އެމެރިކާއާއި އީރާނާ ދެމެދު ހިނގަމުންދާ ހަނގުރާމަ ވަރަށް އަވަހަށް ނިމޭނެ ކަމަށާއި، އީރާނަށް ނިއުކްލިއާ ހަތިޔާރެއް ނުލިބޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ވޮޝިންޓަންގައި ބޭއްވި އާޓިފިޝަލް އިންޓެލިޖެންސް (އޭއައި) އާ ގުޅޭ ހަރަކާތެއްގައި ވާހަކަފުޅުދައްކަވަމުން ޓްރަމްޕް ވިދާޅުވި ގޮތުގައި، މި ހަނގުރާމައިގައި އީރާނަށް ދަނީ ވަރަށް ބޮޑަށް ނާކާމިޔާބުވަމުންނެވެ. އަދި މި ހަމަނުޖެހުން ވަރަށް އަވަހަށް ނިމުމަކަށް އަންނާނެ ކަމަށް ވިދާޅުވިއެވެ. ނަމަވެސް، ހަނގުރާމަ ނިމޭނެ ވަކި ތާރީހެއް ނުވަތަ ހަނގުރާމަ ނިމުމަކަށް ގެންނާނެ ގޮތުގެ އެއްވެސް ތަފުސީލެއް ޓްރަމްޕް ނުދެއްވައެވެ.

ޓްރަމްޕް ވިދާޅުވި ގޮތުގައި، އީރާނަށް ނިއުކްލިއާ ހަތިޔާރެއް އުފެއްދުމުގެ ފުރުސަތު އެމެރިކާއިން ނުދޭނެއެވެ. މީގެ އިތުރުން، ހަނގުރާމަ ނިމުމާއެކު ދުނިޔޭގެ ބާޒާރުގައި ތެލުގެ އަގުތައް ވަރަށް ބޮޑަށް ދަށަށް ދާނެ ކަމަށްވެސް ވިދާޅުވިއެވެ. ޓްރަމްޕްގެ ސަރުކާރުން އީރާނާ ދެކޮޅަށް ފެށި މި ހަނގުރާމައަކީ އެމެރިކާގެ ތާރީހުގައި ކުރެވުނު އެންމެ މުހިންމު އެއް ކަންތައް ކަމުގައި ލިޔެވިގެންދާނެ ކަމަށްވެސް ޓްރަމްޕް ވިދާޅުވިއެވެ.

އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފަށާފައިވަނީ މިއަހަރުގެ ފެބްރުއަރީ މަހުގެ 28 ވަނަ ދުވަހުއެވެ. އޭގެ ފަހުން ޖޫން މަހު ދެ ގައުމުގެ ދެމެދުގައި ހަމަލާތައް މެދުކަނޑާލުމުގެ އެއްބަސްވުމެއްގައި ސޮއިކުރި ނަމަވެސް، ހޮރުމުޒް ކަނޑުއޮޅިއާ ގުޅޭގޮތުން ވެފައިވާ އެއްބަސްވުންތަކާ އީރާނުން ހިލާފުވެފައިވާ ކަމަށް ބުނެ، ޖުލައި 8 ވަނަ ދުވަހު އެމެރިކާއިން ވަނީ އަލުން އީރާނަށް ހަމަލާދޭން ފަށާފައެވެ.

އަލްޖަޒީރާއިން ރިޕޯޓުކޮށްފައިވާ ގޮތުގައި، ހަނގުރާމަ ހުއްޓާލުމުގެ އިޝާރާތެއް ޓްރަމްޕް މިދެއްވީ އެމެރިކާއާއި އީރާނާ ދެމެދު ހިނގަމުންދާ ހަމަނުޖެހުންތައް ހުއްޓާލުމާ ގުޅޭގޮތުން ގަތަރު މެދުވެރިކޮށް މަޝްވަރާތަކެއް ކުރިއަށްދާ ކަމަށް ރިޕޯޓުކޮށްފައިވާ ދަނޑިވަޅެއްގައެވެ.

އީރާނުގެ ނިއުކްލިއާ ޕްރޮގްރާމް ހުއްޓާލުމުގެ ބަދަލެއްގެ ގޮތުން، ހިފަހައްޓާފައިވާ އީރާނުގެ ފައިސާތަކެއް ދޫކޮށްލުމަށާއި ދަތިކުރުމުގެ ފިޔަވަޅުތަކަށް ލުޔެއް ދިނުމަށް އެމެރިކާއިން ހުށަހަޅާފައިވާ ކަމަށް އެމެރިކާގެ އެކްސިއޯސް ނޫހުން ރިޕޯޓުކޮށްފައިވެއެވެ. ނަމަވެސް، ޓްރަމްޕް ވަނީ އެ ހަބަރު ދޮގުކުރައްވައި، އީރާނަށް އެއްވެސް ކަމެއް ހުށަހަޅާފައި ނުވާނެ ކަމަށް ވިދާޅުވެފައެވެ.