މަހަކު 60،000 ރުފިޔާއަށް ވުރެ ބޮޑު އާމްދަނީއެއް ލިބޭ ފަރާތްތަކަށް އާސަންދައިގެ ހިދުމަތް ލިމިޓްކުރުމަށް ސަރުކާރުން ނިންމި ނިންމުމަށް މާދަމާއިން ފެށިގެން އަމަލުނުކުރާނެ ކަމަށާއި، އެކަން އަދިވެސް އޮތީ މަޝްވަރާގެ މަރުހަލާގައިކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ގީލާ ވިދާޅުވީ، ވަކި މިންވަރަކަށް ވުރެ ބޮޑު އާމްދަނީ ލިބޭ މީހުންނަށް އާސަންދަ ލިމިޓްކުރުމާ ގުޅޭގޮތުން ފިނޭންސް މިނިސްޓްރީއާއި، ހެލްތު މިނިސްޓްރީ އަދި އާސަންދަ ކުންފުންޏާއި ހޮސްޕިޓަލްތަކާ ދެމެދު މިހާރުވެސް ފުޅާ ދާއިރާއެއްގައި މަޝްވަރާތައް ކުރިއަށްދާ ކަމަށެވެ. އެހެންކަމުން އެކަމުގައި އެންމެ އެކަށޭނަ ގޮތެއް އަދި ފައިނަލް ނުވާކަމަށް މިނިސްޓަރު ވިދާޅުވިއެވެ.

"ތިކަން ތިގޮތަށް ކުރިއަށް ގެންދިއުމާމެދުވެސް އަދި ނުނިންމަވާ. އެހެންނަމަވެސް، ފިނޭންސް މިނިސްޓްރީއާ ހެލްތު މިނިސްޓްރީ އަދި ކަމާބެހޭ އެހެން އިދާރާތަކާއެކު، އާސަންދަ އާއި އެހެން ހޮސްޕިޓަލްތަކާއެކުގައިވެސް އަޅުގަނޑުމެން މަޝްވަރާތައް އެބަ ކުރިއަށް ގެންދަން ތިކަމުގައި ހުރި އެންމެ ފީސިބަލް ގޮތަކީ ކޮބާތޯ،" ގީލާ ވިދާޅުވިއެވެ.

ރައީސް އޮފީހުގައި މި މަހުގެ ހަތްވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ރައީސް ޑރ. މުހައްމަދު މުއިއްޒު ވަނީ، މުއްސަނދިންނާއި ފަގީރުންނަށް އެއްވެސް ތަފާތެއް ނެތި އާސަންދަ ދިނުމަކީ އެންމެ އިންސާފުވެރި ގޮތް ނޫންކަމަށް ވިދާޅުވެފައިއެވެ.

އަދި އިންކަމް ޓެކްސް ދައްކާ ފަރާތްތަކަށް ހުރިހާކަމެއް ހިލޭ ލިބެން ނުޖެހޭނެ ކަމަށާއި، އޮކްޓޯބަރު މަހުން ފެށިގެން އެ އުސޫލަށް ބަދަލު ގެންނަވާނެކަމަށް ރައީސް ވިދާޅުވެފައިވެއެވެ.

"އެހެންވީމާ މުއްސަނދިންނާއި، އިންކަމް ޓެކްސް ޕޭކުރާ ފަރާތްތައް މުއްސަނދިންނަށް ކޮންމެހެން އާންމުންނަށް މި ލިބޭ ގޮތަށް ހުރިހާ ކަމެއް ފްރީކޮށް ލިބޭކަށް ނުޖެހޭ. އެހެންވީމަ އެ ބަދަލު މި އަންނަ މަހުން ފެށިގެން ގެނެވޭނެ،" ރައީސް ވިދާޅުވެފައިވެއެވެ.

ނަމަވެސް، މިނިސްޓަރު ގީލާ މިއަދު ސާފުކޮށްދެއްވި ގޮތުގައި، ކަމާގުޅޭ އިދާރާތަކުގެ މެދުގައި ދެކެވޭ ވާހަކަތަކަށްފަހު މި މައްސަލަ ވަޒީރުންގެ މަޖިލީހަށް ހުށަހަޅައިގެން ގޮތެއް ނިންމަން ޖެހޭތީ، މާދަމާއިން ފެށިގެން މި ބަދަލު ތަންފީޒު ކުރަން ނުފެށޭނެއެވެ.

އަދި މި އުސޫލަށް އަމަލުކުރަން ފަށާނެ ސީދާ ތާރީހެއް ކަނޑައެޅޭނީ ކެބިނެޓުގެ ނިންމުމަށް ފަހުކަމަށްވެސް މިނިސްޓަރު ވިދާޅުވިއެވެ.