މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ތެރެއިން، ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް ތަރައްގީ ކުރުމަށް މަސައްކަތް ފެށުމަށްޓަކައި އެ ސަރަހައްދުގައި ހުރި އުޅަނދުތައް ނެގުމަށް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމެންޓް މިނިސްޓްރީން މިރޭ އަންގަވައިފިއެވެ.

އެ މިނިސްޓްރީން މިރޭ ކުރި އިއުލާނެއްގައި ބުނީ އެ ސަރަހައްދުގައި ޕާކުކޮށްފައިވާ އެއްގަމު އުޅަނދުތަކާއި ސުނާމީ ބިނާ ކައިރީ ފަޅުގައި އަޅާފައިވާ ކަނޑު އުޅަނދުފަހަރު އޮކްޓޯބަރު 3 ވާ ބުރާސްފަތި ދުވަހުގެ ރޭގަނޑު 11:00 ގެ ކުރިން ނަގަން ޖެހޭނެ ކަމަށެވެ.

އަދި އަންނަ ހޮނިހިރު ދުވަހާ ހަމައަށް ވެސް ނުނަގާ ހުންނަ އުޅަނދުތައް ސަރުކާރުގެ އިދާރާތަކުން ނަގައި، ސަރަހައްދު އެއްކޮށް ސާފުކުރާނެކަމަށް މިނިސްޓްރީން ބުންޏެވެ.

މާލެ ވަށައިގެންވާ ރިންގް ރޯޑް ފުރިހަމަކޮށް، ޒަމާނީ ފެންވަރަކަށް ތަރައްގީކުރަމުންދަނީ މަރުހަލާތަކަށް ބަހާލައިގެންނެވެ. މި މަޝްރޫއުގެ ބޮޑުބައި މިހާރު ނިމި ބޭނުންކުރަން ފަށާފައިވާއިރު، މިހާރު ބާކީ އޮތީ ނޯތު ހާބަރުން ފެށިގެން ސުނާމީ ބިނާއާ ދެމެދު އޮތް ސަރަހައްދުގެ މަސައްކަތެވެ.