ފާއިތުވި ދިހަ އަހަރު ދުވަހުގެ ތެރޭގައި، ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އިން އިންތިޒާމުކޮށްގެން ބާއްވަމުން އަންނަ އިންޓަނޭޝަނަލް ކޮންފަރެންސް އޮން އިންޓެލެކްޗުއަލް އެޑްވާންސްމަންޓް (އައިސީއައިއޭ) ވަނީ ރާއްޖޭގެ އިލްމީ ދިރާސާތަކާއި ފިކުރީ ބަހުސްތަކުގެ އެންމެ މުހިންމު އެއް މަންސައަށް ބަދަލުވެފައެވެ. މަދު އިލްމުވެރިންކޮޅަކާއެކު ފެށި މި ކޮންފަރެންސް، މިއަދު ވަނީ އެކި ދާއިރާތަކުން މެދުކެނޑުމެއްނެތި ކަރުދާސް ހުށަހަޅާ ބޮޑު އެކަޑެމިކް އެއްވުމަކަށް ވެފައެވެ. މި ކޮންފަރެންސްގެ ފުރަތަމަ ދިހަ އަހަރުގެ ކާމިޔާބީ ވަޒަންކުރެވެނީ މައިގަނޑު ތިން ދާއިރާއަކުންނެވެ. އެއީ ހުށަހެޅުނު އެބްސްޓްރެކްޓްތަކުގެ އަދަދާއި، ބައިވެރިންގެ މައުލޫމާތާއި، އަދި ކަރުދާސް ހުށަހެޅުނު ބަސްބަހުގެ ތަފާތުކަމުގެ މައްޗަށް ބިނާކޮށެވެ.

އައިސީއައިއޭގެ ފުރަތަމަ ދިހަ އަހަރުގެ ތާރީހު މައިގަނޑު ތިން މަރުހަލާއަކަށް ބަހާލެވެއެވެ. އެއީ 2016 އިން 2020 އަށް ހިނގި ބިންގާ އެޅުމުގެ މަރުހަލާއާއި، 2021 އިން 2023 އަށް އައި އަލުން އިއާދަވުމާއި ފުޅާވުމުގެ މަރުހަލާގެ އިތުރުން، 2024 އިން 2025 އަށް ފެނިގެންދިޔަ އެންމެ ބޮޑު ކުރިއެރުމުގެ މަރުހަލާއެވެ.

އެންމެ ފުރަތަމަ 2016 ވަނަ އަހަރު މި ކޮންފަރެންސް ތައާރަފުކުރެވުނީ "އިންޓަނޭޝަނަލް ކޮންފަރެންސް އޮން އިސްލާމިކް އަވޭކެނިން" ގެ ނަމުގައެވެ. ނަމަވެސް، ދިރާސާގެ ދާއިރާތައް ފުޅާކޮށް، އިލްމީ އާ މިސްރާބަކަށް ދިއުމުގެ މަގުސަދުގައި 2019 ވަނަ އަހަރު ކޮންފަރެންސްގެ ނަން "އިންޓަނޭޝަނަލް ކޮންފަރެންސް އޮން އިންޓެލެކްޗުއަލް އެޑްވާންސްމަންޓް" އަށް ބަދަލުކުރެވުނެވެ.

30 އޮގަސްޓް 2026، މާލެ، އައިޔޫއެމް އައިސީއައިއޭ ކޮންފަރެންންސް --- ފޮޓޯ: އައިޔޫއެމް

ކޮންފަރެންސްގެ ކުރިއެރުން އެންމެ ބޮޑަށް ފެންނަނީ ހުށަހެޅުނު ދިރާސީ ކަރުދާސްތަކުގެ އަދަދުންނެވެ. ފުރަތަމަ މަރުހަލާގައި އަހަރަކު އާންމުކޮށް 30 އާއި 40 އާ ދެމެދުގެ އަދަދަކަށް އެބްސްޓްރެކްޓް ހުށަހެޅުނު ނަމަވެސް، ކޮވިޑް-19 ގެ ބަލިމަޑުކަމާ ގުޅިގެން 2020 ވަނަ އަހަރު އެ އަދަދު ވަނީ 24 އަށް ދަށަށް ގޮސްފައެވެ. އެހެންނަމަވެސް، އޭގެ ފަހުން އައި އަހަރުތަކުގައި ހަލުވި ދުވެއްޔެއްގައި ކުރިއަރައި، 2021 ގައި 55 އަށް އަދި 2023 ގައި 76 އަށް ހުށަހެޅުންތައް އިތުރުވިއެވެ. މި ކުރިއެރުން އެންމެ މައްޗަށް ގޮސްފައިވަނީ 2024 ވަނަ އަހަރުއެވެ. އެ އަހަރު 184 އެބްސްޓްރެކްޓް ހުށަހެޅުނުއިރު، 2025 ވަނަ އަހަރު ވެސް 181 ހުށަހެޅުމާއެކު އެ މަތީ މިންގަނޑު ވަނީ ހިފަހައްޓާފައެވެ. މިއީ ފެށުނު އަހަރާ އަޅައިބަލާއިރު ގާތްގަނޑަކަށް ހަ ގުނައިގެ ބޮޑު ކުރިއެރުމެކެވެ.

