ރަސްމާލެ މަޝްރޫއުގެ ތެރެއިން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ހަދާފައިވާ އެއްބަސްވުން ގާނޫނުއަސާސީއާ ހިލާފުކަމަށް ބުނެ، އެ އެއްބަސްވުން ބާތިލުކުރުމަށް އެދި ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފިއެވެ.

މި މައްސަލަ ސުޕްރީމް ކޯޓަށް ހުށަހެޅީ ރައްޔިތުންގެ މަޖިލީހުގެ ކެންދޫގެ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިންއެވެ. މި މައްސަލަ ހުށަހަޅާފައިވަނީ މިމަހުގެ 21 ވަނަ ދުވަހު މިނިސްޓްރީ އޮފް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓުން އީގަލްސް ހިލްސްއާއެކު ވެފައިވާ އެއްބަސްވުމަކާ ގުޅިގެންނެވެ.

އަލީ ހުސައިން އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ މި އެއްބަސްވުމުގެ ފުރިހަމަ ތަފުސީލު ސަރުކާރުން ހާމަނުކުރި ނަމަވެސް، ލިބިފައިވާ މައުލޫމާތުތަކަށް ބަލާއިރު ރަސްމާލެއިން ހިއްކާ 500 ހެކްޓަރަށް ވުރެ ބޮޑު ސަރަހައްދެއް އެއްވެސް އަގަކާ ނުލައި އަދި ކުއްޔެއްވެސް ނުނަގާ ގޮތަށް 99 އަހަރަށްވަނީ އީގަލް ހިލްސްއަށް ދޫކޮށްފައި ކަމަށެވެ.

އަދި އެ ބިމުގައި ތަރައްގީކުރާ ތަންތަން އެހެން ފަރާތްތަކަށް ކުއްޔަށް ދިނުމުގެ ބާރު (ރޯލިން ލީސް)ވެސް އެ ކުންފުންޏަށްވަނީ ދީފައެވެ.

ސުޕްރީމް ކޯޓަށް ހުށަހެޅި މައްސަލައިގައި ބަޔާންކޮށްފައިވަނީ، ގާނޫނުއަސާސީގެ 250 ވަނަ މާއްދާގައި ދައުލަތުގެ މުދަލާއި މިލްކިއްޔާތު ދޫކުރަންވާނީ ގާނޫނުގައިވާ ގޮތުގެ މަތިންކަމަށް ބަޔާންކޮށްފައި އޮތް ނަމަވެސް، ބޭރުގެ ފަރާތަކަށް އެއްފަހަރާ 99 އަހަރަށް ބިން ދެވޭނެ ގާނޫނީ އޮނިގަނޑެއް ރާއްޖޭގައި ނެތް ކަމަށެވެ. އެހެންކަމުން މިއީ ސީދާ ގާނޫނުއަސާސީއާ ހިލާފަށް ކޮށްފައިވާ ކަމެއްކަމަށްވަނީ ފާހަގަކޮށްފައެވެ.

ހަމައެއާއެކު، ބޭރުގެ ފަރާތްތަކަށް ރާއްޖޭގެ ބިން ކުއްޔަށް ދެވޭނެ އެންމެ ދިގު މުއްދަތަކީ 99 އަހަރުކަމަށް ގާނޫނުއަސާސީގެ 251 ވަނަ މާއްދާގައި ބަޔާންކޮށްފައި އޮތް ނަމަވެސް، މި އެއްބަސްވުމުގެ ދަށުން ތިންވަނަ ފަރާތްތަކަށް ބިން ދޫކުރުމުގެ ހައްގު ދީފައި އޮތުމަކީ، ދާއިމީކޮށް ބޭރުގެ ފަރާތްތަކަށް ބިމުގެ މިލްކުވެރިކަން ލިބިގެންދާނެ ކަމެއްކަމަށްވެސް މައްސަލައިގައި ބަޔާންކޮށްފައިވެއެވެ.

އެހެންވެ، މި އެއްބަސްވުމަކީ ފެށުނީއްސުރެ ބާތިލު އެއްޗެއްގެ ގޮތުގައި ކަނޑައަޅައިދިނުމަށް ވަނީ އެދިފައެވެ.

މީގެއިތުރުން، މި މައްސަލައިގައި ޝަރީއަތުން ވަކި ގޮތެއް ކަނޑައަޅަންދެން އެއްބަސްވުމަށް އަމަލުކުރުން މަޑުޖައްސައިލުމުގެ ވަގުތީ އަމުރަކަށްވެސްވަނީ އެދިފައެވެ. އެއީ ތިންވަނަ ފަރާތްތަކުގެ ހައްގުތަކެއް އުފެދި، އޭގެ ސަބަބުން ދައުލަތަށް އިއާދަނުކުރެވޭ ފަދަ ބޮޑެތި މާލީ އަދި ގާނޫނީ ގެއްލުންތަކެއް ލިބިދާނެތީ އެކަން ހުއްޓުވުމަށެވެ.