އިންޑިއާގެ މަޝްހޫރު ކިރުގެ އުފެއްދުންތަކުގެ ބްރޭންޑް "އަމުލް" އެސްޓީއޯ ޖެނެރަލް ޓްރޭޑިންގްއިން ރާއްޖެއަށް މިއަދު ތައާރަފުކޮށްފިއެވެ.
މި ބްރޭންޑް ތައާރަފުކޮށްފައިވަނީ ހުޅުމާލޭ ސިންތެޓިކް ޓްރެކްގައި މިހާރު ކުރިއަށްދާ ހޮޓެލް އޭޝިއާ އެގްޒިބިޝަންގައި ހުންނަ އެސްޓީއޯގެ ސްޓޯލްގައި މިއަދު ބޭއްވި ހާއްސަ ރަސްމިއްޔާތެއްގައެވެ. އެސްޓީއޯއިން ނެރުނު ނޫސްބަޔާނެއްގައި ބުނި ގޮތުގައި، މި އުފެއްދުންތައް ތައާރަފުކޮށްދެއްވީ އެ ކުންފުނީގެ އެކްސްކޯ މެންބަރުންނެވެ.
މިއަދުން ފެށިގެން އަމުލް ބްރޭންޑްގެ ކިރާއި ބަޓަރާއި ޗީޒްގެ އިތުރުން އައިސްކްރީމްގެ އެކި ބާވަތްތައް އެސްޓީއޯ ޕީޕަލްސް ޗޮއިސްއިން ލިބެން ހުންނާނެއެވެ. މީގެ އިތުރުން، އެގްޒިބިޝަންގައި ހުންނަ އެސްޓީއޯގެ ސްޓޯލުން މިއަދު އަމުލްގެ އުފެއްދުންތައް ބޭނުންކޮށްގެން ތައްޔާރުކުރާ ފޮނިކާތަކެއްޗާއި އައިސްކްރީމް ލިބެން ހުންނާނެ ކަމަށްވެސް އެ ކުންފުނިން ބުނެފައިވެއެވެ.
އަމުލްއަކީ އިންޑިއާގެ ކިރުގެ އުފެއްދުންތަކަށް ހާއްސަ ބޮޑު ބްރޭންޑެކެވެ. މި ނަމުގެ އަސްލު މާނައަކީ "އާނަންދު މިލްކް ޔޫނިއަން ލިމިޓެޑް" އެވެ. މުޅި ދުނިޔޭގައިވެސް މި ބްރޭންޑް މަޝްހޫރުވެފައިވަނީ "ދަ ޓޭސްޓް އޮފް އިންޑިއާ"ގެ ގޮތުގައެވެ.
ހޮޓެލް އޭޝިއާ އެގްޒިބިޝަންގައި އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް ހާއްސަކޮށްގެން ޕްރޮމޯޝަނަލް ހަރަކާތްތަކެއްވެސް ވަނީ ފަށައިފައެވެ. އެގޮތުން، ކޮފީ ސްޓޭޓްގެ ބުއިންތަކާއެކު ކުރިއަށްގެންދާ "ރެޖިސްޓާ އެންޑް ވިން" ހަރަކާތުގައި ސްޓޯލްގައި ރަޖިސްޓަރީކުރާ ފަރާތްތަކުގެ ތެރެއިން ކޮންމެ ދުވަހަކު ގުރުއަތުން ހޮވޭ ފަރާތަކަށް އިނާމު ދިނުމަށް ވަނީ ހަމަޖެހިފައެވެ. އަދި "ފޮލޯ އެންޑް ވިން" ހަރަކާތުގެ ދަށުން އެސްޓީއޯ ޕީޕަލްސް ޗޮއިސްގެ ޕޭޖް ފޮލޯކުރާ ފަރާތްތަކުގެ ތެރެއިން ނަސީބުވެރިއަކަށް ޑިޝްވޮޝަރެއް ލިބޭނެއެވެ.
ހޮޓެލް އޭޝިއާ އެގްޒިބިޝަން ކުރިއަށްދާނީ މި މަހުގެ 28 އިން ފެށިގެން 30 ގެ ނިޔަލަށެވެ.
އެސްޓީއޯ
އެސްޓީއޯ
އެސްޓީއޯ
އެސްޓީއޯ
ކޮމެންޓް