ދިވެހިރާއްޖޭގެ އިސްލާމީ ޔުނިވާސިޓީ (އައިޔޫއެމް) ގެ 2025 ވަނަ އަހަރުގެ ދެވަނަ ސެމިސްޓަރުގެ "ޑީންސް އޮނާ ލިސްޓް" ގައި 115 ދަރިވަރަކު ހިމަނައިފިއެވެ.

އެ ޔުނިވާސިޓީން އާންމުކުރި މައުލޫމާތަށް ބަލާއިރު، މި ލިސްޓުގައި އެންމެ ގިނައިން ހިމެނެނީ ކުއްލިއްޔާ އޮފް އެޑިއުކޭޝަންގެ ދަރިވަރުންނެވެ. އެ ކުއްލިއްޔާއިން 73 ދަރިވަރަކު ވަނީ މި އެވޯޑު ހާސިލުކޮށްފައެވެ.

ވަކިވަކި ކުއްލިއްޔާތަކުން މި އެވޯޑް ލިބުނު ދަރިވަރުންގެ އަދަދުތައް:

  • ކުއްލިއްޔާ އޮފް އެޑިޔުކޭޝަން - 73 ދަރިވަރުން
  • ކުއްލިއްޔާ އޮފް އިސްލާމިކް ރިވީލްޑް ނޮލެޖް އެންޑް ހިއުމަން ސައިންސަސް - 19 ދަރިވަރުން
  • ކުއްލިއްޔާ އޮފް ގުރްއާން އެންޑް ސުންނާ - 18 ދަރިވަރުން
  • ކުއްލިއްޔާ އޮފް އެރަބިކް ލޭންގުއޭޖް - 2 ދަރިވަރުން
  • ކުއްލިއްޔާ އޮފް އިކޮނޮމިކްސް އެންޑް މެނޭޖްމެންޓް ސްޓަޑީޒް - 2 ދަރިވަރުން
  • ކުއްލިއްޔާ އޮފް ޝަރީއާ އެންޑް ލޯ - 1 ދަރިވަރު

އައިޔޫއެމުން ބުނި ގޮތުގައި، ޑީންސް އޮނާ ލިސްޓަކީ މޯލްޑިވްސް ނެޝަނަލް ކޮލިފިކޭޝަންސް ފްރޭމްވޯކްގެ ލެވެލް 7 (ބެޗްލާސް ޑިގްރީ އަދި ބެޗްލާސް އޮނާސް ޑިގްރީ) ގެ ޕްރޮގްރާމްތަކުގައި ކިޔަވާ ދަރިވަރުންނަށް ދޭ އެވޯޑެކެވެ. މި އެވޯޑް ލިބޭނީ ކޮންމެ ސެމިސްޓަރެއްގެ ނަތީޖާއަށް ބަލައި، ކިޔެވި އެއްވެސް މާއްދާއަކުން ޑިސްޓިންކްޝަން އަށްވުރެ ދަށްނުވާ ނަތީޖާއެއް ދަމަހައްޓާ ދަރިވަރުންނަށެވެ.

މީގެ އިތުރުން، މި ލިސްޓުގައި ދަރިވަރަކު ހިމެނުމަށްޓަކައި އެ ސެމިސްޓަރެއްގައި ކިޔަވަން ކަނޑައަޅާފައިވާ އެއްވެސް މާއްދާއަކުން އެގްޒެމްޕްޝަން ނުވަތަ އެޑްވާންސްޑް ސްޓޭންޑިން ހޯދާފައި ނުވުން ޝަރުތުކުރެއެވެ.