ކުޑަކުދިންގެ ހައްގުތައް ރައްކާތެރިކުރުމުގެ ގާނޫނު މުރާޖައާ ކުރުމުގެ މަސައްކަތް ފަށަން ނިންމާފައިވާ ކަމަށް ހެލްތު މިނިސްޓްރީން ބުނެފިއެވެ.

ކުޑަކުދިންގެ ހައްގުތައް ރައްކާތެރިކުރުމުގެ ގާނޫނު ތަސްދީގުކޮށްފައި ވަނީ 2019 ވަނަ އަހަރުގެ ނޮވެންބަރު މަހުއެވެ. އަދި އެ ގާނޫނަށް އަމަލުކުރަން ފެށީ 2020 ވަނަ އަހަރުގެ ފެބްރުއަރީ މަހުގައެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމްގައި ހެލްތު މިނިސްޓްރީގެ ސްޓޭޓް މިނިސްޓަރު ޒީނާޒް އަދުނާން ރޭ ވިދާޅުވީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނު މުރާޖައާ ކުރަން ޖެހިފައިވާ ކަމަށެވެ. އެގޮތުން ގާނޫނަށް ގެންނާން ޖެހޭ ބަދަލުތައް ނިޒާމެއްގެ ތެރެއިން ބަލަމުންގެންދާ ކަމަށް އޭނާ ވިދާޅުވިއެވެ.

"އަޅުގަނޑުމެންނަށް ހޯދިފައިވާ ޑޭޓާތަކާއި މި ނިޒާމްގެ ތެރޭގައި މަސައްކަތް ކުރާ ހުރިހާ އެންމެނާއެކު މަސައްކަތްކޮށް ރަނގަޅު ޕްރޮސެސްއެއްގެ ތެރެއިން މި މަސައްކަތް ކުރިއަށްދާނީ،" ޒީނާޒް ވިދާޅުވިއެވެ.

ކޮންވެންޝަން އޮން ދަ ރައިޓްސް އޮފް ޗިލްޑްރަންގެ 6 އަދި 7 ވަނަ ރިޕޯޓް ރާއްޖޭން ހުށަހަޅާފައިވާކަން ފާހަގަކުރައްވައި ޒީނާޒް އިތުރަށް ވިދާޅުވީ ކޮންވެންޝަން އޮން ދަ ރައިޓްސް އޮފް ޗިލްޑްރަން ކޮމިޓީން ހުށަހަޅާފައިވާ ކަންކަމަށް ރިޔާއަތްކޮށްގެން ކުޑަކުދިން ބައިވެރިވާ ކަންކަމުގައި އެކުދިންގެ ހިޔާލާ މަޝްވާރާ ހޯދުމުގެ ޕޮލިސީއެއް އެކުލަވާލުމުގެ މަސައްކަތް ކުރަމުންދާ ކަމަށެވެ. އަދި މި ޕޮލިސީގެ ފައިނަލް ޑްރާފްޓް މިއަހަރުގެ ނިޔަލަށް އެކުލަވައިލެވޭނެ ކަމަށް ވެސް އޭނާ ވިދާޅުވިއެވެ.

ޗައިލްޑް ޕްރޮޓެކްޝަން ސްޕެޝަލިސްޓް މުހައްމަދު ނައީމް ވިދާޅުވީ ގާނޫނު މުރާޖައާ ކުރާ އިރު، ގާނޫނު ތަންފީޒް ކުރުމުގައި ކުރެވިފައި ހުރި ކަންކަން ބެލުމަކީ މުހިއްމު ކަމެއް ކަމަށެވެ. އަދި އެ މަސައްކަތް ކުރުމުގައި ދިމާވެފައިވާ ގޮންޖެހުންތައް ބަލަންޖެހޭ ކަމަށް ވެސް އޭނާ ވިދާޅުވިއެވެ.

"ގާނޫނެއް ހަދާފައި ތަންފީޒް ކުރުން އެންމެ އުނދަގޫ ކަމަކަށް ވަނީ. އެހެންވީމަ ތަންފީޒް ކުރުމުގައި ކޮންކަހަލަ ގޮންޖެހުންތަކެއްތޯ ދިމާވެފައި ހުރީ. ކީއްވެގެންތޯ އެ ގޮންޖެހުންތައް ދިމާވަނީ. އެކަމަށް ބަލާލުން މުހިއްމު." ނައީމް ވިދާޅުވިއެވެ.