ރަސްމާލެ ވޯޓާފްރަންޓް އެންޑް މެރީނާ މަޝްރޫއުގެ ތެރެއިން ކުރިއަށް އޮތް 10 އަހަރު ދުވަހުގެ ތެރޭގައި ދައުލަތަށް އާމްދަނީގެ ގޮތުގައި 11 ބިލިއަން ޑޮލަރަށް ވުރެ ގިނަ އަދަދެއް ލިބޭނެ ކަމަށް ލަފާކުރެވޭ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެއެވެ.

ރަސްމާލޭގައި ހިންގުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނީގެ 20 ބިލިއަން ޑޮލަރުގެ މަޝްރޫއާ ގުޅޭގޮތުން އެކްސްގައި މިއަދު ކުރެއްވި ޕޯސްޓެއްގައި މިނިސްޓަރު ވިދާޅުވި ގޮތުގައި، މިއީ އަހަރެއްގެ މައްޗަށް ބަލާނަމަ ގާތްގަނޑަކަށް 1.1 ބިލިއަން ޑޮލަރުގެ އާމްދަނީއެކެވެ. މި ލަފާކުރާ އަހަރީ އާމްދަނީއަކީ ރާއްޖޭގައި މިހާރު ހިންގާ 179 ރިސޯޓާއި، 16 ހޮޓަލާއި، 920 ގެސްޓްހައުސްގެ އިތުރުން 165 ސަފާރީ އުޅަނދު އެއްކޮށްލުމުން ދައުލަތަށް ލިބޭ އަހަރީ އާމްދަނީއަށް ވުރެ ބޮޑު އަދަދެއް ކަމަށް މިނިސްޓަރު ފާހަގަކުރެއްވިއެވެ. އަދި މިއީ ދައުލަތުގެ މާލީ ހާލަތު ރަނގަޅުކޮށް، ރާއްޖޭގެ ދިގު މުއްދަތުގެ ތަރައްގީއަށް މި މަޝްރޫއުން ލިބިގެންދާނެ ބޮޑު ކުރިއެރުމެއް ކަމަށްވެސް މިނިސްޓަރު ވިދާޅުވިއެވެ.

ރަސްމާލެ އެއްބަސްވުމުގެ ދަށުން ދައުލަތަށް އާމްދަނީ ލިބޭނެ ގޮތްތަކުގެ ތަފްސީލު ދެއްވަމުން މިނިސްޓަރު ވިދާޅުވީ، އާންމު ރޭޓުތަކުގައި ޓީޖީއެސްޓީ ނެގުމާއި، ފުރަތަމަ ކުރާ ވިޔަފާރިތަކާއި ކުއްޔަށް ދޫކުރާ ތަންތަނުން މާސްޓާ ޑިވެލޮޕަރަށް ލިބޭ އާމްދަނީގެ 10 ޕަސެންޓް ދައުލަތަށް ލިބޭނެ ކަމަށެވެ. އަދި ފުރަތަމަ ފަހަރަށް ގަންނަ ފަރާތްތަކާއި އޭގެ ފަހުން ތަންތަން ބަދަލުކުރާއިރު ޕްރޮޕަޓީގެ އަގުގެ ހަތަރު ޕަސެންޓް ދައްކަން ޖެހޭނެ ކަމަށްވެސް ވިދާޅުވިއެވެ.

މި އެއްބަސްވުމުގެ ދަށުން އެއްވެސް ޓެކްސްއަކުން ނުވަތަ ޑިއުޓީއަކުން މާފުކޮށްދިނުމެއް ނުހިމެނޭ އިރު، މި މަޝްރޫއަށް ސަރުކާރުން އެއްވެސް ލޯނެއް ނުނަގާނެ ކަމަށާއި ސޮވެރިން ގެރެންޓީއެއްވެސް ނުދޭނެ ކަމަށް ޒަރީރު ވިދާޅުވިއެވެ. މީގެ އިތުރުން، ޕްރޮޕަޓީ ވިއްކައިގެން ލިބޭ ހުރިހާ ފައިސާއެއް ރާއްޖޭގެ އެސްކްރޯ އެކައުންޓެއްގައި ބަހައްޓަން ޖެހޭނެ ކަމަށާއި، އެ ފައިސާ ދޫކުރެވޭނީ އެއްބަސްވުމުގައިވާ ގޮތުގެ މަތިން ކަމަށް މިނިސްޓަރު ވިދާޅުވިއެވެ. އަދި މަޝްރޫއުގެ ހުރިހާ ފައިސާއެއް ދައުރުވާން ޖެހޭނީ ދިވެހި ބޭންކުތައް މެދުވެރިކޮށް ކަމަށްވެސް އެއްބަސްވުމުގައި ބަޔާންކޮށްފައިވެއެވެ.

ގާތްގަނޑަކަށް 10 އަހަރު ދުވަހުގެ ތެރޭގައި އެކި ފިޔަވަހިތަކަކަށް ބަހާލައިގެން ކުރިއަށްގެންދާ ރަސްމާލެ މަޝްރޫއަކީ 500 ހެކްޓަރުގެ ސަރަހައްދެއްގައި ހިންގާ 20 ބިލިއަން ޑޮލަރުގެ ބޮޑު މަޝްރޫއެކެވެ. މި މަޝްރޫއުގެ ތެރޭގައި މީހުން ދިރިއުޅޭނެ ގެތަކާއި، ހޮޓާތަކާއި، ރިސޯޓުތަކާއި، މެރީނާއެއްގެ އިތުރުން ފިހާރަތަކާއި އޮފީސްތައް އަދި ތައުލީމާއި ސިއްހީ ހިދުމަތްދޭ ތަންތަން ތަރައްގީކުރުން ހިމެނެއެވެ.

މިނިސްޓަރު ވިދާޅުވި ގޮތުގައި، 10 އަހަރު ތެރޭގައި މި މަޝްރޫއު އެއްކޮށް ނިމުމުން، އަހަރަކު އެއް މިލިއަނަށް ވުރެ ގިނަ ފަތުރުވެރިން މި ސަރަހައްދަށް ޒިޔާރަތްކުރާނެ ކަމަށް ލަފާކުރެވެއެވެ. އަދި އޭގެ ސަބަބުން ފަތުރުވެރިކަމުގެ ދާއިރާއިން އިގުތިސާދަށް އަހަރަކު ގާތްގަނޑަކަށް ދެ ބިލިއަން ޑޮލަރުގެ އާމްދަނީއެއް ލިބޭނެ ކަމަށްވެސް މިނިސްޓަރު ފާހަގަކުރެއްވިއެވެ.