އިދިކޮޅު ފަރާތްތަކުން ވެރިކަމަށް އައުމަށްފަހު، އެ ފަރާތްތަކުން ކުރިން ފާޑުކިޔަމުންދިޔަ އެމްޑީޕީގެ އިގުތިސާދީ ސިޔާސަތުތައް ތަންފީޒުކުރަން މަޖުބޫރުވާ ކަމަށް، އިދިކޮޅު އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެކްސްގައި މިއަދު ކުރެއްވި ޕޯސްޓެއްގައި ނަޝީދު ވިދާޅުވި ގޮތުގައި، އެމްޑީޕީއާ ދެކޮޅު ފަރާތްތަކުން އަބަދުވެސް މަސައްކަތްކުރަނީ އެއީ ގައުމީ އަދި އިސްލާމީ ފަރާތްތަކެއްގެ ގޮތުގައި ދެއްކުމަށެވެ. އަދި އޭގެ އަނެއްކޮޅުން އެމްޑީޕީއަކީ އިސްލާމްދީނާއި ގައުމިއްޔަތާ ބީރައްޓެހި ބައެއްގެ ގޮތުގައި ސިފަކުރާ ކަމަށް އެމަނިކުފާނު ފާހަގަކުރެއްވިއެވެ.

ނަޝީދު ވިދާޅުވީ، އެމްޑީޕީއާ ދެކޮޅަށް މިފަދަ ތުހުމަތުތައް ކުރުމަށް އިދިކޮޅު ފަރާތްތަކުން ހެކީގެ ގޮތުގައި ދައްކަނީ އެމްޑީޕީގެ ސަރުކާރުތަކުގައި ގެންގުޅޭ ދައުލަތުގެ މުދާ ވިއްކުމާއި ޕްރައިވެޓައިޒް ކުރުމުގެ ސިޔާސަތުތައް ކަމަށެވެ.

ނަމަވެސް، އިދިކޮޅު ފަރާތްތަކަށް ވެރިކަން ލިބުމުން ކަންކަން ހިނގާ ގޮތް ތަފާތުކަން ފާހަގަކުރައްވައި ނަޝީދު ވިދާޅުވީ، ދިވެހި ރައްޔިތުންނަށް ހައްގުވާ އަދި ބޭނުންވާ ތަނަވަސްކަން ގެނެސްދިނުމަށް އެ ފަރާތްތަކަށް ވެސް ނުކުޅެދޭ ކަމަށެވެ. އަދި އެ ތަނަވަސްކަން ގެނެސްދެވެން އޮންނަނީ، އެ ފަރާތްތަކުން ކުރިން ލާދީނީ އަދި ގައުމިއްޔަތާ ހިލާފު ކަމަށް ލޭބަލްކުރި އެމްޑީޕީގެ ސިޔާސަތުތަކަށް އަމަލުކޮށްގެން ކަމަށް ވެސް ނަޝީދު ވިދާޅުވިއެވެ.

މި ސަބަބުތަކާ ހުރެ، ރައްޔިތުން އެމްޑީޕީއަށް އިތުބާރުކުރާ ކަމަށް ނަޝީދު ވިދާޅުވިއެވެ. އެމަނިކުފާނު ވިދާޅުވި ގޮތުގައި ރައްޔިތުންގެ އިތުބާރު އެމްޑީޕީއަށް ލިބެނީ އެ ޕާޓީއަކީ ކަންކަން ސިއްރުނުކޮށް، ހާމަކަން ބޮޑު ގޮތެއްގައި އަދި ތެދުވެރިކަމާއެކު މަސައްކަތްކުރާ ޕާޓީއަކަށް ވާތީއެވެ.

ނަޝީދު މިފަދައިން ވިދާޅުވެފައި މިވަނީ، ރަސްމާލޭގައި ހިންގުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނީގެ 20 ބިލިއަން ޑޮލަރުގެ މަޝްރޫއެއް ހިންގުމަށް މި ސަރުކާރުން ނިންމައި އެއްބަސްވުމުގައި ސޮއިކޮށްފައިވަނިކޮށެވެ. ބޭރުގެ އިންވެސްޓަރުންނާއެކު އެފަދަ މަޝްރޫއުތައް ރާއްޖޭގެ ފެށުމަށް ނަޝީދު ތާއީދުކުރެއްވި ނަމަވެސް، އެމަނިކުފާނުގެ ހަމައެކަނި ކަންބޮޑުވުމަކީ މާލެ ސަރަހައްދުގައި އެ މަޝްރޫއު ހިންގާތީ ކަމަށް ނަޝީދު ވަނީ ދާދިފަހުން ވިދާޅުވެފައެވެ. އަދި ދައުލަތުގެ މުދާ ވިއްކައިގެން ވަގުތުން ފައިސާ ލިބޭނެ ގޮތެއް ހެދުމަށް ވެސް ނަޝީދު ގޮވާލައްވާފައިވެއެވެ.