ހޮޓެލް އޭޝިއާ އެގްޒިބިޝަންގައި އެސްޓީއޯއިން ބައިވެރިވެއްޖެ، މާދަމާ އާ ބްރޭންޑެއް ތައާރަފުކުރަނީ

މިއަދުން ފެށިގެން ހުޅުމާލޭ ސިންތެޓިކް ޓްރެކްގައި ކުރިއަށްދާ "ހޮޓެލް އޭޝިއާ 2026" އެގްޒިބިޝަންގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ބައިވެރިވެއްޖެއެވެ.

އެސްޓީއޯއިން މިއަދު ނެރުނު ނޫސްބަޔާނުގައި ބުނި ގޮތުގައި، މިއަހަރުގެ އެގްޒިބިޝަންގައި އެ ކުންފުނީގެ ސްޓޯލް މައިގަނޑު ގޮތެއްގައި ހާއްސަކޮށްފައިވަނީ އެސްޓީއޯ ޖެނެރަލް ޓްރޭޑިން، އެސްޓީއޯ ޕީޕަލްސް ޗޮއިސް އަދި އެސްޓީއޯ އެނާޖީއަށެވެ. މި އެގްޒިބިޝަން ކުރިއަށްދާނީ އަންނަ ބުދަ ދުވަހުގެ ނިޔަލަށެވެ.

އެސްޓީއޯއިން ފާހަގަކޮށްފައިވާ ގޮތުގައި، އެ ކުންފުނީގެ ސްޓޯލްގައި ޕީޕަލްސް ޗޮއިސް ސުޕާމާކެޓުން ލިބެން ހުންނަ ބައެއް ޕްރޮޑަކްޓްތައް ބޭނުންކޮށްގެން ވަގުތުން ލުއި ކާނާ ތައްޔާރުކުރާ ސްޓޭޝަނެއް ހުންނާނެއެވެ. މީގެ އިތުރުން، އެގްޒިބިޝަން ކުރިއަށްދާ ތިން ދުވަހުވެސް ކޮފީސްޓޭޓްގެ ވަކި ބުއިންތަކެއް ސްޓޯލަށް ޒިޔާރަތްކުރާ ފަރާތްތަކަށް ހިލޭ ލިބޭނެ އިންތިޒާމު ވަނީ ހަމަޖައްސައިފައެވެ.

އެސްޓީއޯއިން މާދަމާ އާ ބްރޭންޑެއް ތައާރަފުކުރުމަށް ނިންމާފައިވާ އިރު، މި އާ ޕްރޮޑަކްޓް ބޭނުންކޮށްގެން ތައްޔާރުކުރާ އައިސްކްރީމާއި ފޮނިކާތަކެތީގެ ރަހަ ބެލުމުގެ ފުރުސަތުވެސް ސްޓޯލުން ލިބޭނެއެވެ. ހަމައެއާއެކު، އެސްޓީއޯ އެނާޖީގެ ފަރާތުން ރިސޯޓު ކަސްޓަމަރުންނަށް ހާއްސަކޮށްގެން ތެޔޮ އުފުލައިދިނުމުގައި އެ ކުންފުނިން ފޯރުކޮށްދޭ ހިދުމަތްތަކުގެ މައުލޫމާތު ހިއްސާކުރުމާއި، މި މާކެޓުގައި ކަސްޓަމަރުންގެ ޑިމާންޑުތައް ހުރި ގޮތް ބެލުމުގެ މަސައްކަތް ކުރިއަށްގެންދާނެ ކަމަށްވެސް އެ ބަޔާނުގައި ބުނެފައިވެއެވެ.

އެގްޒިބިޝަނަށް ޒިޔާރަތްކުރާ ފަރާތްތަކަށް ހާއްސަކޮށްގެން އެސްޓީއޯއިން ވަނީ ޕްރޮމޯޝަނަލް ހަރަކާތްތަކެއްވެސް ރާވައިފައެވެ. އެގޮތުން، ސްޓޯލްގައި ރަޖިސްޓްރީކުރާ ފަރާތްތަކުގެ މެދުގައި "ރެޖިސްޓާ އެންޑް ވިން" ގެ ނަމުގައި ކުރިއަށްގެންދާ ހަރަކާތުން ކޮންމެ ދުވަހަކުވެސް ގުރުއަތުން ހޮވޭ ނަސީބުވެރިއަކަށް އިނާމު ދިނުމަށް ވަނީ ހަމަޖެހިފައެވެ. އަދި "ފޮލޯ އެންޑް ވިން" ހަރަކާތުގެ ދަށުން އެސްޓީއޯ ޕީޕަލްސް ޗޮއިސް ޕޭޖް ފޮލޯކުރާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް ޑިޝްވޮޝަރެއް ލިބުމުގެ ފުރުސަތު ހުޅުވާލާފައިވެއެވެ.

މި ހަރަކާތްތަކުގެ އިތުރުން، އަސާސީ ކާބޯތަކެއްޗާއި އެސްޓީއޯ އިލެކްޓްރޯނިކްސްގެ ބައެއް ސާމާނު ސްޓޯލްގައި ޑިސްޕްލޭކޮށް، އެ ކުންފުނިން އެތެރެކުރާ ޕްރޮޑަކްޓްތަކުގެ މައުލޫމާތު ފޯރުކޮށްދޭނެ ކަމަށް އެސްޓީއޯއިން ބުނެއެވެ.