ޕޮލެންޑުގެ އެންމެ މަތީ ޝަރަފު ކަމަށްވާ "އޯޑަރ އޮފް ދަ ވައިޓް އީގަލް"، ޔޫކްރެއިންގެ ރައީސް ވޮލޮޑިމިއަރ ޒެލެންސްކީގެ ކިބައިން އަތުލުމަށް ޕޮލެންޑުގެ ރައީސް ކަރޮލް ނަވްރޮކްސްކީ ނިންމަވައިފިއެވެ. މި ނިންމުން ނިންމާފައިވަނީ ދެވަނަ ބޮޑުހަނގުރާމައިގެ ދުވަސްވަރު ހަރަކާތްތެރިވި، މައްސަލަ ބޮޑު ޖަމާއަތަކަށް ނިސްބަތްކޮށް ޔޫކްރެއިންގެ އަސްކަރީ ޔުނިޓަކަށް ނަންދިނުމާ ގުޅިގެން އުފެދުނު ޑިޕްލޮމެޓިކް މައްސަލަތަކަކާ ގުޅިގެންނެވެ.

މި މައްސަލަ ފެށުނީ ޔޫކްރެއިންގެ ސްޕެޝަލް އޮޕަރޭޝަންސް ފޯސަސްގެ ޔުނިޓަކަށް "ޔޫކްރޭނިއަން އިންސަރޖެންޓް އާރމީ (ޔޫޕީއޭ)" ގެ ނަމުން ނަންދިނުމަށް ޒެލެންސްކީ ނިންމެވުމާ ގުޅިގެންނެވެ. ޕޮލެންޑުން ތުހުމަތުކުރާ ގޮތުގައި، ދެވަނަ ބޮޑުހަނގުރާމައިގެ ތެރޭގައި ވޮލީނިއާ ސަރަހައްދުގައި ޕޮލެންޑުގެ 100،000 އެއްހާ އާންމުން މަރައިލުމުގެ ޒިންމާ އުފުލަންޖެހޭ ބަޔަކީ ޔޫޕީއޭއެވެ.

ނަވްރޮކްސްކީ ވިދާޅުވި ގޮތުގައި، މި ނިންމުމަކީ ޔޫކްރެއިންގެ ރައްޔިތުންނާ ދެކޮޅަށް ނިންމި ނިންމުމެއް ނޫނެވެ. އަދި ރަޝިއާގެ ހަމަލާތަކާ ދެކޮޅަށް ޕޮލެންޑުން ޔޫކްރެއިނަށް ދެމުންގެންދާ ސްޓްރެޓީޖިކް އެއްބާރުލުމަށް ބަދަލެއް ނާންނާނެކަން އޭނާ ފާހަގަކުރެއްވިއެވެ. ނަމަވެސް، ޕޮލެންޑުގެ އާންމުން މަރައިލި ބަޔަކަށް ތައުރީފުކުރުމަކީ ބަލައިގަނެވޭނެ ކަމެއް ނޫން ކަމަށާއި، ތާރީހީ ހަގީގަތަކީ ގާތްކަން ބޭއްވުމަށްޓަކައި ދޫކޮށްލެވޭނެ އެއްޗެއް ނޫންކަމަށް އޭނާ ވިދާޅުވިއެވެ.

މިކަމާ ގުޅިގެން ޔޫކްރެއިންގެ ހާރިޖީ ވަޒީރު އަންޑްރީ ސިބީހާ ވިދާޅުވީ، މިއީ ސްޓްރެޓީޖިކް ގޯހެއް ކަމަށާއި، މިކަމުގެ ފައިދާ ކުރާނީ ހަމައެކަނި ރަޝިއާއަށް ކަމަށެވެ. މި ނިންމުމާ ދެކޮޅުހެދުމުގެ ގޮތުން، 2022 ވަނަ އަހަރު ޕޮލެންޑުން އޭނާއަށް އަރުވާފައިވާ ޝަރަފެއް އަނބުރާ ރައްދުކުރައްވާނެ ކަމަށްވެސް ސިބީހާ ވިދާޅުވިއެވެ.

މި މައްސަލައިގައި ޕޮލެންޑުގެ ބޮޑުވަޒީރު ޑޮނަލްޑް ޓަސްކް ވަނީ ދެ ގައުމުންވެސް ކެތްތެރިކަން އިސްކުރުމަށް ގޮވާލައްވައިފައެވެ. އޭނާ ވިދާޅުވި ގޮތުގައި، ތާރީހީ މައްސަލަތަކާ ގުޅިގެން ދެ ގައުމުގެ ދެމެދުގައި އުފެދޭ ހަމަނުޖެހުންތަކުގެ ފައިދާ ނަގާނީ ރަޝިއާއިންނެވެ.