އެމްޑީޕީގެ ސަރުކާރުން ވިއްކާލި ދިރާގުގެ ހިއްސާ އަނބުރާ ހޯދައި މެޖޯރިޓީ ސަރުކާރަށް ބަދަލުކުރަން ނިންމައިފިއެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ ކުންފުނިތައް ރިފޯމްކޮށް ހަރުދަނާކުރުމުގެ މަސައްކަތުގެ ތެރެއިން މިއަދާ ހަމައަށް އައިރުގައި ވަރަށް ގިނަ މަސައްކަތްތައް ކުރެވިފައިވާ ކަމަށެވެ.

ކުންފުނިތައް ރީސްޓްރަކްޗާ ކުރުން، ނުވަތަ ކުންފުނިތައް މާޖް ކުރުމާ، އަދި ބައެއް ބަދަލުތައް ގެނައުމާ، މިހެން ގޮސް ވަރަށް ގިނަ މަސައްކަތްތައް ކުރެވިފައިވާ ކަމަށާއި މީގެ ބޭނުމަކީ އެފިޝަންޓް ނިޒާމެއްގެ ތެރެއިން ހަރަދު ކުޑަ ނިޒާމެއްގެ ތެރެއިން ރައްޔިތުންނަށް ހިދުމަތް ފޯރުކޮށްދިނުން ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ މިހާރު މި ގެންދާ މަސައްކަތުގެ ތެރެއިން ކުންފުނިތަކަށް ބޭނުންވާ އަދަދަށް، މުވައްޒަފުންގެ އަދަދު ބަދަލުކުރުމުގެ މަސައްކަތްތައްވެސް އެދަނީ ވަރަށް ބާރު ސްޕީޑުގައި ކުރިއަށް ކަމަށާއި މި މަސައްކަތްތަކުގެ ތެރެއިން ކުރިއަށް އޮތް ދުވަސްތަކުގައި ކުރިއަށް ގެންދިއުމަށް ކެބިނެޓުން ކަންތައްތަކެއް ނިންމާފައިވާ ކަމަށެވެ.

"އޭގެތެރެއިން އެންމެ މުހިންމު އެއް ކަމަކީ ދިރާގުގެ ޝެއާ ސަރުކާރުގެ ޕަސެންޓޭޖް 51 އިންސައްތައަށް ބޮޑުކުރުން. އެނގިވަޑައިގަންނަވާނެ ފަދައިން، ދިރާގަކީ ސަރުކާރުގެ މެޖޯރިޓީ ޝެއާ އޮއްވައި އެމްޑީޕީގެ ފުރަތަމަ ސަރުކާރުން ދިރާގު ޝެއާ ވަނީ ވިއްކާލާފައި. ސަރުކާރުގެ ރައްޔިތުންގެ ވަރަށް ބޮޑު ހަރުމުދަލެއް. އަޅުގަނޑުމެން ގަބޫލުކުރާ ގޮތުގައި ދިރާގުގެ ޝެއާ 51 އިންސައްތައަށް ބޮޑުކުރުމަކީ ރައްޔިތުންގެ ހެވާއި ލާބައަށްޓަކައި، ރާއްޖޭގެ އިގުތިސާދު ފުޅާކުރުމަށްޓަކައި އަދި ރާއްޖޭގެ އިގުތިސާދު އިތުރަށް ކުރިއަށް ގެންދިއުމުގައި ކޮންމެހެން ކުރަން ޖެހޭ ކަމެއް،" އެމަނިކުފާނު ވިދާޅުވިއެވެ.

ރައީސް ވިދާޅުވީ އެހެންކަމުން ދިރާގުގެ ވިއްކާލި ހިއްސާ ހޯދައި މެޖޯރިޓީ ކޮންޓްރޯލް 51 އިންސައްތައަށް ބޮޑުކުރުމުގެ މަސައްކަތް މިހާރު އެވަނީ ފެށިފަި ކަމަށެވެ. އޭގެ އިތުރުން އެމްޑަބްލިޔުއެސްސީގެ 100 ޕަސަންޓު ހިއްސާ ސަރުކާރަށް ހޯދަން ނިންމައި، ބައެއް ކުންފުނިތައް އެއްކޮށްލުމަށް ނިންމަވާފައިވާކަން ވެސް އެމަނިކުފާނު އިއުލާންކުރެއްވިއެވެ.