ފީފާ ވޯލްޑް ކަޕް 2026ގެ ތިންވަނަ ހޮވުމަށް އިންގްލެންޑާއެކު ކުޅެ، 6-4 އިން ބަލިވި މެޗަކީ ފްރާންސްގެ ގައުމީ ޓީމުގެ ކޯޗު ޑިޑިއޭ ޑިޝޯމްގެ ފަހު މެޗެވެ. މިއާއެކު، ފްރާންސްގެ ކޯޗުކަމުގައި އޭނާ ހޭދަކުރި 14 އަހަރުގެ ދިގު އަދި ކާމިޔާބު ދަތުރު ވަނީ ނިމުމަކަށް އައިސްފައެވެ.

ދިހަ ގޯލު ފެނިގެންދިޔަ މި ހަލަބޮލި މެޗުގައި އިންގްލެންޑުން ފުރަތަމަ ހާފު ހަތަރު ގޯލުގެ ލީޑެއްގައި ނިންމާލި އިރު، ދެވަނަ ހާފުގައި ފްރާންސުން ވަނީ ނަތީޖާ އަނބުރާލުމަށް ވަރަށް ބޮޑަށް މަސައްކަތްކޮށްފައެވެ. ނަމަވެސް އެ މަސައްކަތް ކާމިޔާބު ނުވެ، ޑިޝޯމް ބޭނުންވި ފަދަ މޮޅަކާއެކު ކެރިއަރު ނިންމާލުމުގެ ފުރުސަތު ވަނީ ގެއްލިފައެވެ. އެ މެޗުގެ ދެވަނަ ހާފު ފެނިގެންދިޔައީ ބަދަލުތަކާއެކު ޑިޝޯމްގެ މޮޅުކަން ފެނުނު ހާފެއްގެ ގޮތުގައެވެ. ކެޕްޓަން ކިލިއަން އެމްބާޕޭއަށް ވޯލްޑް ކަޕްގެ ތާރީހުގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑު މުގުރާލެވުނީ ޑިޝޯމްގެ ބަދަލުތަކުންނެވެ.

ތިންވަނަ ހޮވަން ކުޅުނު މެޗު ކޮންމެ ގޮތަކަށް ނިމިގެންދިޔަ ނަމަވެސް، އެންމެ މެޗެއްގެ ނަތީޖާއިން އޭނާގެ ކެރިއަރު މިންނުކުރެވޭނެކަން ކަށަވަރެވެ. އޭނާ ގައުމީ ޓީމާ ވަކިވެގެން އެދަނީ ބައިނަލްއަގުވާމީ ފުޓުބޯޅައިގެ ތާރީހުގައި އެންމެ ކާމިޔާބު އެއް ޝަހުސިއްޔަތުގެ ގޮތުގައެވެ.

ކެޕްޓަނެއްގެ ގޮތުގައި ހޯދި ކާމިޔާބީ

ފްރާންސްގެ ރަން ޖީލުގެ ކުޅުންތެރިންގެ ތެރެއިން ޑިޝޯމްއަކީ އެންމެ ހުނަރުވެރި ކުޅުންތެރިޔާއަށް ނުވެދާނެއެވެ. ޒައިނުއްދީން ޒިދާންގެ އުފެއްދުންތެރިކަމާއި، ތިއެރީ އޮންރީގެ ގޯލު ޖެހުމުގެ ހުނަރު އަދި ރޮބާޓް ޕިރޭސްގެ ހަލުވިކަން އޭނާގެ ކިބައިގައި ނެތް ނަމަވެސް، ޑިޝޯމްގެ އެންމެ ބޮޑު ހަތިޔާރަކީ އޭނާގެ ވިސްނުންތެރިކަމާއި ލީޑާޝިޕެވެ. މެދުތެރެއިން ޓީމު ރާވައި، މެޗުގެ ޓެމްޕޯ ކޮންޓްރޯލްކޮށް، ކުރިއަށް ކުޅޭ ކުޅުންތެރިންނަށް ފަހަތުން ރައްކާތެރިކަން ހޯދައިދިނުމުގައި އޭނާއަކީ ނަމޫނާއެކެވެ. އޭނާގެ މި ޑިސިޕްލިންގެ ސަބަބުން އެހެން ކުޅުންތެރިންނަށް މިނިވަންކަމާއެކު ކުޅުމުގެ ފުރުސަތު ފަހިވެގެންދިޔައެވެ.

