މާލޭގެ އުތުރު ފަރާތު ބަނދަރުގެ ޖެޓީތައް ތަރައްގީކުރުމުގެ އަމަލީ މަސައްކަތް ފެށުމަށްޓަކައި، މަސްވެރިންގެ ޕާކުން ފެށިގެން ނާދީ ގޯޅިއާ ހަމައަށް އަޅާފައިވާ ހުރިހާ އުޅަނދުތައް ނެގުމަށް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމެންޓް މިނިސްޓްރީން މިރޭ އަންގަވައިފިއެވެ.

އެ މިނިސްޓްރީން މިރޭކުރި އިއުލާނެއްގައި ބުނީ އެ ސަރަހައްދުގައި އަޅާފައިވާ އުޅަނދުފަހަރު ކުރިއަށް އޮތް ހުކުރު ދުވަހުގެ ރޭ 11:00 ގެ ކުރިން ނަގަންވާނެ ކަމަށެވެ. އަދި އެ މުއްދަތު ހަމަވުމަށްފަހު އެ ސަރަހައްދުގައި ހުންނަ އުޅަނދުތައް މިނިސްޓްރީގެ ބެލުމުގެ ދަށުން ނަގާނެކަމަށް މިނިސްޓްރީން ބުންޏެވެ.

މާލޭގެ އުތުރު ފަރާތު ބަނދަރަކީ ކޮންމެ ދުވަހަކުވެސް ގިނަ އަދަދެއްގެ ދަތުރުވެރިންނާއި އާންމު ރައްޔިތުން ލަފާފުރުމުގައި ބޭނުންކުރާ ސަރަހައްދެކެވެ. އެހެންކަމުން، އެ ސަރަހައްދުގެ ޖެޓީތައް ޒަމާނީ ފެންވަރަށް ތަރައްގީކުރުމުގެ މައިގަނޑު ބޭނުމަކީ ލަފާފުރުމުގައި ދިމާވާ ދަތިތަކަށް ދާއިމީ ހައްލެއް ހޯދައިދީ، ދަތުރުވެރިންނަށް ލުއިފަސޭހަ މާހައުލެއް ގާއިމުކޮށްދިނުންކަމަށް ސަރުކާރުން ބުންޏެވެ.

ސަރުކާރުން ބޮޑުތަކުރުފާނު މަގު ތަރައްގީކުރުމަށް ހިންގާ މަޝްރޫއުގެ ދަށުން، އެ ސަރަހައްދުން 6 މީޓަރު މާލޭގެ ތޮށިން ބޭރަށް ޖައްސައި މަގު ވަނީ ބޮޑުތަނުން ފުޅާކޮށްފައެވެ. އަދި އެ ސަރަހައްދު ބޭނުންކުރާ ފަރާތްތަކަށް ލުއިފަސޭހަކޮށްދިނުމުގެ ގޮތުން ޕާކިން ޒޯނެއް ވަނީ ހަދައިފައެވެ.