ހަމަލާތައް މެދުކަނޑާލުމަށް އެމެރިކާ މެދުވެރިވެގެން އެކުލަވާލާފައިވާ އާ އެއްބަސްވުމެއް ތަންފީޒުކުރަން ފަށާފައި ވަނިކޮށް، ލުބުނާނުގެ ދެކުނުގައި އިސްރާއީލުން ހިންގަމުންދާ އަސްކަރީ އޮޕަރޭޝަންތައް މެދުކެނޑުމެއްނެތި ކުރިއަށްގެންދިއުމަށް އިސްރާއީލުގެ ސެކިއުރިޓީ ކެބިނެޓުން ފާސްކޮށްފިއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވި ގޮތުގައި، އެއްބަސްވުމެއް އޮތް ނަމަވެސް އިސްރާއީލުގެ ސިފައިންނަށް އަމާޒުވާ ކޮންމެ ނުރައްކަލަކާ ދެކޮޅަށް ފިޔަވަޅު އެޅުމުގެ މިނިވަންކަން އިސްރާއީލަށް އޮންނާނެއެވެ. އަދި ހިޒްބުﷲގެ ހަތިޔާރުތައް ނައްތާލެވެންދެން ލުބުނާނުގެ އެތެރެއަށް 10 ކިލޯމީޓަރަށްވާ ގޮތަށް ކަނޑައަޅާފައިވާ "ސެކިއުރިޓީ ޒޯން" ގައި އިސްރާއީލު ސިފައިން ހަރަކާތްތެރިވަމުން ދާނެ ކަމަށް އޭނާ ވިދާޅުވިއެވެ.

އިސްރާއީލުގެ އަސްކަރިއްޔާގެ ވެރިޔާ އިޔާލް ޒާމިރު ވަނީ މި ސަރަހައްދުގައި ހިޒްބުﷲގެ އަމާޒުތަކަށް ހަމަލާދިނުމާއި، އެ ޖަމާއަތުގެ މަރުކަޒުތައް ނައްތާލުމުގެ އޮޕަރޭޝަންތައް ކުރިއަށްގެންދިއުމަށް ރަސްމީކޮށް ހުއްދަ ދެއްވައިފައެވެ. މީގެ ތެރޭގައި ލިޓާނީ ކޯރާ ހަމައަށް އޮންނަ ސަރަހައްދުތަކުގައި ހިންގާ އޮޕަރޭޝަންތައް ހިމެނެއެވެ.

މި ނިންމުމާ ގުޅިގެން ލުބުނާނުގެ ސަރުކާރުން ވަނީ ކަންބޮޑުވުން ފާޅުކޮށްފައެވެ. ލުބުނާނުގެ އޮފިޝަލުން ފާހަގަކުރި ގޮތުގައި އިސްރާއީލުގެ މި އަމަލުތަކަކީ އެއްބަސްވުމާ ކަނޑައެޅިގެން ހިލާފުވުމެކެވެ. އަދި މީގެ ސަބަބުން ލުބުނާނުގެ އަސްކަރިއްޔާއަށް އެ ސަރަހައްދުގެ ސަލާމަތީ ކަންކަން ބެލެހެއްޓުމަށް ހުރަސްއެޅޭ ކަމަށް ވެސް އޮފިޝަލުން ބުނެފައިވެއެވެ. ހިޒްބުﷲގެ ލީޑަރު ނައީމް ގާސިމް ވިދާޅުވީ އިސްރާއީލުން އަމަލުކުރަމުންދާ ގޮތުން އެއްބަސްވުމަކީ ބާތިލު އެއްޗެއް ކަމަށާއި، އެއީ ލުބުނާނުގެ ސިޔާދަތު ދޫކޮށްލުން ކަމަށެވެ.

އެމެރިކާއާއި ވިލާތުގެ އިއްތިހާދުން (އީޔޫ) އިން އަންނަނީ މި އެއްބަސްވުން ދެމެހެއްޓުމަށް ދެ ފަރާތަށް ބާރުއަޅަމުންނެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ އެއްބަސްވުމަށް އަމަލުކުރުމަށް ގޮވާލައްވާފައެވެ. ނަމަވެސް، އިސްރާއީލުން ދާދި ފަހުން ވެސް ލުބުނާނުގެ ދެކުނަށް ވައިގެ ހަމަލާތަކެއް ދީފައިވާއިރު، އެ ސަރަހައްދުގައި ހިނގި ކުރިމަތިލުންތަކެއްގައި އިސްރާއީލުގެ ސިފައިންގެ މީހަކު މަރުވެފައިވާ ކަމަށް އެ ގައުމުގެ އަސްކަރިއްޔާއިން ވަނީ ހާމަކޮށްފައެވެ.