މި ސިފަތަކުގެ ސަބަބުން 1998 ވަނަ އަހަރުގެ ވޯލްޑް ކަޕްގައި ފްރާންސްގެ ކެޕްޓަންކަން ކުރުމަށް އެންމެ އެކަށީގެންވާ ކުޅުންތެރިޔަކަށް އޭނާ ވިއެވެ. އަމިއްލަ ގައުމުގައި ކުޅުނު މި މުބާރާތުގެ ފައިނަލްގައި 3-0 އިން ބްރެޒިލް ބަލިކޮށް، ފްރާންސަށް ފުރަތަމަ ފަހަރަށް ވޯލްޑް ކަޕް ކާމިޔާބުކޮށްދިން ކެޕްޓަނަކީ ޑިޝޯމްއެވެ. އޭގެ ދެ އަހަރު ފަހުން ޔޫއެފާ ޔޫރޯ 2000 ގެ ފައިނަލްގައި އިޓަލީ ބަލިކޮށް އެ މުބާރާތްވެސް ފްރާންސަށް ކާމިޔާބުކޮށްދިނެވެ. ގައުމީ ޓީމަށް 103 މެޗު ކުޅެދިނުމަށްފަހު އޭނާ ކެރިއަރު ނިންމާލި އިރު، އޭނާއަކީ ޓީމުގެ އެކި ގުޅުންތައް ގުޅުވައިދިން މައި ތަނބެވެ.

ކޯޗިން ކެރިއަރުގެ ފެށުން

ކުޅުންތެރިއެއްގެ ގޮތުގައި ރިޓަޔާކުރުމަށްފަހު، ފުޓުބޯޅައިގެ ދަނޑުން ބޭރުގައިވެސް އޭނާގެ ހުނަރުތައް ޑިޝޯމް ސާބިތުކޮށްދިނެވެ. 2004 ވަނަ އަހަރުގެ ޔޫއެފާ ޗެމްޕިއަންސް ލީގުގެ ފައިނަލަށް މޮނާކޯ ގެންގޮސްދިނުމާއި، ޔުވެންޓަސް އަލުން ސެރީއާއަށް ގެނެސްދިނުމުގެ އިތުރުން މާސޭއާއެކު ފްރާންސް ލީގު ކާމިޔާބުކުރިއެވެ. މި ކާމިޔާބީތަކާއެކު، 2012 ވަނަ އަހަރުގެ ޖުލައި މަހު ފްރާންސްގެ ގައުމީ ޓީމުގެ ހެޑް ކޯޗުގެ މަގާމާ އޭނާ ހަވާލުވިއެވެ.

އެ ދުވަސްވަރު ފްރާންސް ޓީމު އޮތީ އެތެރޭގެ ބޮޑެތި މައްސަލަތަކާއި، މުބާރާތްތަކުގައި ނެރެމުންދިޔަ ދަށް ނަތީޖާތަކުގެ ސަބަބުން ވަރަށް ބޮޑަށް އަޑިއަޅާލައިފައެވެ. ކުޅުންތެރިންނާއި ސަޕޯޓަރުންނާ ދެމެދު އޮތް ގުޅުން ހީނަރުވެފައިވަނިކޮށް، ޑިޝޯމް ވަނީ ޑިސިޕްލިންއާއި ޓީމުވަންތަކަން އިސްކޮށްގެން އެ ގުޅުން އަލުން ބިނާކުރަން ފަށައިފައެވެ. އޭނާގެ ކޯޗިން ސްޓައިލަކީ ބައެއް ފަހަރު މާ ބޮޑަށް ޑިފެންސިވް އަދި ކޮންސަވޭޓިވް ސްޓައިލެއް ކަމަށް ފާޑުކިޔާ ފަރާތްތަކުން ބުނި ނަމަވެސް، ޑިޝޯމް އިސްކަންދިނީ މުނިފޫހިފިލުވުމަށްވުރެ ބޮޑަށް ނަތީޖާ ނެރުމަށެވެ. އޭނާގެ ޓީމުތައް ބިނާކޮށްފައިވަނީ އުނދަގޫ ވަގުތުތަކުން ސަލާމަތްވެ، އިދިކޮޅު ޓީމުތަކާ އެއްގޮތަށް ކުޅުން ބަދަލުކޮށް ނޮކްއައުޓް މެޗުތަކުން މޮޅުވުމަށެވެ.

