ބޮލީވުޑްގެ މަޝްހޫރު އެކްޓަރު އަމީތާބް ބައްޗަން، 'ކޯން ބަނޭގާ ކްރޯޑްޕަތީ' (ކޭބީސީ) 18 ގެ ޝޫޓިންއެއްގެ ތެރެއިން ކައްސާލައިގެން ވެއްޓި ކަކުލަށް އަނިޔާވެއްޖެއެވެ. މިކަން ހާމަކޮށްފައިވަނީ ކޭބީސީގެ އެންމެ ފަހުގެ އެޕިސޯޑުގައި އަމީތާބް އަމިއްލައަށެވެ.

އާންމުގޮތެއްގައި ކޭބީސީގެ އެޕިސޯޑުތައް ފަށާއިރު އަމީތާބް ސްޓޭޖުގެ މެދުގައި ކޮޅަށް ހުރެ ވާހަކަދެއްކި ނަމަވެސް، އެންމެ ފަހުން ދެއްކި އެޕިސޯޑުގައި އޭނާ ވާހަކަދެއްކީ ގޮނޑީގައި އިށީނދެ އިނދެއެވެ. އަމީތާބް ބުނި ގޮތުގައި އޭނާގެ ވާތް ފަރާތު ކަކުލަށް އަނިޔާވީ އޭގެ ކުރީ ދުވަހު ކުރިއަށްދިޔަ ޝޫޓިންއެއްގެ ތެރެއިން ކައްސާލައިގެން ވެއްޓުމުގެ ސަބަބުންނެވެ.

“އާންމުކޮށް އަހަރެން ވާހަކަދައްކަނީ ސްޓޭޖުގެ މެދުގައި ކޮޅަށް ހުރެގެން. އެކަމަކު މިއަދު ކަކުލަށް ވަނީ އަނިޔާވެފައި. އިއްޔެ ޝޫޓިންގެ ތެރެއިން ކައްސާލައިގެން ވެއްޓި ކަކުލަށް އަނިޔާވީ،” ޝޯގެ ބެލުންތެރިންނަށް މައުލޫމާތު ދެމުން އަމީތާބް ބުންޏެވެ.

އަނިޔާއާ ގުޅިގެން ސްޓޫޑިއޯގައި ތިބި ބެލުންތެރިން ކަންބޮޑުވުން ފާޅުކުރުމުން، އެއީ މާ ސީރިއަސް އަނިޔާއެއް ނޫން ކަމަށް އަމީތާބް ބުންޏެވެ. ނަމަވެސް ކޮޅަށް ހުންނަން ކުޑަ އުނދަގޫތަކެއް ހުރި ކަމަށް ފާހަގަކުރިއެވެ. އަދި ޝޯގެ ބައިވެރިންނާ ވާހަކަދައްކާއިރު ކޮޅަށް ތެދުވާނެ ކަމަށް ވެސް އޭނާ ބުންޏެވެ.

އުމުރުން 83 އަހަރުގެ އަމީތާބް ބައްޗަން ކޭބީސީ ހޯސްޓުކުރުމުގެ އިތުރުން، އެހެން ބައެއް ފިލްމީ މަސައްކަތްތައް ވެސް ދަނީ ކުރަމުންނެވެ. އޭގެ ތެރޭގައި ރިބޫ ދާސްގުޕްތާ ޑައިރެކްޓުކުރާ 'ސެކްޝަން 84' އަދި ނާގް އަޝްވިންގެ 'ކަލްކީ 2898 އޭޑީ' ގެ ދެވަނަ ބައި ހިމެނެއެވެ.

އިންޑިއަން އެކްސްޕްރެސް އަދި މިޑް-ޑޭ އިން ރިޕޯޓުކޮށްފައިވާ ގޮތުގައި، އަމީތާބްގެ ފަޔަށް ލިބުނު އަނިޔާއާ ގުޅިގެން ޝޯގެ ޝޫޓިންތަކަށް އެއްވެސް މެދުކެނޑުމެއް އައިސްފައެއް ނުވެއެވެ. އަދި އޭނާ ދަނީ ގަވާއިދުން ޝޯގެ އެޕިސޯޑުތައް ހޯސްޓުކުރަމުންނެވެ.