ބޮލީވުޑްގެ މަޝްހޫރު ތަރި އަމީތާބް ބައްޗަން އާއި ޖަޔާ ބައްޗަންގެ ކައިވެނި ކުރެވުނީ އެއްވެސް ވަރަކަށް ކުރިން ރާވައިގެން ނޫން ކަމަށާއި، ކައިވެނިކުރަން ނިންމީ އެންމެ ދުވަހަކުން ކަމަށް އަމީތާބް ބުނެފިއެވެ. އޭނާ މިކަން ހާމަކުރީ އިންޑިއާގެ މަޝްހޫރު ޓީވީ ޝޯ "ކޯން ބަނޭގާ ކްރޯޑްޕަތީ" (ކޭބީސީ) ގެ 18 ވަނަ ސީޒަންގައި ބައިވެރިޔަކާ ވާހަކަދައްކަމުންނެވެ.

ކޭބީސީގައި ކަލްކަތާގެ ބައިވެރިއެއް ކަމަށްވާ އަހޭލީ ރޯއި ކުރި ސުވާލަކަށް ޖަވާބުދެމުން އަމީތާބް ބުނީ، ޖަޔާގެ އާއިލާއާ ދެމެދު ކައިވެންޏާ ގުޅޭގޮތުން ދިގު މަޝްވަރާތަކެއް ކޮށްފައި ނުވާނެ ކަމަށެވެ. އޭގެ ބަދަލުގައި، ކައިވެނިކުރަން ފެންނަ ކަމަށް އެއްދުވަހަކު ޖަޔާ ގާތު ބުނުމުން އޭނާ އެކަމާ އެއްބަސްވީ ކަމަށް އަމީތާބް ކިޔައިދިނެވެ.

"އަހަރެން އެއްދުވަހަކު ޖަޔާ ގާތު ބުނިން އަހަރެމެން ކައިވެނިކުރަންވީއޭ. ދެން އެ ނިމުނީ، އެގޮތަށް ނިންމީ،" އަމީތާބް ބުންޏެވެ. އޭނާ އިތުރަށް ފާހަގަކުރި ގޮތުގައި، އެ ނިންމުމަށްފަހު ޖަޔާ އޭނާގެ މައިންބަފައިންނާ ވާހަކަދެއްކި ކަމަށާއި، ނަމަވެސް އެ މީހުން ގަބޫލުކުރުވަން ޖަޔާ ބުނީ ކީކޭކަން މިއަދާ ހަމައަށް ވެސް ނޭނގޭ ކަމަށެވެ. ޖަޔާގެ އާއިލާއިން އެއްބަސްވެގެން އައިސް ކުޑަ މަޝްވަރާއަކަށްފަހު، ޖެހިގެން އައި ދުވަހު ކައިވެނި ކުރީ ކަމަށް ވެސް އަމީތާބް ބުންޏެވެ.

މިހާރުގެ ކައިވެނިތަކުގައި ކުރާ ބޮޑެތި ހަރަދުތަކާއި ތައްޔާރީތަކާ ގުޅޭގޮތުން ވާހަކަދައްކަމުން އަމީތާބް ބުނީ، ތާރީހު ކަނޑައެޅުމާއި، ހެދުން ހިޔާރުކުރުމާއި، ބޭންޑުތައް ގެނައުން ފަދަ ކަންކަމަކީ އޭނާ ގަބޫލުކުރާ ގޮތުގައި ބޭނުންތެރި ކަންކަމެއް ނޫނެވެ. އޭނާ ބުނި ގޮތުގައި އެންމެ މުހިންމު ކަމަކީ ޖަޔާއަކީ އޭނާގެ އަންހެނުން ކަމުގައި ގަބޫލުކުރުމެވެ.

އަމީތާބް އާއި ޖަޔާ ކައިވެނިކުރީ 1973 ވަނަ އަހަރުގެ ޖޫން މަހުގެ 3 ވަނަ ދުވަހު، އަމީތާބްގެ ކާމިޔާބު ފިލްމު "ޒަންޖީރު" ރިލީޒްވިތާ ކުޑަ ދުވަސްކޮޅެއް ފަހުންނެވެ.

މީގެ ކުރިން އަމީތާބް ބުނެފައިވާ ގޮތުގައި، ކުއްލި ގޮތަކަށް ކައިވެނިކުރަން ޖެހުނީ "ޒަންޖީރު" ގެ ކާމިޔާބީ ފާހަގަކުރުމަށް ރައްޓެހިންނާއެކު ލަންޑަނަށް ދާން އުޅުމުން، ކައިވެނި ނުކޮށް ޖަޔާއާއެކު ދަތުރުކުރުމަށް އޭނާގެ ބައްޕަ ހަރިވަންޝް ރާއީ ބައްޗަން ހުއްދަ ނުދިނުމުންނެވެ. އެ ކައިވެންޏަށްފަހު އެ ދެމަފިރިންނަށް ވަނީ ދެ ކުދިން ލިބިފައެވެ.