ދިރާގުގެ ހިއްސާ އެއްކޮށް ލިބުމަކީ ދިވެހީންނަށް ލިބޭނެ ބޮޑުު ކާމިޔާބެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ ދިރާގުގެ 51 ޕަސަންޓުގެ ހިއްސާ، ސަރުކާރަށް ނެގުމަށް ކެބިނެޓުން ނިންމާފައިވާ ކަމަށާއި ދިރާގަކީ ވަރަށް ފައިދާވާ ކުންފުންޏެއް ކަމަށެވެ.

"މީގެ މެޖޯރިޓީ 52 ޕަސަންޓު މިދަނީ ބޭރަށް. އެ ބޭރަށް ދިއުމުގެ ބަދަލުގައި ދިވެހި ރައްޔިތުންނަށް ފައިދާވާ ގޮތަށް، ދިވެހީންނަށް އެ ފައިދާވާ ގޮތަށް ބަދަލުވެގެންދިއުން އެއީ ވަރަށް ބޮޑު ކާމިޔާބަކަށް ވާނެ. އޭރުގައި ވެސް މިކަން ނުކުރަން އޭރުގައި އިދިކޮޅުގައި ތިބި ފަރާތްތައް ގޮވާލަމުންދިޔަ އެމްޑީޕީގެ ސަރުކާރުން ދިރާގުގެ ޝެއާ ވިއްކާލިއިރުގައި. އެހެންނަމަވެސް އެކަން އެބޭފުޅުން ކުރެއްވެވި އޭރުގައި،" އެމަނިކުފާނު ވިދާޅުވިއެވެ.

ރައީސް ވިދާޅުވީ ދިރާގުގެ މެޖޯރިޓީ ޝެއާ ސަރުކާރަށް ލިބުމުން، އެ ކުންފުނި ދިވެހި ރައްޔިތުންނަށް ލިބި، ދިވެހި ރައްޔިތުންނަށް ދިވެހީންގެ ކުންފުންޏެއްގެ ގޮތުގައި ބަދަލުވެގެންދާނެ ކަމަށެވެ. އޭގެ އިތުރުން އެމްޑަބްލިޔުއެސްސީ، ސަރުކާރުގެ 100 ޕަސަންޓު ހިއްސާއަކަށް ބަދަލުކުރަން ނިންމަވާފައިވާކަން އިއުލާންކުރައްވަމުން އެމަނިކުފާނު ވިދާޅުވި ގޮތުގައި އެކަމުން ވެސް ފައިދާތައް ކުރާނެ ކަމަށެވެ.

"އެމްޑަބްލިޔުއެސްސީއަކީ ވަރަށް ފައިދާވާ ކުންފުންޏެއް. އެހެންނަމަވެސް އެމްޑަބްލިޔުއެސްސީގެ މުޅި ޝެއާ ހަމައެކަނި 20 ޕަސަންޓުން ނިމެނީކީ ނޫން. މި މުޅި ލިޔެކިޔުންތައް ބައްލަވައިލެއްވީމާ އެނގޭނެ މިކަން ކޮށްފައި މިއޮތީ މުޅި ކުންފުނީގެ ކޮންޓްރޯލު ބޭރުގެ ކުންފުނީގެ އަތްމަތީގައި ގާތްގަނޑަކަށް މި އޮންނަނީ. ޕްރޮކިއުމަންޓް ކުޑަކުޑަ ކަމަކުން ފެށިގެން އެންމެ ބޮޑެތި ކަންކަމަށް ދާންދެން. ބޯޑު މީޓިންއެއް ބޭއްވިޔަސް، ޑިސިޝަން މޭކިންގައި މައިނޯރިޓީ ކޮންޓްރޯލު ޝެއާ އޮންނަ ފަރާތުން ކޮންޓްރޯލު އެބަކުރޭ،" އެމަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ ބޭރުގެ ކޮންޓްރޯލު އޮތް ކަމުގައިވިޔަސް، އެމްޑަބްލިޔުއެސްސީއަކީ ދިވެހީންގެ ކުންފުންޏެއް ކަމަށާއި އެހެންކަމުން އެކަމަކީ ވަރަށް ގޯސްކޮށް ކޮށްފައި އޮތް ކަމެއް ކަމަށެވެ. އަދި މި ސަރުކާރުން މަސައްކަތްކުރަމުން އަންނަނީ އެކަން ރަނގަޅުކުރުމަށް ކަމަށް އެމަނިކުފާނު ވިދާޅުވިއެވެ.