އަފްގާނިސްތާނުގެ އަންހެނުންނާއި ފަލަސްތީނުގެ ރެފިއުޖީންނަށް އިސްކަންދޭ ގޮތަށް، އިނގިރޭސިވިލާތުގެ ރެފިއުޖީ ރީސެޓްލްމަންޓް ސްކީމް އަލުން ހުޅުވާލަން ނިންމައިފި ކަމަށް އެ ގައުމުގެ ހޯމް ސެކްރެޓަރީ ޝަބާނާ މަހްމޫދު އިއްޔެ އިއުލާންކުރައްވައިފިއެވެ.

ލޭބަރ ޕާޓީގެ ކޮންފަރެންސްގައި ވާހަކަދައްކަވަމުން ޝަބާނާ ވިދާޅުވި ގޮތުގައި، ދެ އަހަރު ވަންދެން މެދުކަނޑާލާފައި އޮތް މި ސްކީމްގެ ދަށުން އެންމެ ނާޒުކު ހާލަތުގައި ތިބި ރެފިއުޖީންނަށް ދާއިމީ ހިމާޔަތް ހޯދުމަށް ފަސޭހަ މަގުތަކެއް ފަހިވެގެންދާނެއެވެ. މި ބަދަލަކީ އިމިގްރޭޝަން ނިޒާމުގެ ތެރެއިން އިންސާފުވެރިކަން ގާއިމުކުރުމަށް އެޅޭ ފިޔަވަޅެއް ކަމަށް އޭނާ ފާހަގަކުރެއްވިއެވެ.

މި ސްކީމްގެ ދަށުން ފުރަތަމަ ގަބޫލުކުރާނީ އެތައް ސަތޭކަ ރެފިއުޖީންނެއް ކަމަށާއި، ނަމަވެސް ގަވާއިދާ ހިލާފަށް އެތެރެވާ މީހުންގެ އަދަދު މަދުވާ ނިސްބަތަކުން މި އަދަދު އެތައް ހާހަކަށް އިތުރުކުރާނެ ކަމަށް އިނގިރޭސި ހޯމް އޮފީހާ ހަވާލާދީ ދަ ގާޑިއަން ނޫހުން ރިޕޯޓުކޮށްފައިވެއެވެ. އަދި ކޮންމެ އަހަރަކުވެސް ވަކި ލިމިޓެއް ކަނޑައަޅާނެ ކަމަށް ރިޕޯޓުތައް ބުނެއެވެ.

މި ސްކީމްގެ ދަށުން ފުރުސަތު ދޭނެ މީހުން ކަނޑައަޅާނީ އދ.ގެ ރެފިއުޖީންނާ ބެހޭ އިދާރާ (ޔޫއެންއެޗްސީއާރު) އާއި އިންޓަނޭޝަނަލް ރެފިއުޖީ އެސިސްޓެންސް ޕްރޮޖެކްޓުންނެވެ. ސްކީމްގައި ބައިވެރިކުރާ މީހުންގެ ސަލާމަތީ ކަންކަމާއި ކުށުގެ ރެކޯޑުތައް ބަލައި ޗެކްކުރާނެ ކަމަށް ހޯމް އޮފީހުން ބުނެފައިވެއެވެ. މި ސްކީމްގެ ދަށުން އެތެރެވާ މީހުންނަށް އިނގިރޭސިވިލާތުގައި ދާއިމީކޮށް ދިރިއުޅުމުގެ ހުއްދަ ލިބޭނެއެވެ.

މި ސްކީމްގެ ދަށުން މީހުން ގެންނަން ފަށާނެ ސީދާ ތާރީހެއް އަދި ރަސްމީކޮށް އިއުލާންކޮށްފައެއް ނުވެއެވެ. ނަމަވެސް އަންނަ އޮކްޓޯބަރު މަހުން ފެށިގެން ޖަމިއްޔާތަކަށް ސްޕޮންސަރ ސްޓޭޓަސްއަށް އެދި ހުށަހެޅޭނެ ކަމަށާއި، މި އުސޫލުގެ ދަށުން ފުރަތަމަ ރެފިއުޖީން އަންނާނެ ކަމަށް ބެލެވެނީ 2027 ވަނަ އަހަރުގެ ފަހުކޮޅު ކަމަށް މީޑިއާތަކުން ރިޕޯޓުކޮށްފައިވެއެވެ.