ރާއްޖެއިން، ބޭރުގެ ބާޒާރުތަކަށް އެކްސްޕޯޓުކުރާ ރޯމަސް ބަލައިނުގަނެ ރިޖެކްޓުވާ މައްސަލަ ހައްލުކުރުމަށްޓަކައި، ސަރުކާރުން ހަރުދަނާ ފިޔަވަޅުތަކެއް އަޅައި، އާ އުސޫލެއް ތަންފީޒުކުރަން ފަށާފައިވާކަމަށް ފިޝަރީޒް، މެރިން ރިސޯސް އެންޑް އެގްރިކަލްޗާ މިނިސްޓަރު އަހުމަދު ޝިޔާމް ވިދާޅުވެއްޖެއެވެ.

ސަލްޓަން ޕާކުގައި މިރޭ ބޭއްވި "އަހާ" ފޯރަމްގެ ހަތްވަނަ ސެޝަންގައި ވާހަކަދައްކަވަމުން ޝިޔާމް ވިދާޅުވީ މަސް ރިޖެކްޓްވުމުގެ މައްސަލައަކީ ދިގު މުއްދަތެއްވެފައިވާ މައްސަލައެއް ކަމަށާއި، މިމައްސަލައަކީ މައިގަނޑު ގޮތެއްގައި މިފްކޯއިން އެކްސްޕޯޓުކުރާ މަހާއި ގުޅުވައި ފެންމަތިވި މައްސަލައެއްކަމަށް ޝިޔާމް ވިދާޅުވިއެވެ. މި މައްސަލައަކީ ޒަމާންވީ މައްސަލައަކަށްވެފައި، މިކަމުގެ ތެރޭގައި ބޮޑެތި "ނެޓްވޯކްތަކެއް" ހުރުމުން، އެކަން ރަނގަޅު ކުރާ ނަމަ، ދިވެހިން މިކަމުގައި ތެދުވެރިވާންޖެހޭނެކަމަށް ޝިޔާމް ވިދާޅުވިއެވެ.

ޝިޔާމް ވިދާޅުވީ މިހާރު ރާއްޖެއިން އެއްވެސް ވަރަކަށް މަސް ރިޖެކްޓްވާނެ ގޮތަށް މަސް އެކްސްޕޯޓު ނުކުރާ ކަމަށެވެ. އޭގެ ބަދަލުގައި، އާ އުސޫލުތަކެއް ތަންފީޒުކޮށްފައިވާކަމަށް މިނިސްޓަރު ވިދާޅުވިއެވެ.

"މިއަދު މަސްގަންނަ ކުންފުނިން، ދިވެހިރާއްޖޭގެ ބަނދަރެއްގައި މަސް ލޯޑު ކުރާ ގަޑީގައި ހުންނާނީ އެ މަސް އިންސްޕެކްޓް ކުރަން. އެހެންވީމަ އެހިސާބުން ރިޖެކްޓްވާ އެއްޗެއް ރިޖެކްޓްވަނީ. އޭގެ މާނައަކީ މިފްކޯގެ ބުކްގައި ރިޖެކްޓްވާކަށް މަހެއް ބޭރެއް ނުވާނެ. އެގޮތަށް އަޅުގަނޑުމެން މި އަމަލު ކުރަނީ،" ޝިޔާމް ވިދާޅުވިއެވެ.

މަސްވެރިކަމުގެ ސިނާއަތަށް ދިމާވެފައިވާ މިފަދަ މައްސަލަތައް ހައްލުކުރާ ނަމަ، މިފްކޯގެ އިތުރުން އަމިއްލަ ކުންފުނިތަކަށްވެސް ފުރުސަތު ފަހިކޮށްދޭންޖެހޭކަމަށް މިނިސްޓަރު ވިދާޅުވިއެވެ. ނަމަވެސް، މިދިޔަ ސަރުކާރުގައި ބާޒާރުގައި މަހުގެ އަގު ހުރި މިންވަރަށް ބެލުމެއް ނެތި ސިޔާސަތު ބަދަލުކުރުމުގެ ސަބަބުން އަމިއްލަ ކުންފުނިތަކަށް ބޮޑެތި ގެއްލުންވެގެން ދިޔަކަމަށް ޝިޔާމް ވިދާޅުވިއެވެ.

ނަމަވެސް، މިއަދު މަސްވެރިކަމުގެ ސިނާއަތް ހަމަމަގަށް އެޅުވުމަށް ކުރެވުނު މަސައްކަތުން ނަތީޖާ ފެންނަކަމަށް ޝިޔާމް ވިދާޅުވިއެވެ.

މިނިސްޓަރު ވިދާޅުވި ގޮތުގައި، އޭނާ ރައްޔިތުންގެ މަޖިލީހުގެ މެންބަރެއްގެ ގޮތުގައި ހުންނެވި ދުވަސްވަރު، އާންމުކޮށް މަސް ރިޖެކްޓްވާ މިންވަރަށް ވުރެ އިތުރަށް މަސް ބޭރުގެ ކުންފުނިތަކުން ރިޖެކްޓްވަމުންދިޔައެވެ. ބައެއްފަހަރު ޝިޕްމެންޓެއްގެ 10 ޕަސަންޓް ނުވަތަ 12 ޕަސަންޓް ރިޖެކްޓްވިކަމަށް މިނިސްޓަރު ވިދާޅުވިއެވެ.

އޭރު އެކަން ހިނގަމުންދިޔަ ގޮތަށް ބަލާއިރު، އެކަމުގައި ގޯސްތަކެއް ހުރިކަމަށް ތުހުމަތު ކުރެވުނުކަމަށް ޝިޔާމް ވިދާޅުވިއެވެ.