަމްޕް ވަނީ އެ ހުށަހެޅުން ބޮލާލައި ޖަހާފައިކަމަށް ކަމަށް އީރާނުގެ ދައުލަތުގެ މީޑިއާއިން ބުދަ ދުވަހު ވަނީ ރިޕޯޓުކޮށްފައެވެ.