ތާއަބަދު ނަފްރަތާއި ހަސަދަވެރިކަމުގެ އަނދިރިކަމުގެ ތެރޭގައި ނުތިބެ، ވެރިކަމުގެ ދަހިވެތިކަން އެއްފަރާތްކޮށް ގައުމީ ވިސްނުމުގައި ކަންކަމާ މެދު ވިސްނުމަށް އާޓްސް، ކަލްޗާ އެންޑް ހެރިޓޭޖް މިނިސްޓަރު ހީނާ ވަލީދު ގޮވާލައްވައިފިއެވެ.

އެކްސްގައި ހީނާ މިއަދު ކުރެއްވި ޕޯސްޓެއްގައި މިފަދައިން ވިދާޅުވެފައިވަނީ، ރަސްމާލޭގައި ހިންގުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނީގެ 20 ބިލިއަން ޑޮލަރުގެ މަޝްރޫއާ ގުޅުވައިގެން ތުހުމަތުތަކެއް ކުރައްވައި، ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ގިނަ ފާޑުކިޔުންތަކެއް އަމާޒުކުރައްވަމުން ގެންދަވާތީ އެކަމަށް ރައްދުދެއްވުމުގެ ގޮތުންނެވެ.

ހީނާ ވިދާޅުވި ގޮތުގައި، އީގަލްސް ހިލްސްއިން ރަސްމާލޭގައި ކުރާ އިންވެސްޓްމަންޓުން ދައުލަތަށް ލިބޭނެ ކަމަށް ބެލެވޭ އާމްދަނީ، ރާއްޖޭގެ ފަތުރުވެރިކަމުގެ ދާއިރާއިން މިހާރު ލިބޭ އާމްދަނީއަށް ވުރެ ބޮޑުވާނެއެވެ. ރަސްމާލެ މަޝްރޫއުން ލިބޭނެ ކަމަށް ލަފާކުރެވޭ އާމްދަނީއަކީ ރާއްޖޭގައި މިހާރު ހިންގާ 179 ރިސޯޓާއި، 16 ހޮޓަލާއި، 920 ގެސްޓް ހައުސްގެ އިތުރުން 165 ސަފާރީން ލިބޭ އާމްދަނީއަށް ވުރެ ބޮޑު އަދަދެއް ކަމަށާއި އަދި މިހާރު ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން ޑޮލަރު ކަމަށް މިނިސްޓަރު ފާހަގަކުރެއްވިއެވެ.

ރާއްޖެއަށް އަންނަ ބޮޑެތި އިންވެސްޓްމަންޓްތަކާ ބެހޭގޮތުން ދޮގު ވާހަކަ ފަތުރައި، ސަރުކާރާ ދެކޮޅަށް ފިތުނަ އުފެއްދުމަކީ އިންވެސްޓަރުންގެ ހިތުގައި ލަކުނުލާ ކަމެއްކަމަށް މިނިސްޓަރު ވިދާޅުވިއެވެ. މީގެ ކުރިން ރައީސް ޔާމީންގެ ސަރުކާރުން ފ. އަތޮޅުގައި ހިންގަން އުޅުނު މަޝްރޫއަށް އިޝާރާތްކުރައްވައި ހީނާ ވިދާޅުވީ، އެފަދަ އިންވެސްޓަރުން ފައްސާލުމަށް ކުރެވޭ މަސައްކަތްތަކުން އެ ފަރާތްތަކުގެ އިހުލާސްތެރިކަމާމެދު ސުވާލު އުފެދޭ ކަމަށެވެ. އަދި ތާއަބަދު ނަފްރަތާއި ހަސަދަވެރިކަމުގެ އަނދިރިކަމުގެ ތެރޭގައި ނުތިބެ، ވެރިކަމުގެ ދަހިވެތިކަން އެއްފަރާތްކޮށް ގައުމީ ވިސްނުމުގައި ކަންކަމާމެދު ވިސްނުމަށް އެކަމަނާ ގޮވާލެއްވިއެވެ.

ރައީސް ޑރ. މުހައްމަދު މުއިއްޒު ރާއްޖޭގެ މިނިވަންކަމާއި ސިޔާދަތަށް ބުރޫއަރާ ފަދަ، އަދި ގައުމިއްޔަތުގެ އަސާސްތަކާ ތައާރަޒުވާ ފަދަ އެއްވެސް ކަމެއް ނުކުރައްވާނެކަމުގެ ޔަގީންކަން ދެއްވަމުން، ހީނާ ވިދާޅުވީ އެމަނިކުފާނު ވަނީ މިނިވަންކަމުގެ ރަތް ރޮނގު ފަލަކޮށް ދަންމަވާފައި ކަމަށެވެ. އިސްލާމީ ވަހުދަތު ފުޅާކޮށް ދިވެހި ގައުމިއްޔަތު ދިރުވުމަށް އެހެން އެއްވެސް ސަރުކާރަކުން އިސްކަން ނުދޭ މިންވަރަށް ރައީސް މުއިއްޒު އިސްކަންދެއްވާކަން ފާހަގަކުރެއްވިއެވެ.

ރަސްމާލެ އިންވެސްޓްމެންޓަކީ މި ހުރިހާ ކަމެއް ރައްކާތެރިކޮށް ހިމާޔަތްކުރެވިފައިވާ މަޝްރޫއެއްކަމަށް މިނިސްޓަރުގެ ޕޯސްޓުގައި ވިދާޅުވެފައިވެއެވެ. ސިޔާސީ ވާދަވެރިކަމުގެ ތެރެއިން ހަގީގަތް އޮޅުވާލުމަކީ ޒިންމާދާރުކަން ކުޑަ، ފިތުނަވެރި އަމަލެއްކަމަށް ސިފަކުރައްވައި، އަމިއްލަ އެދުމަށްވުރެ ގައުމު އިސްކުރުމަށް އެކަމަނާ ވަނީ އިލްތިމާސްކުރައްވައިފައެވެ.

ރަސްމާލެ މަޝްރޫއުގެ ދަށުން ހިއްކާ ބިމުގެ ތެރެއިން 500 ހެކްޓަރުގެ ބިން އަބޫދާބީގެ އީގަލް ހިލްސް ކުންފުންޏަށް 99 އަހަރަށް ދޭން ސަރުކާރުން ވަނީ ނިންމައިފައެވެ.

ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގުމަށް ހަމަޖެހިފައިވާ 20 ބިލިއަން ޑޮލަރުގެ ބިޔަ މަޝްރޫއުގެ ދަށުން ޒަމާނީ މެރީނާއަކާއި ދުނިޔޭގެ ފެންވަރުގެ ވޯޓަފްރަންޓް ސިޓީއެއް ތަރައްގީކުރުމަށް ހަމަޖައްސާފައިވެއެވެ.