އދ.ގެ އާންމު މަޖިލީހުގެ 79 ވަނަ ބައްދަލުވުމުގައި ތަގުރީރުކުރައްވަމުން، ޕާކިސްތާނުގެ ބޮޑުވަޒީރު ޝެހްބާޒް ޝަރީފް ކަޝްމީރުގެ މައްސަލަ ނަންގަވައި، 2019 ވަނަ އަހަރު އިންޑިއާއިން ގެނައި ބަދަލުތައް އަނބުރާ ގެންދިއުމަށް ގޮވާލައްވައިފިއެވެ.

ޝެހްބާޒް ޝަރީފްގެ ތަގުރީރުގައި ވިދާޅުވި ގޮތުގައި، ދެކުނު އޭޝިއާގައި ދާއިމީ ސުލްހައެއް ގާއިމުކުރެވެން އޮތީ ޖައްމޫ އަދި ކަޝްމީރުގެ މައްސަލައަށް ސުލްހަވެރި ހައްލެއް ލިބިގެންނެވެ.

އދ.ގެ ސަލާމަތީ މަޖިލީހުގެ ގަރާރުތަކާ އެއްގޮތްވާ ގޮތުގެ މަތިން، ކަޝްމީރުގެ ރައްޔިތުންނަށް އަމިއްލަ ގޮތް ނިންމުމުގެ ހައްގު ދިނުމަށް އޭނާ ގޮވާލެއްވިއެވެ.

މީގެ އިތުރުން، އިންޑިއާއިން ކަޝްމީރުގައި އަސްކަރީ ބާރުގެ ބޭނުންކުރަމުންދާ ކަމަށް ތުހުމަތުކުރައްވައި، އެކަން ޝެހްބާޒް ޝަރީފް ކުށްވެރިކުރެއްވިއެވެ. ވިދާޅުވީ އިންޑިއާގެ އަމަލުތަކުގެ ސަބަބުން ސަރަހައްދީ ހަމަޖެހުމަށް ނުރައްކާވެފައިވާ ކަމަށެވެ.

ޕާކިސްތާނުގެ ބޮޑުވަޒީރުގެ މި ވާހަކަތަކަށް ރައްދުދީ، އިންޑިއާއިން ވަނީ އދ.ގައި ރައްދު ދިނުމުގެ ހައްގު ބޭނުންކޮށްފައެވެ. އިންޑިއާގެ ޑިޕްލޮމެޓުން ބުނި ގޮތުގައި، ޕާކިސްތާނަކީ ޓެރަރިޒަމަށް ވާގިވެރިވާ ގައުމެކެވެ. އަދި ޖައްމޫ އެންޑް ކަޝްމީރަކީ އިންޑިއާގެ ބައެއް ކަމަށާއި، އެ ސަރަހައްދުގެ އެތެރޭގެ ކަންކަމާ ބެހުމުގެ ހައްގު ޕާކިސްތާނަށް ލިބިގެން ނުވާކަމަށް އިންޑިއާއިން ބުނެފައިވެއެވެ.