ބައިވެރިންގެ ނިސްބަތަށް ބަލާއިރު، ފުރަތަމަ އަހަރުތަކުގައި ގިނައީ ދިވެހި ބައިވެރިންނެވެ. ނަމަވެސް މެދުތެރެއިން ބައިނަލްއަގުވާމީ ބައިވެރިންގެ ޝައުގުވެރިކަން އިތުރުވެ، 2024 ވަނަ އަހަރު 53 ބޭރު ބައިވެރިންނާއެކު ބައިނަލްއަގުވާމީ ބައިވެރިވުން އެންމެ މައްޗަށް ދިޔައެވެ. ހަމަ އެ އަހަރު ކޮންފަރެންސްގެ ކުރިން ބޭއްވޭ 12 ވޯކްޝޮޕް ބާއްވައި، ރެކޯޑު އަދަދަކަށް ހަރަކާތްތައް ހިންގިއެވެ. އަދި 2025 ވަނަ އަހަރު ދިވެހި ބައިވެރިންގެ އަދަދު 72 އަށް އަރައި، ގައުމީ ފެންވަރުގައި އޮތް ތަރުހީބު ވަނީ ވަރަށް ބޮޑަށް އިތުރުވެފައެވެ.

30 އޮގަސްޓް 2026، މާލެ، އައިޔޫއެމް އައިސީއައިއޭ ކޮންފަރެންންސް --- ފޮޓޯ: އައިޔޫއެމް

ކަރުދާސް ހުށަހެޅުނު ބަސްތަކަށް ބަލާއިރު، މައިގަނޑު ބަހަކީ އިނގިރޭސި ބަހެވެ. 2024 ގައި އިނގިރޭސި ބަހުން 78 ކަރުދާސް ހުށަހެޅުނެވެ. އަރަބި ބަހުން އެންމެ ގިނަ ކަރުދާސް ހުށަހެޅުނީ 2019 ގައެވެ. އެއީ 25 ހުށަހެޅުމެވެ. އަދި 2025 ވަނަ އަހަރު ދިވެހި ބަހުން 25 ކަރުދާސް ހުށަހަޅައި، މާދަރީ ބަހުން އިލްމީ ދިރާސާތައް ކުރުމަށް އޮތް ޝައުގުވެރިކަން ވަނީ ސާބިތުކޮށްދީފައެވެ.

ކާމިޔާބު ދިހަ އަހަރަށްފަހު، އައިސީއައިއޭގެ 11 ވަނަ ކޮންފަރެންސް މިއަދު ފެށިގެންދިޔައިރު، މިއީ އާ ދަހަރެއްގެ ފެށުމެވެ. ކުރިއަށް އޮތް ތަނުގައި އައިޔޫއެމްގެ އަމާޒަކީ އެހެން ޔުނިވާސިޓީތަކާއި ދިރާސީ މަރުކަޒުތަކާ ގުޅިގެން ބައިނަލްއަގުވާމީ އެއްބާރުލުން އިތުރަށް ފުޅާކުރުމެވެ. މީގެ އިތުރުން، ހަމައެކަނި ކަރުދާސް ހުށަހެޅުމުގެ ބަދަލުގައި، އިންޓަރެކްޓިވް ރައުންޑްޓޭބަލްތަކާއި، ތަފާތު ބަސްބަހުން ކުރިއަށްދާ ޕްލެނަރީ ސެޝަންތަކާއި، ނެޓްވޯކިން ޖާގަތައް ހިމެނުމަށް ވަނީ ރާވާފައެވެ.

މި ބަދަލުތަކާއެކު، އެކި ދާއިރާތަކުގެ އިލްމީ ދިރާސާތަކަށާއި މުޖުތަމައުގެ ކުރިއެރުމަށް ދާއިމީ ގޮތެއްގައި މަސައްކަތްކުރާ، އެކި ބަސްބަހުން ލިޔެވޭ އިލްމީ ލިޔުންތަކަށް ޖާގަދޭ ހަރުދަނާ މަންސައެއްގެ ގޮތުގައި އައިސީއައިއޭ ދެމިއޮތުމަށް ވަނީ އަމާޒު ހިފައިފައެވެ.