އީރާނާއި އެމެރިކާއާ ދެމެދު ދާދިފަހުން ވެފައިވާ ފަހުމުނާމާ (އެމްއޯޔޫ) ގެ ވަކި މާއްދާތަކަކަށް އެމެރިކާއިން ފުރިހަމައަށް އަމަލުކުރަން ފެށުމުން ނޫނީ، ދާއިމީ އެއްބަސްވުމަކަށް ދިއުމަށް ކުރާ މަޝްވަރާތައް ކުރިއަށް ނުގެންދާނެ ކަމަށް އީރާނުގެ ގާނޫނުހަދާ މަޖިލީހުގެ ރައީސް އަދި އިސް ނެގޯޝިއޭޓަރު މުހައްމަދު ބާގިރު ގާލިބާފް ވިދާޅުވެއްޖެއެވެ.

އީރާނުގެ ދައުލަތުގެ ޓީވީއަށް ދެއްވި އިންޓަވިއުއެއްގައި ގާލިބާފް ވިދާޅުވި ގޮތުގައި، ދާއިމީ އެއްބަސްވުމެއްގެ މަޝްވަރާތައް ފެށޭނީ 14 ނުކުތާގެ މައްޗަށް އެކުލެވޭ އެމްއޯޔޫގެ 1، 4، 5، 10 އަދި 11 ވަނަ މާއްދާ ތަންފީޒުކުރުމުންނެވެ. މި މާއްދާތަކުގެ ތެރޭގައި ލުބުނާނުގައި ހިނގަމުންދާ ހަމަލާބަދަލުކުރުންތައް ހުއްޓާލުމާއި، ހޮރުމުޒް ކަނޑުއޮޅީގައި އެމެރިކާއިން ހިންގާ އަސްކަރީ ހަރަކާތްތައް ނިމުމަކަށް ގެނައުމާއި، ވިޔަފާރި ބޯޓުފަހަރަށް ރައްކާތެރިކަން ކަށަވަރުކޮށްދިނުން ހިމެނެއެވެ. މީގެ އިތުރުން އީރާނުގެ ތެޔޮ އެކްސްޕޯޓުކުރުމަށް ހުރަސް ނޭޅުމާއި، ހިފަހައްޓާފައިވާ އީރާނުގެ ފައިސާ ދޫކޮށްލުން ވެސް މި ޝަރުތުތަކުގެ ތެރޭގައި ހިމެނޭ ކަމަށް އޭނާ ފާހަގަކުރެއްވިއެވެ.

އެމެރިކާއިން މި ކަންކަމަށް އަމަލު ނުކުރާނަމަ ކުރިމަތިލުމަކަށް ދާން ޖެހިދާނެ ކަމުގެ އިންޒާރު ދެއްވަމުން،“އަނެއް ފަރާތުން ފަހުމުނާމާއަށް އަމަލު ނުކުރާނަމަ، ހަނގުރާމައަކަށް ދާން އީރާނުން އޮތީ ތައްޔާރަށް” ކަމަށް ގާލިބާފް ވިދާޅުވިއެވެ.

މިހާރު ގަތަރުގެ ދޯހާގައި ކުރިއަށްދަނީ ހަމައެކަނި އެމްއޯޔޫ ތަންފީޒުކުރުމާ ގުޅޭ ޓެކްނިކަލް މަޝްވަރާތަކެއް ކަމަށާއި، އެއީ ސީދާ އެމެރިކާއާއެކު ކުރެވޭ ސިޔާސީ މަޝްވަރާތަކެއް ނޫން ކަމަށް އީރާނުގެ ހާރިޖީ ވުޒާރާއިން ވަނީ ބުނެފައެވެ. ބައިނަލްއަގުވާމީ މަސްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި، އީރާނުގެ މި ހަރުކަށި ޝަރުތުތަކަކީ ދާއިމީ އެއްބަސްވުމަކަށް ދިއުމުގެ ކުރިން އިގުތިސާދީ ލުއިތަކެއް ހޯދުމަށާއި، ލުބުނާނުގައި އިސްރާއީލުން ހިންގާ އަސްކަރީ އޮޕަރޭޝަންތައް ހުއްޓުވުމަށް އެމެރިކާއަށް ޕްރެޝަރު ކުރުމުގެ ގޮތުން އަޅާ ފިޔަވަޅެކެވެ. ދެ ގައުމުގެ ދެމެދުގައި ސީދާ މަޝްވަރާތަކެއް މިހާރު ނުހިނގާއިރު، މެދުވެރިއެއްގެ ރޯލު އަދާކުރަނީ ގަތަރުންނެވެ.