ވޯލްޑް ޓްރެވަލް އެވޯޑްސްގެ އިންޑިއާ ކަނޑުގެ ކެޓަގަރީން ލީޑިން އެއާޕޯޓްގެ އެވޯޑް ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ލިބިއްޖެއެވެ.

ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސްރޯޑްސް މޯލްޑިވްސްގައި ރޭ ބޭއްވި "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026" ގައި ވީއައިއޭގެ ފަރާތުން މި އެވޯޑާ ހަވާލުވެވަޑައިގަތީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދެވެ.

މިއީ އިންޑިއަން އޯޝަންގެ ލީޑިން އެއާޕޯޓުގެ އެވޯޑް ވީއައިއޭ އިން ކާމިޔާބު ކުރި 13 ވަނަ ފަހަރެވެ.

މި އެވޯޑަށް ވީއައިއޭގެ އިތުރުން މަޑަގަސްކަރައިގެ އިވާޓޯ އިންޓަނޭޝަނަލް އެއާޕޯޓާއި ރީޔޫނިއަންގެ ރޯލަންޑް ގަރޯސް އެއާޕޯޓާއި ސީޝެލްސް އިންޓަނޭޝަނަލް އެއާޕޯޓް އަދި މޮރިޝަސްގެ ސަ ސީވޫސަގުރް ރާމްގޫލަމް އިންޓަނޭޝަނަލް އެއާޕޯޓް ވާދަކޮށްފައިވެއެވެ.

28 ސެޕްޓެމްބަރު 2026، ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސްރޯޑްސް މޯލްޑިވްސްގައި ރޭ ބޭއްވި "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026" ގެ ތެރެއިން-- ފޮޓޯ: އެމްއޭސީއެލް

އެމްއޭސީއެލުން މިއަދު ބުނީ ވީއައިއޭއަށް މި އެވޯޑު ލިބުމަކީ، އެއާޕޯޓުގެ އޮޕަރޭޝަންތަކާއި ދަތުރުވެރިންނަށް ފޯރުކޮށްދޭ ހިދުމަތްތައް ދެމެހެއްޓެނިވި ގޮތެއްގައި ކުރިއަރަމުން އަންނަކަމުގެ ހެއްކެއް ކަމަށެވެ. އަދި މިއީ ރާއްޖެއަށް ޒިޔާރަތް ކުރާ ފަތުރުވެރިންނަށާއި އެންމެހާ ދަތުރުވެރިންނަށް އެންމެ މަތީ ފެންވަރުގެ ހިދުމަތެއް ފޯރުކޮށްދިނުމަށް ކުރަމުންދާ މަސައްކަތްތަކަށާއި ގައުމީ ފަތުރުވެރިކަމުގެ ސިނާއަތަށް ލިބުނު ފަހުރުވެރި ކާމިޔާބީއެއް ކަމަށް ވެސް ބުންޏެވެ.

މި ކާމިޔާބީ ފާހަގަކުރައްވަމުން އެމްއޭސީއެލްގެ ސީއީއޯ އިބްރާހީމް ޝަރީފް ވިދާޅުވީ، މިއީ މުވައްޒަފުން ކުރި ބުރަ މަސައްކަތާއި ވީއައިއޭގެ ތަރައްގީއަށް ގެންނަމުންދާ ހެޔޮ ބަދަލުތަކުގެ އިތުރުން ޕާޓްނަރުންގެ ފަރާތުން ލިބޭ އަގުހުރި އެއްބާރުލުމުގެ ނަތީޖާ ކަމަށެވެ. އަދި ރާއްޖޭގެ މައި ދޮރާށީގެ ހައިސިއްޔަތުން، ހިދުމަތުގެ ފެންވަރު މަތިކޮށް، ދަތުރުވެރިންގެ ތަޖުރިބާ އިތުރަށް ފުރިހަމަކުރުމާ އެކު، ވީއައިއޭއަކީ ބައިނަލްއަގުވާމީ ފެންވަރުގައި ވާދަ ކުރެވޭނެ ޒަމާނީ އެއާޕޯޓަކަށް ހެދުމަށް އަބަދުވެސް އިސްކަންދެއްވާނެ ކަމަށް އޭނާ ވިދާޅުވިއެވެ.

އެމްއޭސީއެލުން ބުނީ ވީއައިއޭގެ އުމްރާނީ ތަރައްގީ އާއި ހިދުމަތްތައް ފުޅާކުރުމުގެ މަސައްކަތްތައް މެދުކެނޑުމެއްނެތި ކުރިއަށްދާ އިރު، ދަތުރުވެރިންގެ ތަޖުރިބާ އިތުރަށް ފުރިހަމަކުރުމަށްޓަކައި ޓާމިނަލްގެ އެކި ސަރަހައްދުތަކަށް ޒަމާނީ އާ ވަސީލަތްތަކާއި ހިދުމަތްތައް އިތުރުކުރެވެމުންދާ ކަމަށެވެ. މިގޮތުން ގެނެވޭ ހެޔޮ ބަދަލުތަކާއެކު، އޮޕަރޭޝަންތައް އިތުރަށް ހަރުދަނާވެ، އެއާޕޯޓުން ހިދުމަތް ހޯދާ ކޮންމެ ދަތުރުވެރިއަކަށްވެސް ލުއިފަސޭހަ އަދި ހިތްފަސޭހަ މާހައުލެއް ކަށަވަރުވެގެންދާނެ ކަމަށް ވެސް ބުންޏެވެ.