ޑްރަގް ވިއްކައިގެން ރައްޔިތުން ހާލުގައި ޖައްސައިގެން ކުރެވޭނެ ވިޔަފާރިއެއް ދެން ނޯންނާނެ ކަމަށް ވިދާޅުވެ، ހޯމްލޭންޑް މިނިސްޓަރު އަލީ އިހުސާން ވަރުގަދަ އިންޒާރެއް ދެއްވައިފިއެވެ.

"އަހާ" ފޯރަމްގައި ރޭ ވާހަކަދައްކަވަމުން ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވި ގޮތުގައި މަސްތުވާތަކެތި އެތެރެކޮށް ވިޔަފާރިކުރާ ނެޓްވޯކްތައް ނައްތާލައި، އެ ފަރާތްތަކުން ހޯދާފައިވާ މުދަލާއި ފައިސާ ދައުލަތަށް ނަގަން ވަނީ ފަށައިފިއެވެ.

ޑްރަގް ވިއްކައިގެން ދިވެހި ރައްޔިތުން ހާލުގައި ޖައްސައިގެން ކުރެވޭނެ ވިޔަފާރިއެއް ދެން ރާއްޖެއަކު ނޯންނާނެ ކަމަށާއި ފާއިތުވި ތިން އަހަރާއި ބައިގެ ތެރޭގައި ރާއްޖޭގެ މަގުތަކުން 1.3 ޓަނުގެ މަސްތުވާތަކެތި އަތުލައިގަނެފައިވާ ކަމަށް އިހުސާން ވިދާޅުވިއެވެ. މިއީ މަގުމަތީ އަގުން ބަލާނަމަ ގާތްގަނޑަކަށް 1.5 ބިލިއަން ރުފިޔާގެ ތަކެއްޗެވެ.

މިނިސްޓަރު ފާހަގަކުރެއްވި ގޮތުގައި، މިއީ ކުރީގެ ސަރުކާރުތަކުގެ ފުރަތަމަ ތިން އަހަރާ އަޅައިބަލާއިރު ރެކޯޑު އަދަދެކެވެ. ސަޕްލައި މަދުކުރުމަށް ދިވެހި ފުލުހުންނާއި ކަސްޓަމްސްއިން ގުޅިގެން ކުރަމުންދާ މި މަސައްކަތުގެ ދަށުން، މިހާރު އަމާޒު ހިފާފައިވަނީ ހަމައެކަނި މަސްތުވާތަކެތި ގެންގުޅޭ މީހާ ހައްޔަރުކުރުމުގެ ބަދަލުގައި މުޅި ނެޓްވޯކް ނައްތާލުމެވެ.

މުޅި ރާއްޖެ ހިމެނޭހެން 24 ނެޓްވޯކެއްގެ މައްސަލަ މިހާރުވެސް ބަލަމުން އަންނަކަމަށް މިނިސްޓަރު ވިދާޅުވިއެވެ. މީގެ ތެރެއިން ތިން މައްސަލައެއްގެ ތަހުގީގު ނިންމައި، މިހާރު ވަނީ ކޯޓު މަރުހަލާގައެވެ. މި މައްސަލަތަކާ ގުޅިގެން 3.6 މިލިއަން ރުފިޔާއާއި 145،000 ޑޮލަރުގެ ނަގުދު ފައިސާގެ އިތުރުން، އެތައް ހާސް ޑޮލަރަކާއި ރުފިޔާއެއްގެ މުދާ ދައުލަތަށް ނަގާފައިވާ ކަމަށް އިހުސާން ވިދާޅުވިއެވެ.

މަސްތުވާތަކެތީގެ މައްސަލައަށް ހައްލު ގެނައުމަށް ސަރުކާރުން ގެންގުޅެނީ ދެ ގޮތެއް ކަމަށް އިހުސާން ފާހަގަކުރެއްވިއެވެ. އެއީ މަސްތުވާތަކެތީގެ ޝިކާރައަކަށް ވެފައިވާ ފަރާތްތަކަށް ފަރުވާދީ ޑިމާންޑް ކުޑަކުރުމާއި، ސަޕްލައިކުރާ ނެޓްވޯކްތައް ހުއްޓުވުމެވެ. މިހާރު ހެދިފައިވާ ގާނޫނުތަކުގެ ދަށުން ނެޓްވޯކްތަކަށް އަމާޒުކޮށްގެން ނަތީޖާ ނެރެވެމުންދާ ކަމަށާއި، އެ މީހުން ޖަލަށްލެވި މުދާތައް ދައުލަތަށް ނެގޭނެ ކަމަށް ވެސް މިނިސްޓަރު ވިދާޅުވިއެވެ.