މަގު ކޮނުމުގެ އެކި މަސައްކަތްތަކުގެ ތެރެއިން ކަރަންޓު ވިއުގައިގައި ހިމެނޭ ކޭބަލްތަކަށް ގެއްލުން ވެ، ކަރަންޓު ކެނޑިއްޖެނަމަ، އަލުން ކަރަންޓް ދިނުމަށް ހޭދަވާ ހަރަދު އެ ފަރާތްތަކުގެ އަތުން ނަގަން ސްޓެލްކޯއިން ނިންމައިފިއެވެ.

ސްޓެލްކޯއިން މިއަދު ސޯޝަލް މީޑިއާގައި ކުރި ޕޯސްޓެއްގައި ބުނީ މަގު ކޮނުމުގެ އެކި މަސައްކަތްތަކުގެ ތެރެއިން އެ ކުންފުނީގެ ކަރަންޓު ވިއުގައިގައި ހިމެނޭ ކޭބަލްތަކަށް ގެއްލުންވެ، ކަރަންޓުގެ ހިދުމަތް މެދުކެނޑުމުގެ ސަބަބުން ރައްޔިތުންނަށް އެތައް ތަކުލީފުތަކަކާއި ދަތިތަކަކާ ކުރިމަތިވަމުންދާ ކަމަށެވެ.

"މިފަދަ ހާދިސާތައް ދުވަހެއް ދުވަހަކަށް އިތުރުވަމުންދާތީ، މަގު ކޮނުމުގެ މަސައްކަތްތައް ކުރިއަށްގެންދާ ފަރާތްތަކުގެ އިހުމާލުން މިފަދަ ކަމެއް ދިމާވެއްޖެ ހާލަތެއްގައި، އެ ފަރާތެއް ޒިންމާދާރު ކުރުވައި، އެ މައްސަލަ ހައްލުކޮށް އަލުން ހިދުމަތްދޭން ހިނގާ ހަރަދު އެ ފަރާތަކުން ނެގުމަށް މި ކުންފުނިން ވަނީ ނިންމާފައި،" ސްޓެލްކޯއިން ބުންޏެވެ.

ސްޓެލްކޯއިން ބުނީ މި ނިންމުމަކީ ކަރަންޓުގެ ހިދުމަތް މެދުކެނޑުމުގެ ސަބަބުން އާންމު ރައްޔިތުންނަށް ދިމާވާ ދަތި އުނދަގޫތަކުން ސަލާމަތްކޮށް، ހިދުމަތުގެ ފެންވަރު ދެމެހެއްޓެނިވި ގޮތެއްގައި ފޯރުކޮށްދިނުމުގެ މަގުސަދުގައި ނިންމާފައިވާ ނިންމުމެއް ކަމަށެވެ.

ސްޓެލްކޯއިން ވަނީ މަގު ކޮނުމުގެ މަސައްކަތްތައް ކުރިއަށްގެންދާ ހުރިހާ ފަރާތްތަކުން ވެސް އެ ކުންފުނީގެ ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާއެކު މަސައްކަތްތައް ރާވައި ކުރިއަށް ގެންދިއުމަށް އިލްތިމާސް ކޮށްފައެވެ.

މަގު ކޮނުމުގެ ތެރެއިން ކޭބަލަށް ގެއްލުން ވެ، މާލެ އާއި ހުޅުމާލެއިން ވަރަށް ގިނައިން ކަރަންޓް ކެނޑި އާންމުންނަށް ދަތިތަކާ ކުރިމަތިވެއެވެ. ހުޅުމާލެއިން މިދިޔަ ބުރާސްފަތި ދުވަހާއި މިދިޔަ ހޯމަ ދުވަހުގެ ރޭ ވެސް ކަރަންޓް ކެނޑިފައިވަނީ އިމާރާތްކުރަން މަގު ކޮނުނު ބައެއްގެ އަތުން ކަރަންޓް ކޭބަލްތަކަށް ގެއްލުން ލިބިގެންނެވެ.