ރަސްމާލޭގައި ހިންގުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނީގެ 20 ބިލިއަން ޑޮލަރުގެ މަޝްރޫއާ ގުޅިގެން ކުރީގެ ރައީސް އަބްދުﷲ ޔާމީން ދެއްވި އިންޒާރަށް ބަންޑާރަ ނައިބު އަހުމަދު އުޝާމް ރައްދުދެއްވައިފިއެވެ.

ޕީއެންއެފުން މިދިޔަ އާދީއްތަ ދުވަހުގެ ރޭ ބޭއްވި ޖަލްސާއެއްގައި ޔާމީން އިންޒާރުދެއްވާފައިވަނީ ރަސްމާލެ 99 އަހަރަށް ބޭރުގެ ބަޔަކަށް ދިނުމަކީ ދާއިމީކޮށް އެ ބިން ވިއްކާލުން ކަމަށާއި، އެކަން ހުއްޓާނުލައިފި ނަމަ ސަރުކާރު ބަދަލުވުމާއެކު އުޝާމް ހިމެނޭހެން އެކަމުގައި ބައިވެރިވި ސަރުކާރުގެ އިސްވެރިންނަށް އަދަބުދޭނެ ކަމަށެވެ. އެކަމަށް ރައްދުދެއްވައި އެކްސްގައި ކުރެއްވި ޕޯސްޓެއްގައި އުޝާމް ވިދާޅުވި ގޮތުގައި، ރިސޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ޔާމީންގެ ވެރިކަމުގައެވެ.

ރާއްޖޭގައި އެންމެ ފުރަތަމަ ޓޫރިޒަމާ ބެހޭ ގާނޫނެއް އެކުލަވާލީ 1999 ވަނަ އަހަރު ކަމަށާއި، އޭރު ގާނޫނުގެ ދަށުން ޓޫރިސްޓް ރިސޯޓުތައް ކުއްޔަށް ދެމުން އައީ ގިނަވެގެން 25 އަހަރު ދުވަހުގެ މުއްދަތަށް ކަމަށް އުޝާމް ފާހަގަކުރެއްވިއެވެ. އޭނާ ވިދާޅުވި ގޮތުގައި، ގާނޫނަށް ގެނައި އިސްލާހަކުން އެ މުއްދަތު 50 އަހަރަށް އިތުރުކުރީ 2010 ވަނަ އަހަރު ކުރީގެ ރައީސް މުހައްމަދު ނަޝީދުގެ ވެރިކަމުގައެވެ. އަދި އެއަށްފަހު އެ މުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ޔާމީންގެ ވެރިކަމުގައެވެ.

މީގެ އިތުރުން، ޓޫރިޒަމާ ބެހޭ ގާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން، ޓޫރިސްޓް ރިސޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓެއްގެ އަގުން ބަލަށް ކެނޑުމަށްފަހު ޖެހޭ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަންޖެހޭނެ ކަމަށްވެސް ބަންޑާރަ ނައިބު ވިދާޅުވިއެވެ.

ރަސްމާލޭގައި ހިންގުމަށް ރާވާފައިވާ މަޝްރޫއު ކުރިއަށްގެންދާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށް އުޝާމް ވިދާޅުވިއެވެ. އޭނާ ވިދާޅުވި ގޮތުގައި، މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓް ނުވަތަ ކޮމާޝަލް ޓާމްސް އެގްރީމެންޓެއްގައެވެ.

މަޝްރޫއު ފެށުމުގެ ކުރިން އެ އެގްރީމެންޓުގައިވާ ކަންކަމުގެ މައްޗަށް ބިނާކޮށް އިތުރަށް މަޝްވަރާކޮށްގެން ޑެފިނިޓިވް އެގްރީމެންޓްތަކެއްގައި ސޮއިކުރާނެ ކަމަށާއި، މިކަމާ ގުޅުންހުރި ގާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށް އުޝާމް ވިދާޅުވިއެވެ. އަދި މި މަޝްރޫއު ކުރިއަށް ގެންދިއުމުގައި ރާއްޖޭގެ ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަގީންކަން އޭނާ ދެއްވިއެވެ.

ރަސްމާލެ މަޝްރޫއުގެ ދަށުން ހިއްކާ ބިމުގެ ތެރެއިން 500 ހެކްޓަރުގެ ބިން އަބޫދާބީގެ އީގަލް ހިލްސް ކުންފުންޏަށް 99 އަހަރަށް ދޭން ވަނީ ނިންމައިފައެވެ.

ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގުމަށް ހަމަޖެހިފައިވާ 20 ބިލިއަން ޑޮލަރުގެ ބިޔަ މަޝްރޫއުގެ ދަށުން ޒަމާނީ މެރީނާއަކާއި ދުނިޔޭގެ ފެންވަރުގެ ވޯޓަފްރަންޓް ސިޓީއެއް ތަރައްގީކުރުމަށް ހަމަޖައްސާފައިވެއެވެ.