ރާއްޖޭގައި ދަތުގެ ފަރުވާ ދެއްވުމުގައި އެތައް އަހަރެއް ވަންދެން އަގުހުރި ހިދުމަތްތަކެއް ކޮށްދެއްވި މަޝްހޫރު ހިދުމަތްތެރިޔާ، އަބްދުﷲ ސައީދު (ދަތްޖަހާ ސައީދު) އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ފުން ހިތާމަ ފާޅުކުރައްވައި، މަރްހޫމްގެ އާއިލާއަށް ތައުޒިޔާ ވިދާޅުވެއްޖެއެވެ.

އުމުރުން 89 އަހަރުގައި ސައީދު އަވަހާރަވީ ނޭވާލާން ދަތިވެގެން އައިޖީއެމްއެޗަށް ގެންގޮސް ފަރުވާދެމުން ދަނިކޮށް، ހާޓްއެޓޭކެއް ޖެހިގެން ރޭ ދަންވަރުގެ ވަގުތެއްގައެވެ. ސައީދުގެ މައްޗަށް ކުރެވުނު ކަށުނަމާދު ބާއްވާފައިވަނީ މިއަދުގެ މެންދުރު ނަމާދަށްފަހު އާސަހަރާ މިސްކިތުގައެވެ.

ރައީސް އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ ސައީދަކީ ދިގު މުއްދަތެއްގައި ސިއްހީ ދާއިރާއިން ގައުމަށް އަގުނުކުރެވޭ ފަދަ ހިދުމަތްތަކެއް ކޮށްދެއްވި، އަދި ރައްޔިތުންގެ ބޮޑު އިތުބާރަކާއި މަގުބޫލުކަމެއް ހޯއްދެވި ބޭފުޅެއް ކަމަށެވެ.

އޭނާ އަވަހާރަވުމަކީ މުޅި ގައުމަށް ލިބުނު ފޫނުބެއްދޭ ވަރުގެ ބޮޑު ހިތާމައެއްކަމަށް ރައީސް ވިދާޅުވިއެވެ. މީގެއިތުރުން، މަރްހޫމްގެ ފުރާނައަށް ސުވަރުގޭގެ ދާއިމީ ނިއުމަތް މިންވަރުކުރެއްވުން އެދިވަޑައިގެން ރައީސް ވަނީ ދުއާ ދަންނަވާފައެވެ.

އަބްދުﷲ ސައީދަކީ 1986 ވަނަ އަހަރުން ފެށިގެން، ރާއްޖެއަށް ޒަމާނީ ޑެންޓިސްޓުންގެ ހިދުމަތް އާންމުވުމުގެ ކުރިންވެސް އަމިއްލަ ހުނަރުވެރިކަމާއެކު ދަތް އުފުރުމާއި، ދަތް ޖެހުމުގެ އިތުރުން ރަންދަތް ޖަހައިދިނުމުގައި ހާއްސަ ހިދުމަތްތަކެއް ދެއްވި ބޭފުޅެކެވެ. ފަހުން މި ދާއިރާއިން އިތުރަށް ތައުލީމު ހާސިލުކުރައްވައިގެން، ސަރުކާރުގެ ހޮސްޕިޓަލުތަކުގައި 50 އަހަރެއްހާ ދުވަހު ހިދުމަތް ކުރެއްވުމަށްފަހު އޭނާ ރިޓަޔާ ކުރެއްވީ 2009 ވަނަ އަހަރުއެވެ.

ދަތުގެ ފަރުވާގެ ދާއިރާއަށް ކޮށްދެއްވި މި ހިދުމަތްތަކުގެ އަގުވަޒަންކޮށް، ސަރުކާރުން ވަނީ މިއަހަރުގެ ޖުލައި މަހު އޭނާއަށް އެވޯޑެއްވެސް އަރުވާފައެވެ. ސިއްހީ ދާއިރާގެ އިތުރުން، ދިވެހި މަސައްކަތްތެރިކަމާއި އަތްތެރިކަމުގެ ރޮނގުންވެސް ސައީދަކީ ފާހަގަކޮށްލެވޭ ފަންނުވެރިއެކެވެ. ކަނބުރުވެރިކަމާއި ލިޔެލާޖެހުމުގައި ސައީދު ވަނީ ގައުމީ އުފެއްދުންތެރިކަމުގެ މައުރަޒުތަކުން އެތައް ފަހަރަކު އެއްވަނަ ހޯއްދަވާފައެވެ.

އަދި 1972 ވަނަ އަހަރު އިނގިރޭސިވިލާތުގެ ރާނީ އެލިޒަބަތު ދެވަނަ ރާއްޖެއަށް ކުރެއްވި ތާރީހީ ޒިޔާރަތުގައި، އެކަމަނާއަށް ވެދުމަށް އެރުވި ހާއްސަ ގަހަނާ ސެޓަކީވެސް ސައީދުގެ ތައްޔާރުކުރެއްވި އުފެއްދުމެކެވެ.