އެމްއެމްޕީއާާރުސީ މެދުވެރިކޮށް ވ. އާރަށް ޓޫރިޒަމަށް ދޫކުރުމުގެ ތެރެއިން ރިޝްވަތުގެ ގޮތުގައި އެއް މިލިއަން ޑޮލަރު ނަގައި އެ ފައިސާ ލޯންޑާ ކުރި ކަމުގެ ކުށުގައި ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ މައްޗަށް ދައުލަތުން ކުރާ ދައުވާގައި، ޔާމީންގެ ފަރާތުން ހުށަހެޅުއްވި ދިފާއީ ހެކިން ގަބޫލު ނުުރުމަށް ދައުލަތުން ކުރިމިނަލް ކޯޓުގައި އެދިއްޖެއެވެ.

ކުރިމިނަލް ކޯޓުގައި މިއަދު ކުރިއަށްދިޔަ އަޑުއެހުމުގައި، ޝަރީއަތުގެ ކުރިން ހުށަހަޅާ ދިފާއީ ހެކިންގެ ގޮތުގައި ހަތަރު ޝަފައީ ހެކިންނާއި ކިތާބީ ހެއްކެއް ރައީސް ޔާމީން ހުށަހެޅުއްވިއެވެ.

އޭގެ ތެރޭގައި ޝަފަވީ ހެކިންގެ ގޮތުގައި ހިމެނެނީ، މާލޭ ސިޓީގެ ކުރީގެ ޑެޕިއުޓީ މޭޔަރު އަދި މިހާރު ޔޫތު މިނިސްޓަރުގެ އެޑްވައިޒަރު އަހުމަދު ނަރީޝް އާއި ވިލިމާލެ ދާއިރާގެ މަޖިލިސް މެންބަރު މުހައްމަދު އިސްމާއީލް އާއި ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދުގެ އިތުރުން އަބްދުﷲ ރަޝީދު ކިޔާ މީހެއްގެ ނަމެވެ. އަދި ކިޓާބީ ހެކީގެ ގޮތުގައި ޑޮލަރު މާރު ކުރެއްވި ކަމަށް ބުނާ ލިމެއްވެސް ހުށަހެޅުއްވިއެެވެ.

މި ދިފާއު ރައީސް ޔާމީން ހުށަހެޅުއްވީ، އެމަނިކުފާނުގެ އެކައުންޓުގައި ހުރި އެއް މިލިޔަން ޑޮަލަރަކީ ޑޮލަރު މާރުކުރުމުގެ މުއާމަލާތެއްކަން ސާބިތުކޮށް ދިނުމަށެވެ.

ނަމަވެސް މިއަދުގެ އަޑުއެހުމުގައި ދައުލަތުގެ ވަކީލުގެ ގޮތުގައި ހިމެނި ވަޑައިގެންނެވި ޕްރޮސެކިއުޓާ ޖެނެރަލް (ޕީޖީ)ގެ ވަކީލު އަހުމަދު ޝަފީއު ވަނީ އެ ހެކިން ބަލައި ނުގަތުމަށް ކޯޓުގައި އެދިވަޑައިގެންފައެވެ.

ސަބަބެއް ކަމަށް ދައުލަތުގެ ވަކީލު ވިދާޅުވީ، ހަގީގަތުގައި ވެސް އެއީ ޑޮލަރު މާރުކުރުމާ ގުޅޭ މުއާމަލާތެއްނަމަ، ތަހުގީގުގައި އެ ވާހަކަ ވިދާޅުނުވެ ހަނު ހުންނަންޖެހޭ ސަބަބެއް ނެތް ކަމަށެވެ. އަދި ތަހުގީގުގައި ދައްކާ ވާހަކަ އެމަނިކުފާނާ ދެކޮޅަށް ބޭނުން ކުރައްވަފާނެ ކަމަށް ބެލެވޭ ސަބަބެއް ދަށު ކޯޓާއި ހައިކޯޓުގެ މަރުހަލާގައި ވެސް ރައީސް ޔާމީނުގެ ފަރާތުން ދެއްކިފައިނުވާ ކަމަށް ވެސް ވަކީލު ވިދާޅުވިއެވެ.