މަޝްހޫރު އެކްޝަން ތަރި ޖެކީ ޗޭން މަރުވެއްޖެ ކަމަށް ބުނެ ސޯޝަލް މީޑިއާގައި ފަތުރެމުންދާ ހަބަރުތަކަކީ ދޮގެއް ކަމަށް ރިޕޯޓުކޮށްފިއެވެ. އުމުރުން 72 އަހަރުގެ ޗައިނާގެ އެކްޓަރުގެ ހާލު ރަނގަޅު ކަމަށާއި، އޭނާ އަދިވެސް އަންނަނީ ފިލްމީ މަސައްކަތްތަކުގައި ހަރަކާތްތެރިވަމުން ކަމަށް ހިންދުސްތާން ޓައިމްސްއާއި ނިއުސްވީކް ފަދަ މީޑިއާތަކުން ވަނީ ރިޕޯޓުކޮށްފައެވެ.

މިދިޔަ ދުވަސްތަކުގައި ފޭސްބުކް އަދި އެކްސްގައި ވަނީ ޖެކީ ޗޭން މަރުވެފައިވާ ކަމަށް ބުނެ ގިނަ ޕޯސްޓުތަކެއް ދައުރުވެފައެވެ. މި ޕޯސްޓުތަކުގައި "1954-2026" ޖަހާފައިވާ ފޮޓޯތަކެއް ހިމަނާފައިވާއިރު، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ހަދާފައިވާ، ހޮސްޕިޓަލު އެނދެއްގައި އޭނާ އޮންނަ މަންޒަރު ފެންނަ ފޭކު ފޮޓޯތަކެއް ވެސް ވަނީ އާންމުކޮށްފައެވެ.

މީގެ އިތުރުން، ފިލްމު ކުޅުމުގެ ތެރޭގައި ލިބުނު އަނިޔާތަކެއްގެ ސަބަބުން އޭނާ މަރުވި ކަމަށް ބައެއް ޕޯސްޓުތަކުގައި ބުނެފައިވެއެވެ. ނަމަވެސް މިއީ އެއްވެސް ހަގީގަތެއް އެކުލެވިގެންވާ ވާހަކަތަކެއް ނޫން ކަމަށް ފެކްޓް ޗެކްކުރާ ފަރާތްތަކުން ފާހަގަކުރެއެވެ.

ޖެކީ ޗޭންގެ އާއިލާއިން ނުވަތަ އޭނާގެ ރަސްމީ ޓީމުން ވެސް އޭނާގެ ސިއްހީ ހާލަތާ ގުޅޭ ގޮތުން އިތުރު ހަބަރެއް ދީފައެއް ނުވެއެވެ. އޭނާ އެންމެ ފަހުން އާންމުންގެ ތެރެއިން ފެނިފައިވަނީ 2026 ވަނަ އަހަރުގެ ޖުލައި މަހުގައެވެ. މީގެ ކުރިން 2025 ވަނަ އަހަރު ވެސް މިފަދަ ދޮގު ހަބަރުތަކެއް ފެތުރުނުއިރު، އޭރު ޖެކީ ޗޭން ބުނެފައިވަނީ އޭނާގެ ހާލު ރަނގަޅު ކަމަށާއި އެފަދަ ހަބަރުތައް ގަބޫލު ނުކުރުމަށް އެދޭ ކަމަށެވެ.

މިފަހަރުގެ ހަބަރުތަކާ ގުޅިގެން ގިނަ ބަޔަކު ކަންބޮޑުވުން ފާޅުކޮށްފައިވީ ނަމަވެސް، ޖެކީ ޗޭންގެ ރަސްމީ ފަރާތްތަކުން މިހާތަނަށް މިކަމާ ގުޅޭ ގޮތުން ވަކި އެއްޗެއް ބުނެފައެއް ނުވެއެވެ.