ސ. ހިތަދޫ، ވަރުދީގޭ އަހުސަން ބަޝީރުގެ ކަރަށް ހަމަލާދީ މަރާލި މައްސަލައިގައި ގ. ކޯޒީ، އިބްރާހިމް ޝަހުމް އާދަމަށް ހައިކޯޓުން އިއްވި މަރުގެ ހުކުމުގެ ސައްހަކަން ކަށަވަރުކުރަން ދައުލަތުން ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުންތައް މިއަދު ނިންމާލައިފިއެވެ.

މަޖިދީ މަގާއި އަލިކިލެގެފާނު މަގު ގުޅުނު ހިސާބުގައި 2011 ވަނަ އަހަރުގެ އޭޕްރީލް މަހު ބަޝީރުގެ ކަރަށް ހަމަލާދީ މަރާލި މައްސަލައިގައި ޝަހުމަށް ހައިކޯޓުން މަރުގެ ހުކުމްކުރީ 2021 ވަނަ އަހަރުގެ އޮކްޓޫބަރު މަހުގެ ތެރޭގައެވެ. ހުކުމުގެ ސައްހަކަން ކަށަވަރުކުރަން ދައުލަތުން ސުޕްރީމް ކޯޓަށް ހުށަހެޅީ ޝަހުމްގެ ފަރާތުން އެ މައްސަލަ އިސްތިއުނާފު ނުކުރުމުންނެވެ.

މިއަދު ބޭއްވި އަޑުއެހުމުގައި ދައުލަތުގެ ފަރާތުން ސީނިއާ ޕަބްލިކް ޕްރޮސިކިއުޓާ މަރިޔަމް ޝަހުމާ ވިދާޅުވީ، މީގެ ކުރިން ސުޕްރީމް ކޯޓުން ނިންމާފައިވަނީ ގަރީނާތަކުގެ މައްޗަށް ވެސް ކުށް ސާބިތުކުރެވި، މަރުގެ އުގޫބާތް ކަނޑައެޅިދާނެ ކަމަށެވެ. އަދި އޭރުގެ ހާލަތަކާއި މިހާރު ވަކި ތަފާތު ކަމަށް ދައުލަތުން ނުދެކޭ ކަމަށް އޭނާ ފާހަގަކުރެއްވިއެވެ.

ހެއްކާ ބެހޭ ގާނޫނުގެ 141 ވަނަ މާއްދާ އާއި 142 ވަނަ މާއްދާއަށް ރިއާޔަތްކޮށް ޝަހުމާ ވިދާޅުވީ، "މިހާރުވެސް އެ އުސޫލުތަކުގެ ބޭނުން ހިފައިގެން، ލޮލަށް ފެނުނު ދެ ފިރިހެނުންގެ ހެކިބަސް ނެތަސް ނުވަތަ އިއުތިރާފު ނެތަސް، ކުށް ސާބިތުވެ މަރުގެ އުގޫބާތް ކަނޑައެޅުމަށް އެގޮތަށް ހުރަހެއް އޮތް ކަމަކަށް ދައުލަތުން ނުދެކެން" ކަމަށެވެ.

ޝަހުމްގެ ގާނޫނީ ވަކީލު އައިޝަތު ޝިފްނީ ވިދާޅުވީ، އިސްލާމްދީނުގެ އަސްލަކު ގިސާސްގެ މައްސަލަތަކުގައި ހެކީގެ ވަކި ނިސާބެއް ބަޔާންކުރެވިފައި ނުވާ ކަމަށެވެ. ގާނޫނުއަސާސީގެ 10 ވަނަ މާއްދާ މާނަކުރަނީ އިސްލާމްދީނުގެ އަސްލަކާ ހިލާފުވާ ގޮތަށް ގާނޫނު ނުހެދުމަށް ކަމަށާއި، ގިސާސް ހިފުމުގެ ކުރިން މަދުވެގެން ދެ ހެކިން ބޭނުންވާނެ ކަމަށް ކަނޑައެޅުމަކީ އިސްލާމްދީނުގެ އެއްވެސް އަސްލަކާ ހިލާފު ކަމެއްތޯ އޭނާ ސުވާލު އުފެއްދެވިއެވެ. އަދި ހެއްކާބެހޭ ގާނޫނުގެ 140 ވަނަ މާއްދާގެ (ނ) ހެދިފައިވަނީ އިސްލާމްދީނުގެ ކޮން އަސްލަކާ ހިލާފަށްކަން ދައުލަތުން ބަޔާންކޮށްދޭން ޖެހޭނެ ކަމަށް ވެސް ޝިފްނީ ފާހަގަކުރެއްވިއެވެ.

