ވޭތުވެދިޔަ ތިން އަހަރާއި ބައިގެ ތެރޭގައި 1.5 ބިލިއަން ރުފިޔާގެ އަގުހުރި 1.3 ޓަނުގެ މަސްތުވާތަކެތި އަތުލައިގަނެ، މުޅި ރާއްޖެ ހިމެނޭހެން މަސްތުވާތަކެތީގެ ވިޔަފާރިކުރާ 24 ނެޓްވޯކެއްގެ މައްސަލަ ބަލަމުން އަންނަކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.

"އަހާ" ފޯރަމްގައި ރޭ ވާހަކަދައްކަވަމުން މިނިސްޓަރު ވިދާޅުވި ގޮތުގައި، ސާޅީހަކަށް އަހަރުވީ މި މައްސަލައަށް ހައްލު ހޯދުމަށް ސަރުކާރުން ވަނީ ދެ ގޮތަކަށް މަސައްކަތް ފަށައިފައެވެ. އެއް ކަމަކީ މަސްތުވާތަކެތީގެ ޝިކާރައަކަށް ވެފައިވާ މީހުންނަށް ފަރުވާދީ، އެކަމަށް އޮންނަ ޑިމާންޑް ކުޑަކުރުމެވެ. ދެވަނަ ކަމަކީ ރާއްޖެއަށް މަސްތުވާތަކެތި އެތެރެވުން ހުއްޓުވައި ސަޕްލައި މަދުކުރުމެވެ.

ދިވެހި ފުލުހުންނާއި ކަސްޓަމްސް ގުޅިގެން ހޯދާފައިވާ ކާމިޔާބީއަށް އަލިއަޅުވާލައްވައި މިނިސްޓަރު ފާހަގަކުރެއްވި ގޮތުގައި، ފާއިތުވި ތިން އަހަރާއި ބައިގެ ތެރޭގައި އަތުލައިގަތް މަސްތުވާތަކެތީގެ އަދަދަކީ ކުރީގެ ސަރުކާރުތަކުގެ ފުރަތަމަ ތިން އަހަރާ އަޅައިބަލާއިރު ރެކޯޑު އަދަދެކެވެ.

މި ސަރުކާރުގެ ވިސްނުމަކީ މަސްތުވާތަކެތި ގެންގުޅޭ އާދައިގެ މީހުން ޖަލަށްލުމުގެ ބަދަލުގައި، އެތަކެތި އެތެރެކޮށް ވިޔަފާރިކުރާ ބޮޑެތި ނެޓްވޯކްތައް ނައްތާލުން ކަމަށް އިހުސާން ވިދާޅުވިއެވެ.

އެ ނެޓްވޯކްތަކުން ހޯދާފައިވާ ފައިދާއާއި މުދާ ދައުލަތަށް ނެގުމަށް އަމާޒު ހިފާފައިވާ ކަމަށްވެސް ވިދާޅުވިއެވެ. މިނިސްޓަރު ވިދާޅުވި ގޮތުގައި، މަސްތުވާތަކެތި ވިއްކައިގެން ރައްޔިތުން ހާލުގައި ޖައްސައިގެން ކުރާ ވިޔަފާރިއަކަށް ދެން ރާއްޖޭގައި ޖާގައެއް ނޯންނާނެއެވެ.

މިހާރު ތަހުގީގުކުރަމުން އަންނަ 24 ނެޓްވޯކުގެ ތެރެއިން ތިން މައްސަލައެއްގެ ތަހުގީގު ނިންމައި ކޯޓު މަރުހަލާގައިވާ ކަމަށް މިނިސްޓަރު ފާހަގަކުރެއްވިއެވެ. މި މައްސަލަތަކާ ގުޅިގެން 3.6 މިލިއަން ދިވެހި ރުފިޔާއާއި 145،000 ޑޮލަރުގެ ނަގުދު ފައިސާގެ އިތުރުން، އެތައް ހާސް ޑޮލަރަކާއި ރުފިޔާއެއްގެ މުދާ ދައުލަތަށް ނެގިފައިވާ ކަމަށް އިހުސާން ވިދާޅުވިއެވެ.

މިހާރު އަމަލުކުރަމުން އަންނަ ގާނޫނުގެ ދަށުން މި ނެޓްވޯކްތަކުގެ މީހުން ޖަލަށްލެވި، އެމީހުންގެ މުދާތައް ދައުލަތަށް ނެގޭނެ ކަމަށް ވެސް މިނިސްޓަރު އިހުސާން ވިދާޅުވިއެވެ.