ވޯލްޑް ކަޕް 2026 ގެ ސެމީ ފައިނަލުގައި ސްޕެއިން އަތުން ބަލިވި މެޗަށްފަހު ފްރާންސްގެ ކޯޗު ޑިޑިއޭ ޑިޝޯމް -- ފޮޓޯ/ ގެޓީ

ދެވަނަ ފަހަރަށް ދުނިޔޭގެ ޗެމްޕިއަންކަން

ކޯޗެއްގެ ގޮތުގައި ޑިޝޯމްގެ އެންމެ ބޮޑު ކާމިޔާބީއަކީ ރަޝިއާގައި ބޭއްވި 2018 ވަނަ އަހަރުގެ ފީފާ ވޯލްޑް ކަޕެވެ. ހޫގޯ ލޮރިސް، ރަފައެލް ވަރާން، އެންގޯލޯ ކާންޓޭ، ޕޯލް ޕޮގްބާ، އެންޓޮއިން ގްރީޒްމަން އަދި ޒުވާން ކީލިއަން އެމްބާޕޭ ފަދަ ހުނަރުވެރި ކުޅުންތެރިންނާއެކު ފްރާންސުން ވަނީ މޮޅު ކުޅުމެއް ދައްކައިފައެވެ. ގަދަ 16 ގައި އާޖެންޓީނާ، ކުއާޓާ ފައިނަލްގައި އުރުގުއާއީ އަދި ސެމީ ފައިނަލްގައި ބެލްޖިއަމް ބަލިކުރުމަށްފަހު، ފައިނަލްގައި 4-2 އިން ކްރޮއޭޝިއާ ބަލިކޮށް ފްރާންސުން ވަނީ ދެވަނަ ފަހަރަށް ވޯލްޑް ކަޕް ކާމިޔާބުކޮށްފައެވެ.

މި ކާމިޔާބީއާއެކު ޑިޝޯމް ވަނީ ފުޓުބޯޅައިގެ ތާރީހުން ހާއްސަ ޖާގައެއް ހޯދައިފައެވެ. އޭނާ ވެގެންދިޔައީ ބްރެޒިލްގެ މާރިއޯ ޒަގާލޯ އަދި ޖަރުމަނުގެ ފްރާންޒް ބެކެންބާއު އަށްފަހު، ކުޅުންތެރިއެއްގެ ގޮތުގައާއި ކޯޗެއްގެ ގޮތުގައި ވޯލްޑް ކަޕް ކާމިޔާބުކުރި ތިންވަނަ ފަރާތަށެވެ. އަދި ކެޕްޓަނެއްގެ ގޮތުގައި ތަށި އުފުލައިލުމަށްފަހު ކޯޗެއްގެ ގޮތުގައި ތަށި ހޯދި ދެވަނަ މީހަކީ ޑިޝޯމްއެވެ. މިއީ އޭނާގެ ފުޓުބޯޅައިގެ ޝަހުސިއްޔަތު އެންމެ ފުރިހަމައަށް ދައްކުވައިދިން ކާމިޔާބީއެވެ.

