ސޯޝަލް މީޑިއާގައި އާންމުވަމުންދާ އޭއައި ޑީޕްފޭކް ވީޑިއޯތައް ހަދާ މީހުން ޖަލަށް ލުމަށާއި، ސޯޝަލް މީޑިއާ ސެންސަރުކުރުމަށް ބޮލީވުޑްގެ އެކްޓަރު ސަލްމާން ހާން ގޮވާލައިފިއެވެ.

އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި، ސަލްމާން މިކަމަށް ގޮވާލާފައިވަނީ އޭނާ ހޯސްޓުކުރާ "ބިގް ބޮސް 20" ގެ އެޕިސޯޑެއްގައެވެ. އޭއައި ޓެކްނޮލޮޖީ ބޭނުންކޮށްގެން މީހުންގެ އަޑާއި ސިފަ ނަކަލުކޮށްގެން ހަދާ ފޭކް ވީޑިއޯތަކާ މެދު ކަންބޮޑުވުން ފާޅުކުރަމުން ސަލްމާން ބުނީ، އޭނާގެ ވެސް ފޭކް ވީޑިއޯތަކެއް އިންޓަނެޓުގައި ދައުރުވަމުންދާ ކަމަށެވެ.

“މީހެއްގެ އަޑު އޭއައި މެދުވެރިކޮށް ނަކަލުކޮށްގެން އެހެން މީހުންނަށް ހުތުރު އެއްޗެހި ގޮވުން ފަދަ ކަންކަން އެބަކުރޭ. ވަރަށް ގިނަ ބައެއްގެ އޭއައި ވީޑިއޯތައް އެބަ ހަދާ، އޭގެ ތެރޭގައި އަހަރެންގެ ވީޑިއޯތައް ވެސް ހިމެނޭ،” ސަލްމާން ބުންޏެވެ.

މިފަދަ އަމަލުތައް ހިންގާ މީހުންނާ މެދު ހަރުކަށި ފިޔަވަޅު އެޅުމަށް ގޮވާލަމުން ސަލްމާން ފާހަގަކުރި ގޮތުގައި، އެއީ އޭއައި މެދުވެރިކޮށް އުފައްދާފައިވާ ވީޑިއޯއެއްކަން އެނގި ހުރެ އެފަދަ ކޮންޓެންޓް އުފައްދާ މީހުންނަކީ ކުށްވެރިންނެވެ.

“އެފަދަ މީހުން ޖަލަށް ލާން ޖެހޭ. އޭގެ ތެރެއިން އެކަކު ނުވަތަ ދެ މީހަކު ޖަލަށް ނުލަނީސް މިކަން ހުއްޓުމަކަށް ނާންނާނެ. މިކަން ހުއްޓުވުމަށް ގާނޫނެއް ފާސްކުރަން ޖެހޭ، އަދި ސޯޝަލް މީޑިއާ ސެންސަރުކުރަން ވެސް ޖެހޭ،” އޭނާ ބުންޏެވެ.

މީގެ އިތުރުން ސަލްމާން ބުނީ، ފަންނާނުންނަށް ސައިބާ ސެލް މެދުވެރިކޮށް މިފަދަ ވީޑިއޯތައް ހަދާ މީހުން ހޯދުމުގެ ފުރުސަތު އޮތް ނަމަވެސް، އާންމު ރައްޔިތުންނަށް އެ ފުރުސަތު ނޯންނާނެ ކަމަށެވެ. އެހެންކަމުން، އާންމުންގެ ރައްކާތެރިކަމަށްޓަކައި ވެސް މިފަދަ ކަންކަން ހުއްޓުވުމަށް ހަރުދަނާ ފިޔަވަޅުތަކެއް އެޅުމަކީ މުހިންމު ކަމެއް ކަމަށް އޭނާ ބުންޏެވެ.