ހާއްސަ ހިދުމަތްތަކެއް ލިބޭގޮތަށް މޯލްޑިވިއަންގެ އާ ސީޕްލޭން ޓާމިނަލް ވީއައިއޭގައި ހުޅުވައިފި

ގައުމީ އެއާލައިން މޯލްޑިވިއަންގެ އާ ސީޕްލޭން ޓާމިނަލް ވެލާނާ އިންޓަނޭޝަނަލް އެއާޕޯޓު (ވީއައިއޭ) ގައި މިއަދު ރަސްމީކޮށް ހުޅުވައިފިއެވެ.

ވީއައިއޭގައި މިއަދު ބޭއްވި ރަސްމިއްޔާތެއްގައި މޯލްޑިވިއަންގެ އާ ސީޕްލޭން ޓާމިނަލް ހުޅުއްވައިދެއްވީ ސިވިލް އޭވިއޭޝަން މިނިސްޓަރު މުހައްމަދު އަމީނެވެ. އާ ޓާމިނަލް ހުޅުވިގެން ދިއުމަކީ މޯލްޑިވިއަނުން ސީޕްލޭންގެ ހިދުމަތް ފެށި ފަހުން ޓާމިނަލަށް ގެނައި އެންމެ ބޮޑު ބަދަލެވެ.

މޯލްޑިވިއަނުން ބުނި ގޮތުގައި މި މަޝްރޫއަކީ ފަސިންޖަރުންނަށް ދޭ ހިދުމަތުގެ ފެންވަރު މަތިކޮށް، ރާއްޖޭގެ ސީޕްލޭން ދަތުރުފަތުރުގައި އާ މިންގަނޑުތަކެއް ކަނޑައެޅުމަށް އެ ކުންފުނިން ކުރާ މަސައްކަތުގެ މުހިންމު ހިއްސާއެކެވެ.

މި މަޝްރޫއުގެ ދަށުން 15،000 އަކަފޫޓަށް ވުރެ ބޮޑު ސަރަހައްދެއް ވަނީ އަލުން ފަރުމާކޮށް ބޮޑުކޮށްފައެވެ. މީގެ ތެރޭގައި ކުރިން ހުރި ވަރަށް ވުރެ ދެ ގުނަ ބޮޑުކޮށްފައިވާ "ހުވަނދުމާ ލައުންޖު" ހިމެނެއެވެ. އަދި ޕްރީމިއަމް އަދި ސީއައިޕީ ފަސިންޖަރުންނަށް ހާއްސަ ވަކި ހިދުމަތްތަކެއް ވަނީ ތައާރަފުކޮށްފައެވެ. މީގެ ސަބަބުން މި ފަސިންޖަރުންނަށް އިތުރު ޕްރައިވެސީއާއި ހިތްހަމަޖެހުން ލިބިގެންދާނެއެވެ. މީގެ އިތުރުން، ސީއައިޕީ ފަސިންޖަރުންނަށް ހުވަނދުމާ ލައުންޖުން ސީދާ ބޯޓަށް އެރޭނެ ގޮތަށް އިތުރު ބޯޑިން ގޭޓެއް ވަނީ ހަދައިފައެވެ. ޓާމިނަލްގެ އިމާރާތުގެ ބޭރުގައި ވަނީ އާ ކްލެޑިން ހަރުކޮށް، އިމާރާތުގެ ރީތިކަމާއި ދިގު މުއްދަތަކަށް ބޭނުންކުރެވޭނެ ގޮތް ހަދައިފައެވެ.

