ދިވެހިރާއްޖޭގެ އިސްލާމީ ޔުނިވާސިޓީ (އައިޔޫއެމް) ގެ ސެންޓާ ފޯ ޕޯސްޓްގްރެޖުއޭޓް ސްޓަޑީޒްގެ ދަރިވަރުން އިސްނަގައިގެން ބާއްވާ "ރިވެލި 2026" މުބާރާތް ކާމިޔާބުކަމާއެކު ނިންމާލައިފިއެވެ.

މި މުބާރާތް ކުރިއަށް ގެންގޮސްފައިވަނީ މިދިޔަ ހޮނިހިރު ދުވަހުގެ ހެނދުނު 9:00 އިން ފެށިގެން ހަވީރު 5:00 އަށް އައިޔޫއެމްގެ ހޯލުގައެވެ. 2023 ވަނަ އަހަރު ބާއްވަން ފެށި ރިވެލި ހަރަކާތް ބޭއްވި މިއީ ހަތަރު ވަނަ އަހަރެވެ.

އައިޔޫއެމުން މިއަދު ބުނީ ރިވެލި ހަރަކާތުގެ މަގުސަދަކީ، ދަރިވަރުންގެ މެދުގައި ދިރާސާ ކުރުމުގެ ރޫހެއް އުފައްދައި ދިރާސާ ކުރުމަށް އަހުލުވެރި ކުރުން ކަމަށެވެ. އަދި ޕޯސްޓްގުރެޖުއޭޓް ދަރިވަރުންގެ ތެރެއިން ދިރާސާ ހަދާ ދަރިވަރުންގެ ޕްރޮޕޯސަލް ޑިފެންސްއަށް ތައްޔާރުވުމަށް އެހީވުމާއި ތީސީސް ނިންމާ ދަރިވަރުންގެ ވައިވާއަށް ތައްޔާރުވުމަށް އެހީވުން ވެސް ހިމެނެއެވެ.

26 ސެޕްޓެމްބަރު 2026، މާލެ، އައިޔޫއެމްގެ ސެންޓާ ފޯ ޕޯސްޓްގްރެޖުއޭޓް ސްޓަޑީޒްގެ ދަރިވަރުން އިސްނަގައިގެން ބޭއްވި "ރިވެލި 2026" މުބާރާތް --- ވަން ފޮޓޯ: ހަމްދާން އަހުމަދު

މި މުބާރާތް މައިގަނޑު ދެ ގިންތިއަކަށް ބަހާލެވިފައިވެއެވެ. ޕްރޮޕޯސަލް ޕިޗްގައި ހަ ދަރިވަރަކު އަދި 3-މިނިޓް ތީސީސްގައި ތިން ދަރިވަރަކު ބައިވެރިވެފައިވެއެވެ. އައިޔޫއެމްގެ އިތުރުން އެހެން ޔުނިވާސިޓީ އަދި ކޮލެޖްތަކަށް ވެސް ހުޅުވާލައިގެން ކުރިއަށް ގެންދިޔަ މި މުބާރާތުގައި ވިލާކޮލެޖްގެ ދަރިވަރުން ބައިވެރިވެފައިވާ ކަމަށްވެސް އެ ޔުނިވާސިޓީން ބުންޏެވެ.

މި ދެ މުބާރާތުގެ ތެރެއިން ކޮންމެ މުބާރާތަކުން ވެސް 1 ވަނައަށް 5،000 ރުފިޔާ، 2 ވަނައަށް 2،500 އަދި 3 ވަނައަށް 1،000 ރުފިޔާ ދީފައިވެއެވެ.

3-މިނިޓް ތީސީސް މުބާރާތުގެ 1 ވަނަ އައިޔޫއެމްގެ ޕީއެޗްޑީ އިން އެޑިޔުކޭޝަންގެ ދަރިވަރު ހަދީޖާ މުހައްމަދު ސަމީރު ކާމިޔާބުކޮށްފައިވާ އިރު، 2 ވަނަ ލިބިފައިވަނީ ވިލާ ކޮލެޖްގެ މާސްޓާސް އޮފް އެޑިޔުކޭޝަން އިން ލީޑާޝިޕް އެންޑް މެނޭޖްމަންޓް ކިޔަވަމުން އަންނަ ޒައިނާ އަހުމަދު ހަމީދަށެވެ. އަދި 3 ވަނަ ލިބިފައިވަނީ އައިޔޫއެމްގެ މާސްޓާ އޮފް ޓީޗިން އެންޑް ލާނިން އިސްލާމިކް އެޑިޔުކޭޝަންގެ ދަރިވަރު ފާތިމަތު ނަޒީފާ އަހުމަދެވެ.

26 ސެޕްޓެމްބަރު 2026، މާލެ، އައިޔޫއެމްގެ ސެންޓާ ފޯ ޕޯސްޓްގްރެޖުއޭޓް ސްޓަޑީޒްގެ ދަރިވަރުން އިސްނަގައިގެން ބޭއްވި "ރިވެލި 2026" މުބާރާތް --- ވަން ފޮޓޯ: ހަމްދާން އަހުމަދު

ޕްރޮޕޯސަލް ޕިޗް މުބާރާތުގެ 1 ވަނަ އައިޔޫއެމްގެ ޕީއެޗްޑީ އިން މެނޭޖްމަންޓް އެންޑް ލީޑާޝިޕްގެ ދަރިވަރު އަހުމަދު ޒަކީއަށް ލިބިފައިވާ އިރު، 2 ވަނަ ލިބިފައިވަނީ އައިޔޫއެމްގެ މާސްޓާ އިން ރިސާޗް އެންޑް ޕަބްލިކޭޝަންގެ ދަރިވަރު މަރިޔަމް ޝުއާ ހަމީދަށެވެ. އަދި 3 ވަނަ ލިބިފައިވަނީ އައިޔޫއެމްގެ މާސްޓާ އޮފް ބިޒްނަސް މެނޭޖްމަންޓްގެ ދަރިވަރު އަސްމާ އިސްމާއީލަށެވެ.

މި މުބާރާތްތަކުގެ އިތުރުން، އޯޑިއަންސްގެ ބައިވެރިވުން ހިމެނޭގޮތަށް ދިރާސީ ކުއިޒްތަކެއް ވެސް ކުރިއަށް ގެންގޮސްފައިވާ އިރު، ވަނަ ލިބުނު ފަރާތްތަކަށް އިނާމުދީފައިވެއެވެ.

މީގެ އިތުރުން ރިސާޗް، އިނޮވޭޝަން، މޯޓިވޭޝަން (ރިމް ޓޯކް)ގެ ހަރަކާތުގައި ޑރ. އައިޝަތު އެލީނާ، ދަރިވަރުންނާ މުހާތަބުކޮށް، އެބޭފުޅާގެ އިލްމީ ދަތުރު ހިއްސާ ކުރައްވާފައިވާ ކަމަށް ވެސް އައިޔޫއެމްއިން ބުންޏެވެ.