އިންޑިއާ ކަނޑުގެ ލީޑިން ޑެސްޓިނޭޝަން އެވޯޑް ޖެހިޖެހިގެން ހަތް ވަނަ ފަހަރަށް ރާއްޖެއަށް

ވޯލްޑް ޓްރެވަލް އެވޯޑްސްގެ އިންޑިއާ ކަނޑުގެ ކެޓަގަރީން ލީޑިން ޑެސްޓިނޭޝަން އެވޯޑް ޖެހިޖެހިގެން ހަތް ވަނަ ފަހަރަށް ރާއްޖެއަށް ލިބިއްޖެއެވެ.

ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސްރޯޑްސް މޯލްޑިވްސްގައި ރޭ ބޭއްވި "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026" ގައި އިންޑިއަން އޯޝަންސް ލީޑިން ޑެސްޓިނޭޝަންގެ މަގާމާއެކު ރާއްޖެއިން ވަނީ ފަސް އެވޯޑެއް ކާމިޔާބުކޮށްފައެވެ.

މި ރަސްމިއްޔާތުގައި ރާއްޖެއަށް ލިބުނު އެވޯޑުތަކުގެ ތެރޭގައި އިންޑިއަން އޯޝަންސް ލީޑިން ޑެސްޓިނޭޝަން 2026، އިންޑިއަން އޯޝަންސް ލީޑިން ޑައިވް ޑެސްޓިނޭޝަން 2026، އިންޑިއަން އޯޝަންސް ލީޑިން ގްރީން ޑެސްޓިނޭޝަން 2026 އަދި އިންޑިއަން އޯޝަންސް ލީޑިން ހަނީމޫން ޑެސްޓިނޭޝަން 2026 ހިމެނެއެވެ.

މީގެ އިތުރުން، ވިޒިޓް މޯލްޑިވްސް ކޯޕަރޭޝަނަށް ވަނީ އިންޑިއަން އޯޝަންސް ލީޑިން ޓޫރިސްޓް ބޯޑު 2026ގެ ލަގަބު ވެސް ލިބިފައެވެ.

ވިޒިޓް މޯލްޑިވިސް އިން ރޭ ނެރުނު ބަޔާނެއްގައި ބުނީ އެ ހަފުލާގައި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 15 އަށް ވުރެ ގިނަ ބްރޭންޑަކުން އިންޑިއާ ކަނޑުގެ އެކި ދާއިރާތަކުން އެވޯޑްތައް ހާސިލުކޮށްފައިވާ ކަމަށެވެ. އޭގެ ތެރޭގައި ރިސޯޓްތަކާއި ލަގްޒަރީ ހޮސްޕިޓަލިޓީ އާއި އޭވިއޭޝަނާއި ޑައިވިން އަދި އާއިލީ ދަތުރުތަކާއި ހަނީމޫން ދަތުރުތަކުގެ އިތުރުން ޕްރައިވެޓް އައިލެންޑް ތަޖުރިބާތަކާއި ސުޕަ ޔޮޓް ފަތުރުވެރިކަމާއި ޒިންމާދާރު ފަތުރުވެރިކަމުގެ ދާއިރާތައް ހިމެނެއެވެ.

އެ ރަސްމިއްޔާތުގައި ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވިދާޅުވީ، 1972 ވަނަ އަހަރު އެންމެ ދެ ރިސޯޓާއެކު ފެށުނު ރާއްޖޭގެ ފަތުރުވެރިކަން މިއަދު ދުނިޔޭގެ އެންމެ ކާމިޔާބު އެއް ވާހަކައަށް ވެފައިވާ ކަމަށެވެ. އަދި ރާއްޖެ އިޝްތިހާރު ކުރުމުގައި ވިޒިޓް މޯލްޑިވްސްއިން ކުރަމުންދާ މަސައްކަތްތައް ފާހަގަކުރައްވައި، ދެމެހެއްޓެނިވި ފަތުރުވެރިކަމުގެ މުހިންމުކަމުގެ މައްޗަށް މިނިސްޓަރު އަލިއަޅުވާލެއްވިއެވެ.

ރާއްޖެއަކީ 2020 އިން 2025 އަށް ޖެހިޖެހިގެން ހަ އަހަރު ދުނިޔޭގެ އެންމެ ކުރިއަރާފައިވާ މަންޒިލްގެ މަގާމު ހޯދާފައިވާ ގައުމެކެވެ. މީގެ ކުރިން ވެސް ރާއްޖެއިން ވަނީ "ވޯލްޑްސް ލީޑިން ޓޫރިސްޓް ބޯޑު" އާއި "ވޯލްޑްސް ލީޑިން ގްރީން ޑެސްޓިނޭޝަން" އަދި "ވޯލްޑްސް ލީޑިން ބީޗް ޑެސްޓިނޭޝަން" ފަދަ ޝަރަފުވެރި މަގާމުތައް ކާމިޔާބުކޮށްފައެވެ.

މިއަހަރުގެ ގާލާ ހަރަކާތުގައި ދުނިޔޭގެ 40 އަށްވުރެ ގިނަ ގައުމުން ފަތުރުވެރިކަމުގެ ދާއިރާގެ އިސްފަރާތްތައް ވަނީ ބައިވެރިވެފައެވެ. އޭގެތެރޭގައި ޓޫރިސްޓު ބޯޑާއި ހޮޓާތަކާއި ރިސޯޓުތަކުގެ އިތުރުން އެއާލައިންތަކާއި ފަތުރުވެރިކަމުގެ މީޑިއާތައް ހިމެނެއެވެ. މި ރަސްމިއްޔާތުގައި ވޯލްޑް ޓްރެވަލް އެވޯޑްސްގެ ފައުންޑާ އަދި ޕްރެޒިޑެންޓް ގްރަހަމް ކުކް ވެސް ބައިވެރިވެވަޑައިގަތެވެ.

ވޯލްޑް ޓްރެވެލް އެވޯޑްސްއަކީ 1993 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ ދުނިޔޭގެ ފަތުރުވެރިކަމާއި ދަތުރުފަތުރުގެ ސިނާއާތުގައި ދެމުން އަންނަ އެންމެ ޝަރަފުވެރި އެވޯޑެވެ.