ޓާމިނަލަށް ގެނައި އެންމެ ފާހަގަކޮށްލެވޭ އެއް ބަދަލަކީ ބޭރުގައި ހަދާފައިވާ ހާއްސަ ސަރަހައްދެވެ. މި ސަރަހައްދުގައި އިށީނދެ ތިބެވޭނެ އިންތިޒާމުތަކާއި، މިނީ ގޮލްފް ކުޅެވޭނެ ތަނެއްގެ އިތުރުން މޫދާއި ސީޕްލޭންތައް ފެންނާނެ ގޮތް ވަނީ ހަދައިފައެވެ. އަދި ކުޑަކުދިންނަށް ހާއްސަ ކޯނަރަކާއި، ރާއްޖޭގެ އުފެއްދުންތައް ވިއްކާ ފިހާރައެއްގެ އިތުރުން މުވައްޒަފުންނަށް ހާއްސަ ކެންޓީނެއް ވެސް ވަނީ ގާއިމުކޮށްފައެވެ. ޓާމިނަލްގެ މައި ދޮރޯށި ފަރުމާކޮށްފައިވަނީ ރާއްޖޭގެ ސަގާފަތް ރަމްޒުކޮށްދޭ ފީޗާ ވޯލްއަކާ އެކުގައެވެ. އަދި ބޯޑިން ގޭޓުތަކުން ފެށިގެން ސީޕްލޭން ޖެޓީއާ ހަމައަށް ވަނީ ޒަމާނީ ޑެކިން އަޅައިފައެވެ.

ޓާމިނަލް ހުޅުވުމުގެ ރަސްމިއްޔާތުގައި ވާހަކަދައްކަވަމުން މޯލްޑިވިއަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވި ގޮތުގައި، މިއީ ފަސިންޖަރުންނަށް ދޭ ހިދުމަތުގެ ފެންވަރު ރަނގަޅުކުރުމަށް އެ ކުންފުނިން ކުރަމުންދާ މަސައްކަތުގެ ތެރެއިން ގެނައި ބަދަލެކެވެ. އަދި މިއީ ކުންފުނީގެ އުމްރާނީ ތަރައްގީއާއި ފްލީޓު ޒަމާނީކުރުމަށް ގެންގުޅޭ ސްޓްރެޓެޖީގެ ބައެއް ކަމަށާއި، މީގެ ސަބަބުން ރާއްޖޭގެ ފަތުރުވެރިކަމާއި ދަތުރުފަތުރުގެ ގުޅުން އިތުރަށް ހަރުދަނާވެގެންދާނެ ކަމަށް އޭނާ ފާހަގަކުރެއްވިއެވެ.

މިގޮތުން، ކެނެޑާގެ ޑި ހަވިލޭންޑް އެއާކްރާފްޓް ކޮމްޕެނީއާ އެކު މިދިޔަ މަހު ވަނީ އެންމެ ފަހުގެ ދެ ޑީއެޗްސީ-6 ޓްވިން އޮޓާ ކްލެސިކް 300-ޖީ މަރުކާގެ ބޯޓު ގަތުމަށް އެއްބަސްވުމެއްގައި ސޮއިކޮށްފައެވެ. މިއާއެކު މޯލްޑިވިއަން ވެގެންދާނީ ރާއްޖޭގައި މި މަރުކާގެ ބޯޓުތައް އޮޕަރޭޓުކުރާ ފުރަތަމަ ކުންފުންޏަށެވެ.

މޯލްޑިވިއަނުން ބުނި ގޮތުގައި، ޓާމިނަލަށް ގެނައި މި ބަދަލަކީ ރާއްޖޭގެ ސީޕްލޭން ހިދުމަތްތައް ހަރުދަނާކުރުމަށް ސަރުކާރުން ގެންގުޅޭ ސިޔާސަތަށް އެއްބާރުލުން ދިނުމުގެ ގޮތުން ކުރިއަށްގެންދިޔަ މަޝްރޫއެކެވެ. މިއީ ގައުމީ އެއާލައިންގެ ހައިސިއްޔަތުން ފަތުރުވެރިކަމުގެ ސިނާއަތަށް އެ ކުންފުނިން ދޭ އަހައްމިއްޔަތުކަން އަންގައިދޭ ކަމެއް ކަމަށް ވެސް އެ ކުންފުނިން ވަނީ ފާހަގަކޮށްފައެވެ.