މިދިޔަ އޮގަސްޓު މަހުގެ ތެރޭގައި ޒަކާތު ފަންޑުން އެކި ފަރާތްތަކަށް އެހީގެ ގޮތުގައި ޖުމުލަ 5.1 މިލިއަން ރުފިޔާ ދޫކޮށްފައިވާކަމަށް މޯލްޑިވްސް ޒަކާތު ހައުސްއިން ބުނެފިއެވެ.

ޒަކާތު ހައުސްއިން މިއަދު އާންމުކުރި ތަފާސްހިސާބުތަކަށް ބަލާއިރު މިއީ މިދިޔަ އަހަރުގެ އޮގަސްޓު މަހު ބެހި 4.6 މިލިއަން ރުފިޔާއާ އަޅާބަލާއިރު 12 ޕަސަންޓުގެ ކުރިއެރުމެކެވެ.

މިދިޔަ މަހު އެންމެ ބޮޑު ހޭދައެއް ކޮށްފައިވަނީ ފީސަބީލިﷲ ބަޔަށެވެ. ތަފާސްހިސާބުގައިވާ ގޮތުން އެ ބަޔަށްވަނީ 2.5 މިލިއަން ރުފިޔާ ހޭދަކޮށްފައެވެ. އޭގެ ތެރޭގައި ދީނީ ޕްރޮގްރާމްތައް ހިންގުމަށް ހޭދަކުރި އެއް މިލިއަން ރުފިޔާއާއި، މަތީ ތައުލީމު ފުރިހަމަކުރުމަށް ދިން އެހީގެ ގޮތުގައި 797,604 ރުފިޔާ ހިމެނެއެވެ. މީގެ އިތުރުން ފޮތްތައް ތަރުޖަމާކުރުމަށް 579,585 ރުފިޔާ އަދި ހިފްޒު ޕްރޮގްރާމްތަކާއި ކީރިތި ގުރްއާނުގެ އިލްމު ފެތުރުމަށް 120,414 ރުފިޔާވަނީ ހޭދަކޮށްފައެވެ.

ދެވަނައަށް އެންމެ ބޮޑު ހޭދައެއް ކޮށްފައިވަނީ ފަގީރުންނާއި މިސްކީނުންގެ ބަޔަށެވެ. އެ ބަޔަށް 2.3 މިލިއަން ރުފިޔާ ހޭދަކޮށްފައިވާއިރު، އޭގެ ތެރެއިން އެންމެ ބޮޑު އަދަދެއް ދޫކޮށްފައިވަނީ ބޭސްފަރުވާގެ އެހީގެ ގޮތުގައެވެ. އަދި ޒަރޫރީ އެކިއެކި ބޭނުންތަކަށް 42,500 ރުފިޔާ ވަނީ ދޫކޮށްފައެވެ. މީގެ އިތުރުން، ދަރަނިވެރިންނަށް އެހީވުމުގެ ބައިން 60,061 ރުފިޔާ ދޫކޮށްފައިވާއިރު، ހާލުގައި ޖެހިފައިވާ ދަތުރުވެރިންގެ ބައިން 19,834 ރުފިޔާވަނީ ދޫކޮށްފައިކަމަށް ތަފާސްހިސާބުގައި ބުންޏެވެ.

މިދިޔަ އޮގަސްޓު މަހުގެ ތެރޭގައި އެކި ފަރާތްތަކުން ޒަކާތުގެ ގޮތުގައި ފަންޑަށް ޖުމުލަ 7.3 މިލިއަން ރުފިޔާ ދައްކާފައިވާ ކަމަށްވެސް ޒަކާތު ހައުސްގެ ހިސާބުތަކުން ދައްކައެވެ.