މިދިޔަ އޮގަސްޓް މަހު ރާއްޖޭގެ ބާޒާރުގައި މުދަލާއި ހިދުމަތުގެ އަގުތައް މިންކުރާ ކޮންސިއުމާ ޕްރައިސް އިންޑެކްސް (ސީޕީއައި) ދަށަށް ގޮސްފައިވާކަމަށް މޯލްޑިވްސް ބިއުރޯ އޮފް އެސްޓެޓިސްޓިކްސް (އެމްބީއެސް)ން ބުނެފިއެވެ.

އެމްބީއެސްގެ ތަފާސްހިސާބުތަކުން ދައްކާ ގޮތުގައި، ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ ޖުމްލަ ސީޕީއައި ވަނީ 1.15 ޕަސެންޓު ދަށްވެފައެވެ. މި ބަދަލު އައުމުގައި އެންމެ ބޮޑު ދައުރެއް އަދާކުރީ ކަރަންޓުގެ ހިދުމަތުގެ އަގު 3.21 ޕަސެންޓު އަދި ވައިގެ ދަތުރުފަތުރުގެ އަގު 2.80 ޕަސެންޓު ހެޔޮވުމެވެ.

މީގެއިތުރުން، ދުންފަތުގެ ބާވަތްތަކުގެ އަގަށް ވަނީ 25.45 ޕަސެންޓުގެ ބޮޑު ހެޔޮވުމެއް އައިސްފައެވެ. ސަރަހައްދުތަކަށް ވަކިން ބަލާއިރު، މާލޭގެ އަގުތަކުގެ އިންޑެކްސް 1.57 ޕަސެންޓު ދަށްވި އިރު، އަތޮޅުތެރޭގައި ސީޕީއައި ދަށަށް ގޮސްފައިވަނީ 0.54 ޕަސެންޓުންނެވެ.

ޖުމްލަ އިންޑެކްސް ދަށަށް ދިޔަ ކަމުގައި ވިޔަސް، އާންމު ދިރިއުޅުމަށް ބޭނުންވާ ބައެއް އަސާސީ މުދަލާއި ހިދުމަތްތަކުގެ އަގު އޮގަސްޓް މަހު ވަނީ އުފުލިފައެވެ.

އެގޮތުން:

  • ކިރާއި ބިހުގެ ބާވަތްތަކުން: 1.99 ޕަސެންޓު
  • މޭވާ އަދި ތަރުކާރީން: 1.19 ޕަސެންޓު
  • މަހުގެ ބާވަތްތަކުން: 0.83 ޕަސެންޓު
  • ގެސްޓްހައުސް ހިދުމަތްތަކުން: 2.72 ޕަސެންޓު
  • މުވާސަލާތީ ހިދުމަތްތަކުން: 2.23 ޕަސެންޓު
  • ސިއްހީ ހިދުމަތްތަކުން: 0.99 ޕަސެންޓު
  • ކެފޭ/ރެސްޓޯރެންޓު އަދި ހޮޓާތަކުގެ އަގުތަކުން: 0.68 ޕަސެންޓު

މަހުން މަހަށް ބަލާއިރު އަގުތަކަށް ހެޔޮ ބަދަލެއް އައި ނަމަވެސް، މިދިޔަ އަހަރުގެ މި މުއްދަތާ އަޅާބަލާއިރު ރާއްޖޭގެ އަގުތައް އަދިވެސް ހުރީ 0.76 ޕަސެންޓު މަތީގައެވެ.

އާންމު ރައްޔިތުންގެ ދިރިއުޅުމުގެ އަގުތަކަށް އަންނަ ލުއިފަސޭހަތަކާއި އުފުލުންތައް ވަޒަންކުރުމަށްޓަކައި، އެމްބީއެސް އިން ކޮންމެ މަހަކުވެސް މާލެ އާއި ރަށްރަށުން 9,500 އަށް ވުރެ ގިނަ މުދަލާއި ހިދުމަތުގެ އަގުތައް އެއްކޮށް ދިރާސާ ކުރެއެވެ.