ހެއްކާބެހޭ ގާނޫނުގެ 141 ވަނަ މާއްދާއާ ގުޅޭގޮތުން ޝިފްނީ ވިދާޅުވީ، އެ މާއްދާގައި ބަޔާންކުރަނީ ކަމެއް ސާބިތުކުރުމަށް ހެކިބަސްދޭ މީހުންގެ ވަކި އަދަދަކަށް ބޭނުންވާނެ ކަމަށް އިސްލާމްދީނުގެ އަސްލެއްގައި ކަނޑައެޅިފައިވާ ނަމަ، އެ އަދަދަކަށް ހެކިބަސްދޭ މީހުން ބޭނުންވާނެ ކަމަށެވެ. ނަމަވެސް ދައުލަތުން އެ މާއްދާ މާނަކުރަނީ އިސްލާމްދީނުގެ އަސްލެއްގައި ކަނޑައަޅާފައިނުވާ ނަމަ، ވަކި އަދަދެއްގެ ހެކިވެސް ބޭނުން ނުވާނެ ކަމަށް ކަމަށާއި، އެއީ ރަނގަޅު މާނަކުރުމެއް ނޫން ކަމަށް އޭނާ ފާހަގަކުރިއެވެ. އަދި 142 ވަނަ މާއްދާއާ ގުޅޭގޮތުން ވިދާޅުވީ، "އިސްލާމީ ޝަރީއަތުގައި އަސްލެއްގައި ފިރިހެނުންނާއި އަންހެނުން ވަކި މިންވަރެއް އިންނަން ޖެހޭ ކަމަށްވަނީ ނަމަ، އިންނަން ޖެހޭނީ އެ މިންވަރަށް، އެހެންނޫން ހާލަތުގައި އަންހެނުންނާއި ފިރިހެނުންގެ ހެކިބަސް ހަމަހަމަ" ކަމަށެވެ.

ދައުލަތުން ބުނާގޮތަށް އެންމެ ހެކިވެރިއެއްގެ ހެކިބަހުން ގިސާސްގެ މައްސަލައެއް ސާބިތުވާނެ ކަމަށް ގަބޫލު ނުކުރާ ކަމަށް ޝިފްނީ ވިދާޅުވިއެވެ. އޭނާ ފާހަގަކުރެއްވި ގޮތުގައި މަދަނީ މައްސަލަތަކުގައި ދެ ހެކިވެރިންގެ ހެކިބަސް ބޭނުންވާ އިރު، އެންމެ ހަރުކަށި އަދަބު ހިމެނޭ ގިސާސްގެ މައްސަލަތަކުގައި އެއަށްވުރެ ވަރުގަދަ ހެކިބަސް ލިބެން ޖެހޭނެއެވެ. އެހެންކަމުން، ހައިކޯޓުން މި މައްސަލަ ނިންމާފައިވަނީ މަރުގެ އަދަބު ތަންފީޒުކުރުމަށް އޮންނަ ސާބިތުކުރުމުގެ މިންގަނޑާ ހިލާފަށް ކަމަށް ކަނޑައަޅައިދިނުމަށް ދިފާއުން އެދުނެވެ.

ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގެ ރިޔާސަތު ބެލެހެއްޓެވި ފަނޑިޔާރު ޑރ. މުހައްމަދު އިބްރާހީމް ވިދާޅުވީ، މައްސަލައިގެ އަޑުއެހުންތައް ނިމުނީ ކަމަށެވެ. އަދި "މައްސަލަ ދިރާސާކުރުމުގެ ތެރޭގައި އިތުރު ކަމެއް ފާހަގަކުރެވިފައި ނުވާ ނަމަ، ދެން އޮންނާނީ މައްސަލައިގެ ހުކުމް ކަނޑައެޅުމަށްޓަކައި ބޭއްވޭ އަޑުއެހުން" ކަމަށް ފަނޑިޔާރު ވިދާޅުވިއެވެ.

މި މައްސަލަ ބައްލަވާ ފަނޑިޔާރުންގެ ބެންޗުގައި ފަނޑިޔާރު ޑރ. މުހައްމަދު އިބްރާހީމްގެ އިތުރުން ހިމެނިވަޑައިގަންނަވަނީ އައިޝާ ޝުޖޫން މުހައްމަދާއި އަލީ ރަޝީދު ހުސައިނާއި އަބްދުﷲ ހަމީދު އަދި މުހައްމަދު ސަލީމެވެ.

ހައިކޯޓުން ވަނީ އަހުސަން ބަޝީރު މަރާލި މައްސަލައިގައި ޝަހުމްގެ އިތުރުން ހިމެނޭ މއ. ވީނަސްތަރި/ ހަސަން ޝިމާޒަށް ހުކުމް އިއްވައިފައެވެ. އަހުސަން މަރާލުމުގައި ބައިވެރިވި ހަސަން ޝިމާޒަށް އިއްވީ 15 އަހަރުގެ ޖަލު ހުކުމެކެވެ.