ސިއްހީ ދާއިރާ އާއި އިތުރު މުހިންމު ދާއިރާތަކުން ދެ ގައުމުގެ ދެމެދުގައިވާ ގުޅުން އިތުރަށް ބަދަހިކުރުމާ ގުޅޭގޮތުން ރާއްޖެ އާއި ކުވެއިތުން މަޝްވަރާ ކޮށްފިއެވެ.

ގަތަރުގެ ދޯހާގައި ކުރިއަށްދިޔަ 2026 ވަނަ އަހަރުގެ އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) ގެ އަހަރީ ބައްދަލުވުމުގެ ހަވާސާގައި ފިނޭންސް މިނިސްޓަރު ހަސަން ޒަރީރާއި ކުވެއިތުގެ މާލީ ވަޒީރު ޑރ. ޔައުގޫބް އަލް ސައްޔިދު އަލް ރިފާއީއާ ބައްދަލުކުރައްވައި ވަނީ މަޝްވަރާ ކުރައްވައިފައެވެ.

މި ބައްދަލުވުމުގައި ސިއްހީ ދާއިރާ އާއި ގޮނޑުދޮށް ހިމާޔަތްކުރުމުގެ ދާއިރާއިން މިހާރުވެސް ދެ ގައުމުގެ ދެމެދުގައި ކުރިއަށްދާ އެއްބާރުލުންތަކުގެ މައްޗަށް މަޝްވަރާ ކޮށްފައިވެއެވެ.

މީގެ އިތުރުން، ކުރިއަށް ރޭވިފައިވާ ތަރައްގީގެ އެކި މަޝްރޫއުތައް މެދުވެރިކޮށް، ކުވެއިތު ސަރުކާރާއި ކުވެއިތު ފަންޑް ފޯ އަރަބް އިކޮނޮމިކް ޑިވެލޮޕްމަންޓް (ކޭއެފްއޭއީޑީ) އާއެކު އޮތް ގުޅުން އިތުރަށް ހަރުދަނާކޮށް ފުޅާކުރުމަށް ހުރި ފުރުސަތުތަކާ ގުޅޭގޮތުން ވެސް ދެ ބޭފުޅުން ވަނީ މަޝްވަރާ ކުރައްވައި ހިޔާލު ބަދަލުކުރައްވައިފައެވެ.