މުބާރާތްތަކުގެ ރެކޯޑުތައް

ވޯލްޑް ކަޕް 2018 ގެ ކާމިޔާބީއަކީ ހަމައެކަނި އިއްތިފާގުން ލިބުނު ކާމިޔާބީއެއް ނޫންކަން ޑިޝޯމް ވަނީ ސާބިތުކޮށްދީފައެވެ. 2021 ވަނަ އަހަރުގެ ޔޫއެފާ ނޭޝަންސް ލީގު ކާމިޔާބުކުރުމަށްފަހު، 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގެ ފައިނަލަށްވެސް އެ ޓީމު ދަތުރުކުރިއެވެ. ޕޮގްބާ، ކާންޓޭ އަދި ކަރިމް ބެންޒެމާ ފަދަ މުހިންމު ކުޅުންތެރިންނަށް އަނިޔާގެ ސަބަބުން ނުކުޅެވުނު ނަމަވެސް، ޑިޝޯމް ވަނީ ޓީމު ފައިނަލަށް ގެންގޮސްދީފައެވެ. ފައިނަލްގައި އިތުރު ވަގުތު ކުޅެގެން 3-3 އިން އެއްވަރުވެ، ޕެނަލްޓީ ޝޫޓްއައުޓްގައި އާޖެންޓީނާ އަތުން ބަލިވީއެވެ.

އޭގެ ފަހުން ޔޫރޯ 2024 ގެ ސެމީ ފައިނަލަށް އަދި 2026 ގެ ވޯލްޑް ކަޕްގެ ސެމީ ފައިނަލަށްވެސް ފްރާންސް ދަތުރުކުރިއެވެ. 2026 ގެ މުބާރާތުގައި ޑިޝޯމް ވަނީ ވޯލްޑް ކަޕްގެ ތާރީހުގައި އެންމެ ގިނަ މެޗުން މޮޅުވި ކޯޗުގެ ރެކޯޑުވެސް މުގުރާލައިފައެވެ. 2014 ގެ ކުއާޓާ ފައިނަލް، 2018 ގެ ޗެމްޕިއަންކަން، 2022 ގެ ރަނަރަޕް އަދި 2026 ގެ ސެމީ ފައިނަލާއެކު، ވިދިވިދިގެން ހަތަރު ވޯލްޑް ކަޕްގައި އޭނާ ނެރެފައިވާ ނަތީޖާތަކަކީ މަދު ކޯޗަކަށް ނޫނީ ނުހޯދޭނެ ފަދަ ކާމިޔާބީއެކެވެ. އޭނާގެ މި ދިގު މުއްދަތަކީ ހަމައެކަނި ނަމަކަށް ބިނާވެފައިވާ ކަމެއް ނޫނެވެ، އެއީ ނަތީޖާއިން ސާބިތުކޮށްދިން ކަމެކެވެ.

ފްރާންސްގެ ކޯޗު ޑިޑިއޭ ޑިޝޯމް އަދި ކެޕްޓަން ކިލިއަން އެމްބާޕޭ -- ފޮޓޯ/ ގެޓީ

ޕްރެޝަރާ ކުރިމަތިލުމާއި ފްރާންސްގެ ފުޓުބޯޅައިގެ ސަގާފަތް

ފްރާންސްގެ ގައުމީ ޓީމަށް ކޯޗުކޮށްދިނުމަކީ ބައިނަލްއަގުވާމީ ފުޓުބޯޅައިގައި އެންމެ ޕްރެޝަރު ބޮޑު އެއް ވަޒީފާއެވެ. ޔޫރަޕްގެ އެންމެ ބޮޑެތި ކްލަބުތަކަށް ކުޅޭ ގިނަ އަދަދެއްގެ ހުނަރުވެރި ކުޅުންތެރިން ތިބުމުން، ކޮންމެ ސްކޮޑެއް އެކުލަވާލާއިރުވެސް ގިނަ ބައެއްގެ ފާޑުކިޔުންތައް އަމާޒުވެއެވެ. ކޮންމެ ޓެކްޓިކަލް ނިންމުމަކާ މެދު ސުވާލު އުފައްދައެވެ. ނަމަވެސް ޑިޝޯމް މި ޕްރެޝަރުން ސަލާމަތްވީ، ހަމައެކަނި އެންމެ ހުނަރުވެރި ކުޅުންތެރިން ނެގުމުގެ ބަދަލުގައި އެންމެ ވަރުގަދަ ޓީމު އެކުލަވާލުމަށް އިސްކަންދީގެންނެވެ.

