ޗިލްޑްރަންސް އޮމްބަޑްސްޕާސަންގެ އޮފީ ހުން ވަކިކުރި ހެލްޕަރަށް އެއް ލައްކައަށްވުރެ ގިނަ ރުފިޔާ ދޭން ވަޒީފާއާބެހޭ ޓްރައި ބިއުނަލުން އަމުރުކޮށްފިއެވެ.

މި މައްސަލައަކީ ޗިލްޑްރަންސް އޮމްބަޑްސްޕާސަންގެ އޮފީހުގައި ރ. މާކުރަތު މާޒު ޝަމީމާ ހުސައިން "އޮފީސް ހެލްޕަރު" ވަޒީފާ އަދާކުރަމުން ދަނިކޮށް މައުލޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމް ކުރުމެއްނެތި ވަޒިފާއިން ވަކި ކުރި ކަމަށް ބުނެ ޝަމީމާގެ ފަރާތުން ވަޒީފާއާބެހޭ ޓްރައިބިއުނަލަށް ހުށަހެޅި މައްސަލައެކެވެ.

މި މައްސަލައިގައި ޝަމީމާގެ ފަރާތުން ޓްރައިބިއުނަލްގައި އެދުނީ އޭނާ ވަޒީފާއިން ވަކިކުރަން ނިންމީ ވަޒީފާއާބެހޭ ގާނޫނާ ހިލާފަށް ކަމަށް ކަނޑައަޅައި ދިނުމަށާއި އެ ނިންމުން ބާތިލް ކޮށްދިނުމަށާއި އޭނާ ވަކި ކުރި އިރު އަދާކުރަމުންދިޔަ ވަޒީފާއަށް އަނބުރާ ރުޖޫއަކޮށް ދިނުމަށާއި އެއްވެސް ހާލެއްގައި އޭނާއަކީ ވަޒީފާއިން ވަކިވެފައިވާ މީހެއް ކަމަށް ނުބެލުމަށެވެ.

މީގެ އިތުރުން އޭނާ ވަޒީފާއިން ވަކިކުރި ތާރީހުން ފެށިގެން ވަޒީފާގެ ކަންތައްތައް އަލުން ހަމަޖެހޭ ތާރީހާ ހަމައަށް ވަޒީފާއިން ވަކި ކުރި އިރު އަދާކުރަމުންދިޔަ މަގާމުގެ މުސާރަ އާއި އިނާޔަތްތައް ލިބިދިނުމަށާއި ނުހައްގުން ވަޒީފާއިން ވަކި ކުރުމުގެ ސަބަބުން އޭނާ ތަހައްމަލް ކުރަން ޖެހުނު ކަންތައްތަކަށާއި ނަފްސާނީ ގޮތުން ލިބުނު ގެއްލުމަށް ޝަރީއަތުން އަދުލުވެރި ބަދަލެއް ނަގައިދިނުމަށާއި މި މައްސަލައަށް އައްޔަންކުރި ގާނޫނީ ވަކީލުގެ ފީއަށް 25،000 ރުފިޔާ ނަގައިދިނުމަށް ވެސް އެދުނެވެ.

މި މައްސަލައަށް ޖަވާބުދާރީވަމުން، ޗިލްޑްރަންސް އޮމްބަޑްސްޕާސަންގެ އޮފީ ހުން ބުނެފައި ވަނީ އޭނާ ވަޒީފާއިން ވަކިކުރުމާ ބެހޭގޮތުން ހުށަހަޅާފައިވާ ކަންތައްތަކަށް އިންކާރު ކުރާ ކަމަށެވެ.

އޭނާ ވަޒީފާއިން ވަކިކުރީ ކަމާ ގުޅުންހުރި ގާނޫނުތަކާއި ގަވާއިދުތަކާ އެއްގޮތަށް މައުލޫއީ އަދުކުވެރިކަމާއި އިޖުރާއީ އަދުލުވެރިކަން ގާއިމް ކުރުމަށްފަހުގައި ކަމަށްވާތީ އޭނާ އެދިފައިވާ ފަރުވާ މި މައްސަަލައިގެ ތެރެއިން ނަގައިދޭން ޖެހޭ ގާނޫނީ ހަމައެއް ނެތް ކަމަށްވެސް ބުނެފައިވެއެވެ.

ނަމަވެސް ދެ ފަރާތުން ދެއްކި ވާހަކަތަކާއި ހުށަހެޅި ހެކިތަކަށް ބެލުމަށްފަހު، މި މައްސަލައިގައި ޓްރައިބިއުނަލުން ނިންމި ނިންމުމުގައި ވަނީ، އޭނާ ވަޒީފާއިން ވަކިކޮށްފައި ވަނީ މުވައްޒަފަކު ވަޒީފާއިން ވަކި ކުރުމުގައި ގާއިމް ކުރަންޖެހޭ މައުލޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމްކުރުމެއް ނެތި ވަޒީފާއާބެހޭ ގާނޫނާ ހިލާފަށް ކަމަށް ކަނޑައަޅާ ކަމަށެވެ.

އެހެންކަމުން އޭނާ ވަޒީފާއިން ވަކިކުރަން 25 ޖޫން 2025 ގައި ދިން ޗިޓަކީ ބާތިލް ލިއުމެއް ކަމަށްވެސް ވަނީ ކަނޑައަަޅައިފައެވެ.

ނަމަވެސް ދެ ފަރާތުގެ މަސްލަހަތަށް ބަލާއިރު އެންމެ އަދުލުވެރި ގޮތް ކަމަށް ނުފެންނާތީ އޭނާ ވަޒީފާ އަނބުރާ ރުުޖޫއަ ކުރާނެ ފަދަ އަމުރެއް ނެރެ އޭނާއަށް ވަޒީފާ ދޭން އަންގާނެ ހަމައެއް ނެތް ކަމަށްވެސް ވަނީ ކަނޑައަޅައިފައެވެ.

އެހެންކަމުން އޭނާ ވަޒީފާއިން ވަކި ކުރުމުގައި މައުލޫއީ އަދުކުވެރިކަމާއި އިޖުރާއީ އަދުލުވެރިކަން ގާއިމްކޮށްފައި ނުވާ ސަބަބަށްޓަކައި އުޖޫރައިގެ ގޮތުގައި އޭނާއަށް ލިބެމުންދިޔަ 12،000 ރުފިޔާގެ ނިސްބަތުން ޓްރައިބިއުނަލުން ކަނޑައެޅީ 12 މަސް ދުވަހުގެ އުޖޫރައަށްވާ ޖުމްލަ 144،000 ރުފިޔާ ގެއްލުމުގެ ބަދަލުގެ ގޮތުގައި ޝަމީމާ ހުސައިން އަށް ނަގައިދިނުމަށެވެ.

އެހެންކަމުން އެ ފައިސާ 30 ދުވަހުގެ ތެރޭގައި އެއްފަހަރާ ތިން ދުވަހުގެ ތެރޭގައި ޝަމީމާ ހުސައިން އަށް ދިނުމަށްފަހު ތިން ދުވަހުގެ ތެރޭގައި އެކަން ވަޒީފާއާބެހޭ ޓްރައިބިއުނަލަށް އެންގުމަށް ޗިލްޑްރަންސް އޮމްބަޑްސްޕާސަންގެ އޮފީހަށް ވަނީ އަމުރުކޮށްފައެވެ.