އާމްދަނީގެ ގޮތުގައި 60،000 އިން މަތިން ލިބޭ މީހުންނަށް ފުލް އާސަންދަ ނުދޭން ސަރުކާރުން ނިންމައިފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ ސަރުކާރުގެ ހަރަދުތައް ކުޑަކުރަމުގެ މަސައްކަތްކުރަމުން ގެންދަވާ ކަމަށާއި މުވައްޒަފުންވެސް އެބަ މަދުކުރެވޭ ކަމަށެވެ.

ހަމައެއާ އެކީގަ ދެވޭ ހިދުމަތްތައް ވެސް އޭގެ އެންމެ ބޭނުން ޖެހިފައިވާ ފަރާތްތަކަށް ފޯކަސް ކުރެވިގެން، ޓާގެޓް ކުރެވިގެން ދެވޭނެ ގޮތަށް ބަދަލުކުރުމަކީވެސް ހަރަދު ކުޑަކުރުމުގެ ނިޒާމުގެ ތެރެއިން ކުރިއަށް ގެންދެވޭނެ ކަންތައްތައް ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ އެގޮތުން ބަލާއިރުގައި، މިހާރު އާސަންދަ މި ދެވެނީ އެންމެ މުއްސަނދި މީހާއަށްވެސް، އެންމެ ނިކަމެތި މީހާއަށްވެސް ތަފާތެއް ނެތި، ފުލް ކަވަރޭޖް ކަމަށާއި ނަމަވެސް އެއީ އެންމެ ރަނގަޅު ގޮތެއް ކަމަކަށް ބޭރުގެ ފަރާތްތަކަކުންވެސް ގަބޫލު ނުކުރާ ކަމަށެވެ. އަދި ފަންނީ އެއްވެސް ފަރާތަކުން ވެސް، ސަރުކާރުންވެސްއެގޮތަށް ގަބޫލު ނުކުރާ ކަމަށް އެމަނިކުފާނު ވިދާޅުވިއެވެ.

"އެހެންކަމުން ކުރިއަށް އޮތް ދުވަސްތަކުގައި 60،000 ރުފިޔާއިން މައްޗަށް މުސާރަ ލިބޭ ފަރާތްތަކަށް، މިހާރު މި އޮންނަ ގޮތަށް ފުލް ކަވަރޭޖް އާސަންދައެއް ނުލިބޭނެ. 60،000 ރުފިޔާއިން މައްޗަށް މުސާރަ ލިބޭ ފަރާތްތަކުން ކޯ-ޕޭ ނުވަތަ ޕްރީ-ޕޭ ނިޒާމެއްގެ ތެރެއިން އާސަންދަ ލިބޭނީ،" އެމަނިކުފާނު ވިދާޅުވިއެވެ.

ރައީސް ވިދާޅުވީ އޭގެ ސަބަބުން އަހަރެއްގެ ތެރޭގައި 285 މިލިއަން ރުފިޔާ ރައްޔިތުންގެ އެހެން ކަންކަމަށް ހަރަދުކުރުމަށް ސަލާމަތް ކުރެވޭނެ ކަމަށާއި އެހެންވީމާ މުއްސަނދިންނަށް، އިންކަމް ޓެކްސް ދައްކާ ފަރާތްތައް، މުއްސަނދިންނަށް ކޮންމެހެން އާންމުންނަށް ލިބޭ ގޮތަށް ހުރިހާ ކަމެއް ހިލޭ ލިބެން ނުޖެހޭނެ ކަމަށެވެ. އަދި އެ ބަދަލު އަންނަ މަހުން ފެށިގެން ގެނެވޭނެ ކަމަށް އެމަނިކުފާނު ވިދާޅުވިއެވެ.

މިއަހަރު ތެރޭގައިވެސް މީގެން ކޮންމެވެސް ވަރެއްގެ ހަރަދު ސަލާމަތް ކުރެވޭނެ. މިއަންނަ އަހަރު، 2027 ގައި 285 މިލިއަން ރުފިޔާ އަންދާޒާ ކުރެވެނީ. މިދެންނެވި ގޮތަށް 60،000 އިން މައްޗަށް އިންކަމް ބްރެކެޓް ޓާގެޓްކޮށް އާސަންދަ ލިމިޓް ކުރީމަ، ކޯ-ޕޭ އަދި ޕްރީ-ޕޭ ނިޒާމެއްގެ ތެރެއިން ދިޔައީމަ ހަރަދު ކުޑަވެގެން ދާނެ ކަމަށް. ދެން މީގެ ތަފްސީލުތައްވެސް ކުރިއަށް އޮތް ދުވަސްތަކުގައި ފިނޭންސް މިނިސްޓަރާއި އަދި ކަމާގުޅޭ ބޭފުޅުން ދެއްވާނެ،" އެމަނިކުފާނު ވިދާޅުވިއެވެ.