އެކި ފަހަރުމަތިން މަޝްހޫރު ކުޅުންތެރިން ޓީމުން ބާކީކުރުމުން ފާޑުކިޔުންތައް އަމާޒުވި ނަމަވެސް، ޑިޝޯމް އަބަދުވެސް އިސްކުރީ ޓީމުގެ އެއްބައިވަންތަކަމާއި ކޯޗުގެ ބާރެވެ. ރީތި ފުޓުބޯޅައެއް ކުޅުމަށްވުރެ ބޮޑަށް، މުބާރާތްތަކުގައި ކުރިއަށް ދިއުމަށާއި ތަށި ހޯދުމަށް އޭނާ ގެންގުޅުނު ވިސްނުމަކީ ނަތީޖާ ނެރެދިން ވިސްނުމެކެވެ. އޭނާ ވަނީ ޓީމުގެ ފޯމޭޝަން ބަދަލުކޮށް، ކުޅުންތެރިންގެ ދައުރުތައް ބަދަލުކޮށް، މޮޅުވުމުގެ ފުރުސަތު ބޮޑުކުރުމަށްޓަކައި ކުރިއަށް ކުޅޭ ކުޅުންތެރިންގެ މިނިވަންކަންވެސް ގުރުބާންކޮށްފައެވެ.

ފްރާންސްގެ ތާރީހުގައި ޑިޝޯމްގެ މަގާމު

ވޯލްޑް ކަޕް 2026 ގެ ކުރިން ޑިޝޯމް ވަނީ މުބާރާތަށްފަހު މަގާމުން ވަކިވާނެކަން އިއުލާންކޮށްފައެވެ. ސެމީ ފައިނަލްގައި ސްޕެއިން އަތުން 2-0 އިން ބަލިވެ، އަދި ތިންވަނަ ހޮވި މެޗުގައި އިންގްލެންޑް އަތުން ބަލިވުމުން، އޭނާ ބޭނުންވި ފަދަ ކާމިޔާބު ނިމުމެއް ނުލިބުނެވެ. ނަމަވެސް އޭނާގެ ލެގަސީ ވަނީ އޭގެ މާ ކުރިން ކަށަވަރުވެފައެވެ. ޑިޝޯމް ގައުމީ ޓީމާ ވަކިވަނީ ހަމައެކަނި ތަށިތަކެއް ހޯދައިދީފައެއް ނޫނެވެ. އޭނާ ވަނީ ޓީމަށް ހަމަޖެހުން ގެނެސްދީ، މޮޅުވުމުގެ ސަގާފަތެއް އުފައްދައިފައެވެ.

ޑިޝޯމް 2012 ގައި ޓީމާ ހަވާލުވިއިރު ފްރާންސް އޮތީ އެމީހުންގެ އަގު އަލުން ބިނާކުރަން ޖެހިފައެވެ. ނަމަވެސް 2026 ގައި އޭނާ ވަކިވާ އިރު، ފްރާންސަކީ ކޮންމެ ބޮޑު މުބާރާތެއްގެވެސް އެންމެ ވަރުގަދަ އެއް ފޭވަރިޓެވެ. ކުޅުންތެރިއެއްގެ ގޮތުގައި ފްރާންސަށް ލީޑަޝިޕް ދައްކައިދީ، ކެޕްޓަނެއްގެ ގޮތުގައި ފުރަތަމަ ވޯލްޑް ކަޕް ހޯދައިދިނުމަށްފަހު، ކޯޗެއްގެ ގޮތުގައި ދެވަނަ ވޯލްޑް ކަޕެއް ހޯދައިދިން ޑިޝޯމްއަކީ ޒަމާނީ ފްރާންސް ފުޓުބޯޅައިގެ މައި އާކިޓެކްޓެވެ.