މިހާރު ރާއްޖޭގެ އެކި ރަށްރަށުގައި ހުރި ކުޅިވަރު ވަސީލަތްތަކުގެ މަރާމާތަށް ގިނަ ގޮންޖެހުންތަކެއް އެބަހުރި ކަމަށާއި، އެކަން ފަސޭހަކުރުމަށް މިހާރު ހެދެމުންދާ ފިޓްނަސް އެންޑް ރެކްރިއޭޝަން ސެންޓަރުތައް އެހީވާނެ ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެއެވެ.

މިނިސްޓަރު ރާފިއު އެހެން ވިދާޅުވީ މިރޭ ސަލްޓަން ޕާކުގައި އޮތް "އަހާ ފޯރަމް"ގައި ވާހަކަ ދައްކަވަމުންނެވެ. އާންމު ރައްޔިތަކު ކުރެއްވި ސުވާލަށް ޖަވާބުދެއްވަމުން ރާފިއު ވިދާޅުވީ ކުޅިވަރު ވަސީލަތްތައް ހަލާކުވެފައި ހުރުން އެއީ މައްސަލައެއް ކަމަށް ގަބޫލުކުރައްވާ ކަމަށާއި، އެކަމަށް ހައްލު ހޯދަން ކުރެވޭ މަސައްކަތުގައި އެންމެ ބޮޑު ފަސޭހައަކަށް ވާނީ ރަށްރަށުގައި އަޅާ ފިޓްނަސް އެންޑް ރެކްރިއޭޝަން ސެންޓަރުތައް ކަމަށެވެ.

"(ރަށްރަށުގެ) ކުޅިވަރު ގިނަ ވަސީލަތްތަކެއް މިހާރު ހުރީ މަރާމާތުކުރަން ޖެހިފައި. ބައެއް ފަހަރު މަރާމާތުކުރުން ލަސްވެގެން ބަދަލުކުރަން ޖެހޭ ހިސާބަށް އެބަދޭ. މިހެން މިވަނީ މީގެކުރިން އޮނިގަނޑު ރޭވިފައި އޮތްގޮތުން. ބައެއް ވަސީލަތްތައް މި ހުންނަނީ ކައުންސިލްތަކުގެ ދަށުގައި، އަނެއްބައި ވަސީލަތްތައް މިހުންނަނީ މިނިސްޓްރީގެ ދަށުގައި. އެހެންވީމަ އެކަން ބަލަހައްޓާނެ ނިޒާމެއް އެކުލެވިފައެއް ނެތް. މިކަން ރަނގަޅުކުރަން ގަސްދުކުރާ ގޮތަކީ އަޅުގަނޑުމެންގެ މުއައްޒަފުން ތަންކޮޅެއް އަވަހަށް މެއިންޓެނެންސް ވޯކް ކޮށްގެން. އެކަން ކުރުމައްޓަކައި ކޮންމެ ރަށެއްގައިވެސް އެބަ ގާއިމުކުރިވިގެންދޭ އަޅުގަނޑުމެންގެ މަރުކަޒެއް އެބަ ގާއިމުކުރެވިގެން ދޭ، އެއީ ފިޓްނަސް އެންޑް ރެކްރިއޭޝަން ސެންޓަރު،" ރާފިއު ވިދާޅުވިއެވެ.

މިނިސްޓަރު ރާފިއު ވިދާޅުވީ ފިޓްނަސް އެންޑް ރެކްރިއޭޝަން ސެންޓަރަކީ މިނިސްޓްރީގެ މުއައްޒަފުން ރަށްރަށުގައި މަސައްކަތް ކުރަން ތިބޭނެ ތަނަކަށް ވާނެ ކަމަށެވެ. އެގޮތުން މަރާމާތުކުރުމުގެ މަސައްކަތުގައި އުޅޭ މީހުންނާއި އިދާރީ މުއައްޒަފުންގެ އިތުރުން ޕްރޮގްރާމްތައް ހިންގާ މީހުންވެސް އެތަނުގައި ތިބޭނެ ކަަމަށް މިނިސްޓަރު ފާހަގަކުރެއްވިއެވެ. ރާފިއު އިތުރަށް ފާހަގަކުރެއްވީ ފިޓްނަސް އެންޑް ރެކްރިއޭޝަން ސެންޓަރުތަކަށް ކުޅިވަރު ވަސީލަތްތައް މަރާމާތުކުރުމަށް ހާއްސަ ބެޖެޓެއްވެސް ދޭން ނިންމާފައިވާ ކަމަށެވެ.

ރާފިއު ވިދާޅުވީ މިހާރު ކައުންސިލްތަކުގައި ހުރި ކުޅިވަރު ވަސީލަތްތަކާއި އަމިއްލަ ފަރުދުން ހަދިޔާކޮށްފައިވާ ކުޅިވަރު ވަސީލަތްތައްވެސް މިނިސްޓްރީގެ ދަށަށް ގެންދަން 2024 ވަނަ އަހަރު ސާކިއުލާއެއްވެސް ކައުންސިލްތަކަށް ފޮނުވާފައިވާ ކަމަށެވެ. އެކަން އެގޮތަށް ކުރަން މަސައްކަތް ކުރަނީ ސަރުކާރުގެ އެހެން މިނިސްޓްރިތަކުންވެސް އެ މިނިސްޓްރީތަކުގެ ރަށްރަށުގައި ހުންނަ އިމާރާތްތައްވެސް ބަލަހައްޓަނީ އެކަހަލަ ނިޒާމަކުން ކަމަށްވާތީ ކަމަށެވެ. އަދި އެކަމުގެ ސަބަބުން ކުޅިވަރު ވަސީލަތްތައް ދިގު މުއްދަތަކަށް ދަމަހައްޓަން ފުރުސަތު ފަހިވާނެ ކަމަށްވެސް ރާފިއު ވިދާޅުވިއެވެ.