ވޭތުވެދިޔަ އަހަރުތަކުގައި ބޮޑެތި ދަރަނިތަކަކާ އެކު ބަލިކަށިވެފައި އޮތް ގައުމީ އެއާލައިން މޯލްޑިވިއަންގެ ހިންގުން މި ސަރުކާރުން ހަރުދަނާކޮށް، ކުރު މުއްދަތެއްގެ ތެރޭގައި އެދެވޭ ރަނގަޅު ނަތީޖާއެއް ނެރެދީފައިވާކަމަށް ޓޫރިޒަމް އެންޑް ސިވިލް އެވިއޭޝަން މިނިސްޓަރު މުހައްމަދު އަމީން ވިދާޅުވެއްޖެއެވެ.

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ހުންނަ މޯލްޑިވިއަންގެ ސީޕްލޭން ޓާމިނަލްގެ ޖާގަ ދެގުނަ ބޮޑުކޮށް، ޒަމާނީ ބަދަލުތަކާއެކު އަލުން ހުޅުވުމަށް މިއަދު ބޭއްވި ރަސްމިއްޔާތުގައި އަމީން ވިދާޅުވީ، އަލަށް ހުޅުވި ޓާމިނަލަކީ ރާއްޖޭގެ އޭވިއޭޝަން ސިނާއަތުގެ ފެންވަރު ހިފެހެއްޓޭނެ ފަދަ ޒަމާނީ ވަސީލަތެއް ކަމަށެވެ. އަދި މޯލްޑިވިއަންއަކީ ކުރިން ދައުލަތަށް ބޮޑު ފައިދާއެއް ހޯދައިދިން ކުންފުންޏެއް ނަމަވެސް، 2018 އިން 2023 އާ ދެމެދު ކުންފުނި ހިންގުމުގައި ހުރި ދޯހަޅިކަމުގެ ސަބަބުން ގިނަ ކޮންޓްރެކްޓްތަކެއް ގެއްލި، އޮޕަރޭޝަންތައް ހުއްޓުމަކަށް އައިސް ބޮޑެތި މާލީ ގެއްލުންތަކާ ކުރިމަތިލާން ޖެހުނުކަމަށް އަމީން ވިދާޅުވިއެވެ.

ނަމަވެސް، 2023 ވަނަ އަހަރު ރައީސް ޑރ. މުހައްމަދު މުއިއްޒުގެ ސަރުކާރުން ވެރިކަމާ ހަވާލުވެ، މެނޭޖްމަންޓަށާއި ހިންގުމުގެ ވައްޓަފާޅިއަށް ގެނައި ހެޔޮ ބަދަލުތަކާއެކު، ފަސް އަހަރު ދުވަހުގެ ބޮޑު ދަރަންޏެއް އޮތް ކުންފުނި މިދިޔަ އަހަރުގެ ތެރޭގައި އަލުން އަނބުރާ ކާމިޔާބީގެ މަގަށް ގެނެވިފައިވާކަމަށް މިނިސްޓަރު ވިދާޅުވިއެވެ.

"ނޭޝަނަލް ކެރިއާ އޮންނަންވާނީ ރަނގަޅު ސްޓޭޓަސްއެއްގައި ރަނގަޅު ފެންވަރެއްގައި،" އަމީން ވިދާޅުވިއެވެ.

މޯލްޑިވިއަންއަކީ ދިވެހީންގެ ފަހުރެއްކަމަށް މިނިސްޓަރު ވިދާޅުވިއެވެ. ސީޕްލޭންގެ ހިދުމަތް އާ މޮޑެލްއަކަށް ބަދަލުކުރުމުގެ މަސައްކަތް ކުރިއަށްދާ ކަމަށާއ، ކުންފުނީގެ މުވައްޒަފުންގެ ލާބަޔާއި މަންފާއަށް ސަރުކާރުން އިސްކަމެއް ދޭކަމަށް އަމީން ވިދާޅުވިއެވެ.

އެގޮތުން، މުވައްޒަފުންގެ ބޯހިޔާވަހިކަމަށް ބޭނުންވާ ދެ ބިން މިހާރު ހަވާލުކުރެވިފައިވާ ކަމަށާއި، ވަރަށް އަވަހަށް އެ މަޝްރޫއުގެ އަމަލީ މަސައްކަތް ފެށޭނެކަމަށް އަމީން ވިދާޅުވިއެވެ.

މީގެއިތުރުން، އައިލޭންޑް އެވިއޭޝަންގެ ގަދަރާއި ހައިބަތު ދައްކުވައިދޭނެ އާ އިމާރާތެއް އެޅުމުގެ މަސައްކަތްވެސް ކުރިއަށްދާކަމަށް މިނިސްޓަރު ވިދާޅުވިއެވެ.